ސްރީލަންކާގައި މިއަހަރު ފަހުކޮޅު ބޭއްވުމަށް ހަމަޖެހިފައިވާ ރިޔާސީ އިންތިޚާބުގައި އިދިކޮޅު ސްރީލަންކާ ޕޮދުޖަނާ ޕެރަމޫނާ (އެސްއެލްޕީޕީ) ގެ ފަރާތުން ވާދަކުރައްވާނެ ކެންޑިޑޭޓަކީ ގޮތަބަޔަ ރާޖަޕަކްސާ ކަމުގައި ކަނޑައަޅައިފިއެވެ. ވެރިރަށް ކޮލޮންބޯގެ ސުގަތަދާސަ ސްޓޭޑިއަމްގައި އިއްޔެ ފެށުން އެސްއެލްޕީޕީ ނޭޝަނަލް ކޮންވެންޝަންގައި އެކަން އިއުލާންކުރެއްވީ ކުރީގެ ރައީސު އަދި ގޮތަބަޔަގެ ބޭބޭފުޅު މަހިންދަ ރާޖަޕަކްސާއެވެ.
ނަންދަސޭނާ ގޮތަބަޔަ ރާޖަޕަކްސާއަކީ ކުރީގެ ރައީސު މަހިންދަ ރާޖަޕަކްސާގެ ވެރިކަމުގައި ޑިފެންސް ސެކްރެޓަރީއަކަށް ހުންނަވައިގެން 2009 ވަނަ އަހަރު ތަމަޅަ ހަނގުރާމަވެރިން ބަލިކޮށް ސްރީލަންކާގައި 26 އަހަރަށް ދެމިގެން ދިޔަ ދާޚިލީ ހަނގުރާމަ ނިމުމަކަށް ގެންނެވި ބޭފުޅާއެވެ.
އުމުރުފުޅުން 70 އަހަރުގެ ގޮތަބަޔާގެ މައްޗަށް އިންސާނީ ހައްގުތަކާ ޚިލާފު އަމަލުތައް ހިންގެވުމުގެ ބޮޑެތި ތުހުމަތުތަކެއް ކުރެވިފައިވީ ނަމަވެސް، އޭނާއަކީ ސިންގަޅަ ބުޑިސްޓުންގެ މެދުގައި މަގުބޫލުކަން ބޮޑު ބޭފުޅެކެވެ. އެހެންކަމުން، ކެންޑިޑޭޓަކަށް އޭނާ ނެރުމުން މިފަހަރުގެ ރިޔާސީ އިންތިޚާބު ކާމިޔާބުކުރެވޭނެ ކަމަށް އެސްއެލްޕީޕީން އުއްމީދުކުރެއެވެ.
ރިޔާސީ ކެންޑިޑޭޓުކަން ގަބޫލުފުޅުކުރެއްވުމަށް ފަހު ދެއްކެވި ވާހަކަފުޅުގައި ގޮތަބަޔަ ވިދާޅުވީ ސްރީލަންކާ ވަރުގަދަ ކުރެވޭނީ ތަފާތު ދީންތަކާއި ނަސްލުތަކުގެ މެދުގައި އެއްބައިވަންތަކަން ގާއިމުކޮށްގެން ކަމުގައެވެ.
"އެންމެންނަވެސް ރައްކާތެރި މާހައުލެއް އަހަރެން ގާއިމުކޮށްދޭނަން. ނަސްލީ ތަފާތުކުރުމާ ހައްދު ފަހަނައަޅައި ދިއުން ސްރިލަންކާގެ މުޖުތަމައުގައި މޫލައިގެން ދިއުމަށް އަހަރެން ފުރުސަތު ނުދޭނަން. އުތުރުގެ ރައްޔިތުން (ތަމަޅައިން) ގެ އުއްމީދުތައްވެސް އަހަރުމެންނަށް ރަނގަޅަށް އެނގޭ. އެމީހުންގެ ހިތްދަތިކަމަށް އަހަރުމެން ދާއިމީ ހައްލެއް ހޯދައިދޭނަން." މީހުން ވަދެ ފުރި ބާރުވެފައި އޮތް ސްޓޭޑިއަމްގައި ތިބި މީހުންނާ މުޚާޠަބުކުރައްވަމުން ގޮތަބަޔަ ރާޖަޕަކްސާ ވިދާޅުވިއެވެ.
1949 ވަނަ އަހަރު ދެކުނުގެ މާތަރަ ޑިސްޓްރިކްޓްގެ ޕަލަޓުވާއަށް އުފަންވެވަޑައިގަތް ގޮތަބަޔަ ރާޖަޕަކްސާ ވަނީ 1971 ވަނަ އަހަރުން ފެށިގެން 1992 ވަނަ އަހަރާ ހަމައަށް ސްރީލަންކާގައި މަސައްކަތްކުރައްވާފައެވެ. އޭނާ ސިފައިންގެ ޚިދުމަތުން ވަކިވެވަޑައިގެންނެވި އިރު ހުންނެވީ ލެފްޓިނެންޓް ކާނަލްއެއްގެ މަގާމުގައެވެ.
މިއަހަރު ސްރީލަންކާގައި އޮންނަ ރިޔާސީ އިންތިޚާބު 9 ނޮވެންބަރާއި 9 ޑިސެންބަރާއި ދެމެދުގެ ދުވަހެއްގައި ބާއްވަން ޖެހެއެވެ. ރައީސު މައިތުރިޕާލާ ސިރިސޭރާގެ ފުރަތަމަ ރިޔާސީ ދައުރު ހަމަވާނީ 9 ޖަނަވަރީ 2020 ގައެވެ. ދެވަނަ ދައުރަކަށް ވާދަކުރުމުގެ ފުރުސަތު އޭނާއަށް އޮންނާނެއެވެ.
