އިންޑިޔާއިން ކަޝްމީރު ސަރަހައްދަށް ގިނަ އަދަދެއްގެ ސިފައިން ޖަމާކޮށް، ކަޝްމީރުގައި ތިބި ފަތުރުވެރިން އެ ސަރަހައްދު ދޫކޮށް ދިއުމަށް އަންގައިފިއެވެ. އަދި ކަޝްމީރުގައި ކިޔަވަން ތިބި އިންޑިޔާގެ އެހެން ސަރަހައްދުތަކުގެ ކިޔަވާކުދިން އެސަރަހައްދުން ފޭބުމަށް ވެސް ވަނީ އަންގާފައެވެ.
މީގެ އިތުރަށް، އިންޑިޔާ ސަރުކާރުން ވަނީ ކަޝްމީރުގައި ހުންނަ އަމަރްނާތު ފައްޅިއަށް ދަތުރުހަދައިގެން ދާ ހީންދޫން އެތަނަށް ނުދިއުމަށް އަންގާފައެވެ. މި ފިޔަވަޅު އެޅީ އިންޑިޔާއިން ބުނާ ގޮތުގައި "ޓެރަރިޒަމްގެ ނުރައްކާ" އޮތުމުންނެވެ. ކޮންމެ އަހަރަކުވެސް ޖުލައި މަހާ އޮގަސްޓު މަހުގެ ތެރޭގައި 6 ލައްކައަށްވުރެ ގިނަ ހިންދޫން އެފައްޅީގައި އަޅުކަންކުރުމަށް ދަތުރުހަދައިގެން ދެއެވެ. 'އަމަރްނާތު ޔާތުރާ' ގެ ނަމުގައި ހިންދޫން ކުރާ މިދަތުރު މިއަހަރު މިހާތަނަށް 3 ލައްކަ މީހުން ވަނީ ކޮށްފައެވެ.
އިއްޔެ އިންޑިޔާއިން ބުނެފައި ވަނީ ކަޝްމީރު ދެބައިކުރާ ވަގުތީ ސަރަހައްދީ ރޮނގު (ލައިން އޮފް ކޮންޓްރޯލް) ހުރަސްކޮށް ކަޝްމީރުގެ އިންޑިޔާ ފަޅިއަށް ވަންނަން ޕާކިސްތާނުގެ ބޯޑާ އެކްޝަން ޓީމް (ބެޓް) ގެ ބަޔަކު މަސައްކަތްކޮށްފައިވާ ކަމުގައެވެ. އަދި އެ މަސައްކަތް ނާކާމިޔާބުކޮށްލައި، 5 މީހުން މަރާލާފައިވާ ކަމަށްވެސް އިންޑިޔާއިން ބުނެއެވެ.
އެހެންނަމަވެސް، ޕާކިސްތާނުން ވަނީ އިންޑިޔާގެ މިވާހަކަތައް ދޮގުކޮށްފައެވެ. ޕާކިސްތާނު ސިފައިންގެ އިންޓަ ސާވިސަސް ޕަބްލިކް ރިލޭޝަންގެ ޑިރެކްޓަރު ޖެނެރަލް އާސިފު ޣަފޫރު ވިދާޅުވީ ލައިން އޮފް ކޮންޓްރޯލު ހުރަސްކޮށް ޕާކިސްތާނު ސިފަންގެ ބަޔަކު ކަޝްމީރުގެ އިންޑިޔާ ފަޅިއަށް ވަން ކަމަށް ބުނެ އިންޑިޔާއިން ފަތުރަނީ ދޮގު ޚަބަރު ކަމުގައެވެ.
އަނެއްކޮޅުން ޕާކިސްތާނުން ވަނީ ކަޝްމީރުގެ ޕާކިސްތާނު ފަޅީގައި ދިރިއުޅޭ އާއްމުންނާ ދެކޮޅަށް ކްލަސްޓާ ބޮން ބޭނުންކޮށްފައިވާ ކަމަށް ތުހުމަތުކޮށްފައެވެ.
"ބައިނަލްއަގްވާމީ މުއާދާތަކާ ޚިލާފުވެ، އިންޑިޔާ ސިފައިން އާއްމުންނާ ދެކޮޅަށް ކްލަސްޓާ ބޮން ބޭނުންކުރުމަކީ ކުށްވެރިކުރަން ޖެހޭ ކަމެއް. ކަޝްމީރު މީހުންނަށް ލިބިފައިވާ އެމީހުންގެ މުސްތަގުބަލު އަމިއްލައަށް ކަނޑައެޅުމުގެ އިޚްތިޔާރު އެއްވެސް ހަތިޔާރަކުން ނިގުޅައި ނުގަނެވޭނެ." އާސިފު ޣަފޫރު ވިދާޅުވިއެވެ.
ކަޝްމީރުގެ އިންޑިޔާ ފަޅީގެ އޮފިޝަލަކު ވިދާޅުވި ގޮތުގައި އަމަރްނާތި ފައްޅިއަށް އަޅުކަން ކުރަން ދިޔަ 20 ހާސް މީހުންނާއި، ކަޝްމީރުގައި ތިބި އިންޑިޔާގެ މަސައްކަތު މީހުންގެ 2 ލައްކަ މީހުން ވަނީ އެ ސަރަހައްދު ދޫކޮށް ދާންފަށާފައެވެ.
