އަފްޣާނިސްތާނު ސަރުކާރާ، އިދިކޮޅު ޠާލިބާން ޖަމާއަތާ ދެމެދު ޤަޠަރުގައި ކުރިޔަށް ދިޔަ ސުލްހައިގެ ވާހަކަތަކުގައި ސުލްހައިގެ މަޝްރޫއެއް އެކުލަވާލުމަށާއި، "މަދަނީނަށް ލިބޭ ގެއްލުން ސުމަކަށް ކުޑަކުރުމަށް" ދެ ފަރާތުން އެއްބަސްވެއްޖެއެވެ.
ޤަޠަރުގައި ބޭއްވުނު ވާހަކަތަކުގައި، ޠާލިބާން ޖަމާއަތާއި، އެމެރިކާގެ މަންދޫބުންގެ އިތުރަށް، ރައްޔިތުންގެ މަންދޫބުންގެ ނަމުގައި އަފްޣާނިސްތާނުގައި އައި 60 މެންބަރުންގެ ވަފުދެއް ވަނީ ބައިވެރިވެފައެވެ. ދެ ދުވަހަށް ދެމިގެން ދިޔަ ވާހަކަތަކަށް ފަހު އިއްޔެގެ ވަގުތެއްގައި ވަނީ ބަޔާނެއް ނެރެފައެވެ.
މިހާތަނަށް ޤަޠަރުގައި ބޭއްވުނު ވާހަކަތަކުގައި އެމެރިކާގެ މަންދޫބުން ބައިވެރިވި ނަމަވެސް، ރައީސު އަޝްރަފު ޣަނީގެ ސަރުކާރުން ބައިވެރިވެފައި ނުވެއެވެ. ޠާލިބާނުން ދެކޭ ގޮތުގައި އަޝްރަފު ޣަނީގެ ސަރުކާރަކީ އެމެރިކާގެ ގޮނޑިކޮއްކޮއެކެވެ.
ސުލްހައިގެ ވާހަކަތަކުގައި ބައިވެރިވާ އެމެރިކާގެ ވަފުދުގެ އިސްވެރިޔާ ޒަލްމައީ ޚަލީލުޒާދް ވިދާޅުވި ގޮތުގައި ވާހަކަތަކުގައި ވަރަށް ބޮޑު ކުރިއެރުން ވަނީ ލިބިފައެވެ. އެހެންނަމަވެސް، ޠާލިބާންގެ މަސްދަރަކުން މައުލޫމާތު ދިން ގޮތުގައި އެމެރިކާ ސިފައިން އަފްޣާނިސްތާނުގެ ފައިބާނެ ގޮތުގެ ތާވަކާމެދު ދެ ފަރާތުގެ މެދުގައި ޚިޔާލު އެއްގޮތް ނުކުރެވެއެވެ.
އަފްޣާނިސްތާނުގައި ހަނގުރާމަކުރާ ފަރާތްތަކުގެ މެދުގައި ފެބުރުވަރީ މަހު މޮސްކޯގައި ބޭއްވުނު ސުލަހައިގެ ވާހަކަތަކުގައި ނިންމާފައިވާ ނިންމުމަށް އަމަލުކުރުމަށް ޠާލިބާނުން އެދުމުން އަފްޣާނިސްތާނު ސަރުކާރުގެ ވަފުދުން އެއްބަސްވެފައިވާކަމަށް ޚަބަރު ލިބެއެވެ.
މޮސްކޯގެ އެއްބަސްވުމުގައި ވަނީ އަފްނިސްތާނުން އެމެރިކާ ސިފައިން މުޅިން ފޭބުމަށާ، ޠާލިބާން ޖަމާއަތުގެ އިސްވެރިންގެ މައްޗަށް އަޅާފައިވާ ބައިނަލްއަގުވާމީ ދަތިކުރުމުގެ ފިޔަވަޅުތައް ދޫކޮށްލުމަށާ، ގައިދީން ދޫކޯށްލުމަށާ، ޤަޠަރުގެ ދޯހާގައި ހުންނަ ޠާލިބާންގެ އޮފީސް ގަބޫލުކުރުމަށް އެއްބަސްވެފައެވެ.
އދ.ގެ ތަފާސް ހިސާބުތައް ދައްކާގޮތުގައި އަފްޣާނިސްތާނުގައި ދެވުނު ހަމަލާތަކުގައި ފާއިތުވި 2018 ވަނަ އަހަރު އެކަނިވެސް އާއްމުންގެ 3804 މީހުން މަރުވެފައި ވެއެވެ. އޭގެތެރޭގައި 900 ކުޑަކުދިން ހިމެނެއެވެ.
