ސްރީލަންކާގައި މަރުގެ އަދަބުދިނުން ހުއްޓާލާފައި އޮންނަތާ 43 އަހަރު ފަހުން، އެކަން އަލުން ފެށުމަށް ރައީސު މައިތުރިޕާލާ ސިރިސޭނާ ކުރައްވާ މަސައްކަތްޕުޅަށް ގާނޫނީ ގޮތުން ގޮންޖެހުންތަކެއް ކުރިމަތިވެއްޖެއެވެ. އެ ގައުމުގައި އެންމެ ފަހުން މީހަކަށް މަރުގެ އަދަބު ދީފައިވަނީ 1976 ވަނަ އަހަރުގެ ޖޫން މަހުގައެވެ.
ފާއިތުވި ޖޫން މަހުގެ 26 ދުވަހު ރައީސު ސިރިސޭނާ ވަނީ މަސްތުވާތަކެތީގެ މައްސަލައިގައި މަރަން ހުކުމްކޮށްފައިވާ ހަތަރު މީހަކު ދަންޖައްސައިގެން މެރުމުގެ ހުކުމުގައި ސޮއިކުރައްވާފައެވެ. އެ އަމުރު ތަންފީޒުކުރުން ހުއްޓުވުމަށް މިހާރު ދަނީ މަސައްކަތް ކުރެވެމުންނެވެ.
ސިރިސޭނާ ނެރެއްވާފައިވާ އަމުރު ބާޠިލުކޮށްދިނުން އެދި ސްރީލަންކާގެ ކޯޓު އޮފް އެޕީލްއަށް ދެ ޕެޓިޝަނެއް މިހާރު ވަނީ ހުށަހަޅާފައެވެ.
"އަންނަ ހަފުތާގައި ކޯޓް އޮފް އެޕީލްގައި އިބްތިދާއި އަޑުއެހުމެއް އޮންނާނެ. އެހާތަނަށް ދަންޖެއްސުން ނޯންނާނެކަމުގެ ޔަގީންކަން ކޮމިޝަނާ އޮފް ޕްރިޒަންސް ވަނީ ދެއްވާފައި." ކޯޓުގެ އޮފިޝަލަކު ވިދާޅުވިއެވެ
ޖަސްޓިސް މިނިސްޓްރީން ދެ ޖައްލާދުން ހޯދަން ފެބުރުއަރީ މަހު ކުރި އިއުލާނާ ގުޅިގެން އެ މަގާމަށް ކުރިމަތިލީ މީހުންގެ ތެރެއިން އެ މަގާމަށް މިހާރު ދެ މީހަކު ނަގާފައިވާކަން އެ މިނިސްޓްރީން ވަނީ ޔަގީންކޮށްދީފައެވެ. އެހެންނަމަވެސް، އެ ދެމީހުންގެ ވަނަވަރު އެ މިނިސްޓްރީން ހާމަކޮށްފައި ނުވެއެވެ.
މަރުގެ އަދަބުދިނުން މީގެ 43 އަހަރު ކުރިން ހުއްޓާލި ނަމަވެސް ޖައްލާދުގެ މަގާމުގައި 2014 ވަނަ އަހަރާއި ހަމައަށް މީހަކު ހުއްޓެވެ. އެ އަހަރު އޭނާ މަގާމުން މުސްކުޅިކުރި ފަހުންވެސް 3 މީހަކު އެ މަގާމަށް އައެވެ. އެހެންނަމަވެސް، ކުރާނެ މަސައްކަތެއް ނެތުމުން ވަޒީފާ ދޫކުރީއެވެ.
ޖަސްޓިސް މިނިސްޓްރީން ބުނީ މަރުގެ އަދަބު ދޭން އަމުރު ނެރުއްވި ނަމަވެސް، އެކަމާގުޅޭ އިދާރީ ކަންކަން ނިންމައި އަމަލީ ގޮތުން ހުކުމް ތަންފީޒުކުރުމަށް ދުވަސްތަކެއް ނަގާނެ ކަމުގައެވެ.
ރައީސު ސިރިސޭނާގެ އޮފީހު އޮފިޝަލަކު ވިދާޅުވި ގޮތުގައި މަރުގެ އަދަބު ތަންފީޒުކުރައްވައިގެން ރައީސު ސިރިސޭނާ ބޭނުންފުޅުވަނީ މަސްތުވާތަކެތީގެ ވިޔަފާރިކުރާ ފަރާތްތަކަށް ވަރުގަދަ މެސެޖެއް ދެއްވުމެވެ.
ރައީސު ސިރިސޭނާ ވިދާޅުވެފައިވާ ގޮތުގައި މަސްތުވާތަކެއްޗަށް ދެވިހިފާފައި ތިބި 2 ލައްކަ މީހުން ސްރީލަންކާގައި އެބަތިއްބެވެ. އަދި ޖަލުތަކުގައި ތިބި 20 ހާސް މީހުންގެ %60 އަކީ މަސްތުވާތަކެއްޗާ ގުޅޭ މައްސަލަތަކުގައި ޖަލަށް ލާފައި ތިބި މީހުންނެވެ.
1976 ވަނަ އަހަރަށް ފަހުވެސް ސްރީލަންކާގައި ގިނަ އަދަދެއްގެ ބަޔަކަށް މަރުގެ ހުކުމް އިއްވާފައި ވީނަމަވެސް، ހެ ހުރިހާ ހުކުމެއް ވަނީ އުމުރަށް ޖަލަށްލުމަށް ބަދަލުކޮށްފައެވެ.
