އަރަބި ކަނޑުގައި އުފެދި އިރު އުތުރަށް ދަތުރުކުރަމުންދާ ބާރުގަދަ ޠޫފާން މިއަދު މެންދުރުފަހުގެ ވަގުތެއްގައި އިންޑިޔާގެ ހުޅަނގު އުތުރު ސްޓޭޓެއް ކަމަށްވާ ގުޖަރާތެއް އަރާނެކަމުގައި އެގައުމުގެ މޫސުމާ ބެހޭ އިދާރާއިން ބުނެފިއެވެ.
ގަޑިއަކު 155-165 ކިލޯމީޓަރުގެ ވަޔާއެކު، ގަޑިއަކު 16 ކިލޯމީޓަރުގެ ދުވެލީގައި ޠޫފާން ވަޔޫ ދަތުރުކުރަމުންދާއިރު ގުޖަރާތުގެ އައްސޭރީގެ ދްވަރްކާއާއި ޕޯރްބަންދަރާ ދެމެދުގެ ރަށްތަކަށް މިއަދު މެންދުރުފަހު 3 ޖަހާއިރު (ރާއްޖޭ ގަޑިން މެންދުރުފަހު 2:30) ޠޫފާން އަރާނެކަމަށް ލަފާކުރެވެއެވެ.
ޠޫފާނު އަރާނެ ކަމަށް ލަފާކުރެވޭ ސަރަހައްދުގެ ގިނަ ބަޔަކު މިހާރު ވަނީ ރައްކާތެރި ހިސާބުތަކަށް ބަދަލުކޮށްފައެވެ. އިންޑިޔާގެ އަސްކަރިއްޔާގެ އެއްގަމާ، ކަނޑާ، ވައިގެ ސިފައިންނާއި، ކޯސްޓް ގާޑާއި، ނޭޝަނަލް ޑިޒާސްޓަރ ރިލީފު ފަންޑު ގުޅިގެން ހިނގި ބޮޑު އޮޕަރޭޝަނެއްގައި 500 އަވަށެއްގެ 3 ލައްކަ މީހުން ވަނީ ރައްކާތެރި ހިސާބުތަކަށް ބަދަލުކޮށްފައެވެ.
ޠޫފާނުގެ ވައި ގަޑިއަކު 165 ކިލޯ މީޓާރު ބާރު މިނުގައި ހުރިއިރު، ކޮޅިގަނޑުގައި 180 ކިލޯމީޓަރަށް ބާރުވާނެކަމަށް އިންޑިޔާގެ މޫސުމާ ބެހޭ އިދާރާ، އިންޑިޔާ މީޓިއޮރޮލިކަލް ޑިޕާޓްމަންޓް (އައިއެމްޑީ) އިން ލަފަކުރެއެވެ.
މިއަދު މެންދުރު 12 އިން ފެށިގެން ކުރިއަށް އޮތް 24 ގަޑިއިރަށް ގުޖަރާތުގެ ފަސް އެއާޕޯޓެއް ވަނީ ބަންދުކޮށްފައެވެ. އަދި ގުޖަރާތަށް ދަތުރުކުރާ 40 ރޭލެއްގެ ދަތުރު ވަނީ ކެންސަލްކޮށްފައެވެ.
'ވަޔޫ' އަކީ 1998 ވަނަ އަހަރަށް ފަހު ގުޖަރާތަށް އަރާ އެންމެ ބާރުގަދަ ޠޫފާނެވެ. އެފަހަރު ގުޖަރާތުގެ ބަނދަރު ރަށެއް ކަމަށްވާ ކަންޑްލާއަށް ޠޫފާން އަރައި 1241 މީހުން މަރުވެފައި ވެއެވެ.
ގުޖަރާތާ ދިމާއަށް މިސުރާބު ޖަހާފައި ހުރި ޠޫފާނުގެ އަސަރު ޕާކިސްތާނު ސިންދު ޕްރޮވިންސުގެ ދެކުނުގެ އަވަށްތަކަށ ކުރާނެކަމަށް އެގައުމުގެ މޫސުމާ ބެހޭ އިދާރާއިން ވަނީ ލަފާކޮށްފައެވެ.
