ދެކުނު އެމެރިކާގެ ގައުމެއް ކަމުގައިވާ ވެނެޒުއެލާގައި ރައީސު ނިކޮލަސް މަޑޫރޯގެ ސަރުކާރާއި، އިދިކޮޅު ފަރާތްތަކާ ދެމެދު އުފެދިފައިވާ އަރައިރުން ވަކިކޮޅަކަށް ނުނިމި ދިގުލައިގެން ދިއުމާއެކު މަޝްވަރާގެ މޭޒުދޮށަށް އައުމަށް ދެ ފަރާތުން އެއްބަސްވެއްއެވެ. ދެ ފަރާތުން ވެސް މިހާރު ވަނީ ނޯވޭގައި ބާއްވަން ހަމަޖެހިފައިވާ ވާހަކަތަކުގައި ބައިވެރިވުމަށް މަންދޫބުން ފޮނުވާފައެވެ. އެހެންނަމަވެސް، ދެ ފަރާތުގެ ދެމެދުގައި އިތުބާރުކުޑަކަމުން މަޝްވަރާތަކުގައި ކުރިއެރުމެއް ހޯދަމަކީ އުނދަގޫ ކަމަކަށް ވާނެއެވެ.
ނޯވޭގެ ޖަމާއަތަކުން އިސްނަގައިގެން ބާއްވާ މި މަޝްވަރާތަކަށް ދެ ފަރާތުގެ މަންދޫބުންނަށް ދައުވަތު ފޮނުވާފައި ވަނީ ވަކިންނެވެ. ވެނެޒުއެލާ ސަރުކާރުގެ ފަރާތްތަކުން ޚަބަރުދޭ ގޮތުގައި މަޝްވަރާތަކުގައި ސަރުކާރު ތަމްސީލުކުރައްވާނީ އިންފޯމޭޝަން މިނިސްޓަރު ހޮރްޚޭ ރޮޑްރިޖޭޒްއެވެ. އަދި އިދިކޮޅު ފަރާތްތައް ތަމްސީލުކުރައްވާނީ ނޭޝަނަލް އެސެންބްލީގެ މެންބަރު ސްޓާލިން ގޮންޒާލެސްއެވެ.
ނޯވޭއަށް މަންދޫބުން ފޮނުއްވާފައިވާކަން، އިދިކޮޅު ލީޑަރު ހުއާން ގުއާއިޑޯ ވަނީ ޔަގީންކޮށްދެއްވާފައެވެ. އެހެންނަމަވެސް މަޑޫރޯގެ ސަރުކާރާއެކު މަޝްވަރާކުރާކަމަށް އޭނާ އެއްބަސްވެވަޑައިނުގަތެވެ.
"ނޯވޭގައި މަންދޫބުންތަކެއް އެބައުޅުއްވާ." ވެރިރަށް ކަރާކަސްގައި ބޭއްވި އެއްވުމެއްގައި ވާހަކަފުޅުދައްކަވަމުން އޭނާ ވިދާޅުވިއެވެ. ނޯވޭގެ ފަރާތުން "ދަނީ މެދުވެރިއެއްގެ ބައި އަދާކުރުމަށް މަސައްކަތްކުރަމުން" ކަމަށާއި، "ނަތީޖާއެއް ނުނެރެވޭ" އެއްވެސް ވާކަހަތަކެއްގައި އިދިކޮޅުން ބައިވެރިނުވާނެ ކަމަށްވެސް އޭނާ ވިދާޅުވިއެވެ.
ގައުމީ ޓީވީގައި ވާހަކަފުޅުދައްކަވަމުން ރައީސޫ މަޑޫރޯވެސް މަޝްވަރާތަކަށް ސީދާ އިޝާރާތްކުރައްވާފައި ނުވެއެވެ. އެހެންނަމަވެސް، އޭނާ ވިދާޅުވީ އިންފޯމޭޝަން މިނިސްޓަރު ގައުމުން ބޭރަށް ވަޑައިގެން އުޅުއްވަނީ "ވަރަށް މުހިއްމު" ކަމެއްގައި ކަމަށެވެ.
ނަން ހާމަކުރަން ބޭނުންނުވާ ފަރާތްތަކާއި ހަވާލާދީ ނޯވޭގެ އެންއާރްކޭ ރޭޑިއޯ އަދި ޓީވީ ނެޓްވާކުން ޚަބަރުދޭގޮތުގައި ނޯވޭގެ ވެރިރަށް އޮސްލޯގެ ސިއްރު ތަނެއްގައި ވާހަކަތައް ކުރިއަށް ދާތާ ދުވަސްތަކެއް ވެއްޖެއެވެ. އަދި މިހަފުތާ ނިމުމުގެ ކުރިން ދެ ފަރާތުން މަންދޫބުން އެނބުރި ވެނެޒުއެލާއަށް ދާނެއެވެ.
މިއަހަރުގެ ޖަނަވަރީ މަހުގެ 10 ވަނަ ދުވަހު ރައީސު ނިކޮލަސް މަޑޫރޯ ދެވަނަ ދައުރަކަށް ހުވާކުރެއްވި ހިސާބުން ވެނެޒުއޭލާ ވަނީ ހަލަބޮލިކަމުގެތެރޭގައެވެ. މަޑޫރޯ ހޮވިވަޑައިގަތް ރިޔާސީ އިންތިޚާބު އިދިކޮޅު ފަރާތްތަކުން ގަބޫލުނުކުރެއެވެ. މަސްރަހު އިތުރަށް ގޯސްވެގެން ދިޔައީ އިދިކޮޅު ފަރާތްތަކުން ކޮންޓްރޯލްކުރާ ނޭޝަނަލް އެސެންބްލީގެ ރައީސު ހުއާން ގުއާއިޑޯ އޭނާއަކީ އެގައުމުގެ ރައީސުކަމަށް ޖަނަވަރީ މަހުގެ 23 ވަނަ ދުވަހު އިއުލާންކުރެއްވުމުންނެވެ. އެމެރިކާއާއި އިތުރު ބައެއް ގައުމުތަކުން ދަނީ ރައީސު މަޑޫރޯ މަގާމުން ދުރުކުރުމަށް ގުއާއިޑޯ ކުރައްވާ މަސައްކަތަށް ތާއީދުކުރަމުންނެވެ.
ސަފައިންގެ ބޮޑު ބައެއްގެ ތާއީދު ރައީސު ނިކޮލަސް މަޑޫރޯއަށް އޮތުމުން އޭނާއާ ދެކޮޅަށް ގެންނަން އުޅުނު އިންގިލާބުވެސް ވަނީ ކާމިޔާބުނުވެފައެވެ.
