ޕާކިސްތާނުގެ ދެކުނު ބަނދަރެއް ކަމުގައިވާ ގުވާދަރުގައި ހުންނަ ޕާލް ކޮންޓިނެންޓަލް ހޮޓަލަށް ބަޑިން ހަމަލާދީ އެ ހޮޓަލުގެ ސިކިއުރިޓީ ގާޑު މަރާލުމަށްފަހު އިއްޔެ ހަވީރު އެ ހޮޓަލަށް ވަދެގެންފިއެވެ.
ޕާކިސްތާނު އަސްކަރިއްޔާގެ މީޑިއާ ޔުނިޓު އިންޓަ ސާވިސަސް ޕަބްލިކް ރިލޭޝަންސް (އައިއެސްޕީއާރު) އިން ނުރުނު ބަޔާނެއްގައި ވާގޮތުން ބަލޫޗިސްތާނު ޕްރޮވިންސުގެ ގްވާދަރުގައި ހުންނަ ހަމައެކަނި ފަސްތަރި ހޮޓަލަށް ވަދެގަތީ ހަތިޔާރުއެޅި ތިން މީހުންނެވެ. އެމީހުންނަށް ހުރަސްއަޅައި، ރައްދު ހަމަލާދީ، ހުއްޓުވަން އުޅުނު ސެކިއުރިޓީގާޑު މަރާލާފައި އެމީހުން އެތެރެއަށް ވަދެގަތީއެވެ.
ޕާކިސްތާނުން ބަލޯޗިސްތާނު މިނިވަންކުރުމަށް ހަނގުރާމަކުރާ ދަ ބަލޯޗް ލިބަރޭޝަން އާމީ (ބީއެލްއޭ) އިން ވަނީ މި ހަމަލާގެ ޒިންމާ އުފުލާފައެވެ.
"ޗައިނާ އަދި ބޭރު ގައުމުތަކުގެ އިންވެސްޓަރުން ތިބި ޕީސީ ހޮޓަލަށް ހަމަލާދިނީ އަހަރުމެންގެ ހަނގުރާމަވެރިން." ބީއެލްއޭގެ ފަރާތުން ވާހަކަދެއްކި ޖިހަންދު ބަލޯޗު އަލްޖަޒީރާއަށް ފޮނުވި އީމޭލެއްގައިވާ ކަމަށް އަލްޖަޒީރާ.ކޮމް އިން ޚަބަރުދީފައި ވެއެވެ.
އެހެން ނަމަވެސް، ބަލޫޗިސްތާނު ޕްރޮވިންސުގެ އިންސްޕެކްޓަ ޖެނެރަލް އޮފް ޕޮލިސް (އައިޖީޕީ) މުހްސިން ހަސަން ބަޓް ވިދާޅުވިގޮތުގައި ހަމަލާދިން ވަގުތު ހޮޓަލުގައި އެއްވެސް ބިދޭސީއަކު ނެތެވެ.
"ޕީސީ (ޕާލް ކޮންޓިނެންޓަލް) ހޮޓަލުގައި ހަތިޔާރުއެޅި ތިން ހަތަރު މީހަކު އުޅޭކަމުގެ ޚަބަރު އަހަރުމެންނަށް ލިބުނީ (ހަވީރު) 4:50 ހާއިރު" ގުވާދަރުގެ ސްޓޭޝަން ހައުސް އޮފިސަރ އަސްލަމް ބަންގުލްޒައީ ވިދާޅުވިއެވެ.
"ފުލުހުންގެ އިތުރު މީހުންނާއި، އޭޓީއެފް (އެންޓި ޓެރަރިޒަމް ފޯސް) އާއި ސިފައިން މިހާރު އެތާނގައި އެބަތިބި." އޭނާ އިތުރަށް ވިދާޅުވިއެވެ.
ސަލާމަތުން ބާރުތަކުން ވަދެ ހޮޓަލުގެ ފުރަތަމަ ފަންގިފިލާގައި ތިބި ހަމަލާ ދިން މީހުން ވަށާލުމަށް ފަހު، ހޮޓަލުގައި ތިބި މީހުން ވަނީ ސަލާމަތުން އެތަނުން ބޭރަށް ނެރެފައެވެ. އެހެންނަމަވެސް، ބަލޯޗިސްތާނުގެ ދާޚިލީ ވަޒީރު މީރް ޒިޔާ ލަންގޯވް ވިދާޅުވި ގޮތުގައި "ޓެރަރިސްޓުން ބަޑިޖެހުމުގެ ސަބަބުން ހޮޓަލުގެ ތެރޭގައި އެ ވަގުތު ތިބި ބައެއް މީހުން ޒަޚަމްވެފައި" ވެއެވެ.
އެންމެ ފަހުން ޚަބަރު ލިބުނުގޮތުގައި ހޮޓަލަށް ވަދެގަތް 3 ހަނގުރާމަވެރިންވެސް މިހާރު ވަނީ މަރާލެވިފައެވެ.
114 ކޮޓަރީގެ ޕާލް ކޮންޓިނެންޓަލް ހޮޓެލް ހުންނަނީ މަސްވެރިންގެ ބަނދަރަށް ދާ މަގުގައި ބާތިލް ހިލްގެ މަތީގައެވެ. އެއީ ވިޔަފާރިވެރިންނާއި ޓޫރިސްޓުންގެ މެދުގައި މަގުބޫލު ހޮޓަލެކެވެ.
600 ކިލޯ މީޓާރު ދިގު އައްސޭރިއެއް އޮންނަ ގުވަދާރުގައި ޗައިނާއިން ދަނީ ބައިނަލް އަގުވާމީ ބަނދަރެއް ހަނދަމުންނެވެ. އެ ބަނދަރަކީ ޗައިނާގެ ޒިންޖިއިއާންގ ޕްރޮވިންސާއި އިންޑިޔާ ކަނޑު ގުޅާލާ 50 ބިލިއަން ޑޮލަރުގެ ބިޔަ މަޝްރޫއު ޗައިނާ ޕާކިސްތާން އިކޮނޮމިކް ކޮރިޑޯ (ސީޕީއީސީ) ގެ ބައެކެވެ. 2015 ގައި ފެށި މި މަޝްރޫއުގައި ބަނދަރުގެ އިތުރަށް ހައިވޭއާއި، ރޭލްވޭއާއި، ކަރަންޓު އުފައްދާ އިންޖީނުގެ ބިނާކުރުން ހިމެނެއެވެ.
