އުތުރު ކޮރެޔާގެ ކޮންމެ 10 މީހެއްގެ ތެރެއިން 4 މީހަކަށް އެކަށީގެންވާ މިންވަރަށް ކާނާ ނުލިބުމުގެ ބިރު އެބައޮތްކަމަށް އދ. އިން ބުނެފިއެވެ.
އުތުރު ކޮރެޔާގެ ދަނޑުތަކުން މިއަހަރު ލިބުނު ގޮވާން މަދުވުމުގެ ސަބަބުން އެގައުމުން ވަނީ ރައްޔިތުންނަށް ދޭ ކާނާގެ ބާވަތްތައް ދުވާލަކު 300 ގްރާމަށް މަދުކޮށްފައެވެ. މިއީ ކިރިޔާ ފުދޭ މިންވަރަށް ވުރެވެސް ދަށް އަދަދެކެވެ.
އދ. އިން މިހެން ބުނެފައި ވަނީ އުތުރު ކޮރެޔާގެ ދައުވަތަކަށް އެ ޖަމްއިއްޔާގެ ދެ އިދާރާއެއް ކަމަށްވާ ފުޑް އެންޑް އެގްރިގަލްޗަރަލް އޮގަނައިޒޭޝަން (އެފްއޭއޯ) އާއި ވާލްޑް ފުޑް ޕޮރޮގްރާމް (ޑަބްލިޔުއެފްޕީ) ގެ ވަފުދެއް ފާއިތުވި މާރިޗު މަހުގެ 29 އިން އެޕްރީލް މަހުގެ 12 އަށް އެގައުމަށް ކުރި ދަތުރުގައި ހެދި ދިރާސާތަކުގެ މައްޗަށް ބިނާކޮށްފައެވެ.
މަދުންނޫނީ ބައިނަލްއަގްވާމީ އިދާރާތަކަށް އެ ގައުމުގެ ކަންކަން ހޯދައި ބެލުމުގެ ފުރުސަތު ނުދޭ އުތުރު ކޮރެޔާއިން މި ފަހަރު ވަނީ އދ. ގެ ވަފުދަށް ފުޅާ ދާއިރާއެއްގައި ތަންތަން ބެލުމުގެ ފުރުސަތުދީފައެވެ. އެ ގޮތުން އެ ވަފުދުން ވަނީ ކޯޕަރޭޓިވްތަކުގެ ދަނޑުތަކަށާއި، ރަށްތަކާއި ރަށްފުށުގެ އަވަށްތަކުގެ ގެތަކަށާއި، ގަސް މުޑުވަށްކުރާ ނާސަރީތަކަށާއި، ކާބޯތަކެތި ބަހާ މަރުކަޒުތަކަށް ޒިޔާރަތްކޮށްފައެވެ.
ޑަބްލިޔުއެފްޕީގެ ތަރުޖަމާނު ހާވް ވާހޫސެލް ވިދާޅުވިގޮތުގައި، އެންމެ ފަހުން މި ހެދި ކާނާ ލިބުމުގެ ޔަގީންކަން އޮތް މިންވަރު ބެލުމުގެ ދިރާސާއިން އެނގުނު ގޮތުގައި، ވާރޭ ނުވެހޭ ދުވަސްތައް އައުން ގިނަވުމާއި، ހޫނުވައި ޖެހުން އިތުރުވުމާއި، ފެންބޮޑުވުމުގެ ސަބަބުން ފާއިތުވި 10 އަހަރުތެރޭގައި އައި އެންމެ ދަށް ގޮވާން ކެނޑުމުގެ މޫސުން މިފަހަރު ވަނީ އައިސްފައެވެ. އެކަމުގެ ސަބަބުން 10.1 މިލިއަން މީހުންނަށް ކާނާގެ ރައްކާތެރިކަން ކުޑަވާނެއެވެ. އޭގެ މާނައަކީ އަންނަ ގޮވާންކަނޑާ މޫސުމާ ހަމައަށް ފުދޭވަރަށް އެމީހުން އަތުގައި ކާނާ ނުހުންނާނެއެވެ.
އުތުރު ކޮރެޔާގެ ސެންޓްރަލް ބިއުރޯ އޮފް ސްޓެޓިސްޓިކްސްގެ ހިސާބުތަކުން ދައްކާ ގޮތުގައި އެ ގައުމުގެ އާބާދީއަކީ 25.2 މިލިއަނެވެ.
ވާހޫސެލް ވިދާޅުވީ މިހާރުގެ ހާލަތު 'ބަނޑަށްޖެހުން' ކަމުގައި ސިފަކުރައްވަން ބޭނުންފުޅު ނުވާކަމުގައެވެ. އެހެންނަމަވެސް، މައްސަރުތަކެއް ނުވަތަ އަހަރުތަކެއް ފަހުން އެ ހާލަތު އައުމަކީ އެކަށީގެންވާ ކަމަކެވެ. "މިއަދު ހާލަތު އޮތީ ވަރަށް ނުރައްކާތެރި ފައްތަރެއްގައި، އެއީ ހަގީގަތަކީ." އޭނާ ވިދާޅުވިއެވެ.
ޑަބްލިޔުއެފްޕީގެ ރިޕޯޓުގައި ވާގޮތުން އުތުރު ކޮރެޔާގައި މިފަހަރު ދަނޑުވެރިކަމުގެ އުފެއްދުންތަކުން ލިބުނީ ޖުމްލަ 4.9 މިލިއަން ޓަނެވެ. މިއީ 2009 ވަނަ އަހަރަށް ފަހު ލިބުނެ އެންމެ ދަށް އަދަދެވެ. މިއީ ބޭނުންވާ މިންވަރަށްވުރެ 1.36 މިލިއަން ޓަން މަދު އަދަދެކެވެ.
1990 ގެ އަހަރުތަކުގެ މެދުތެރޭގައި އުތުރު ކޮރެޔާގައި ބަނޑަށްޖެހިގެން 3 މިލިއަނަށްވުރެ ގިނަ މީހުން މަރުވެފައި ވެއެވެ.
