30 އަހަރު ދުވަހު ސޫދާނުގެ ރައީސުކަންކުރެއްވި ޢުމަރު ޙަސަން އަލްބަޝީރު މަގާމުން ދުރުކޮށް މިއަދު އެގައުމުގެ ވެރިކަމާ ހަވާލުވި ސިފައިން ގައުމާ މުޚާޠަބުކޮށް އިއްވި ބަޔާން މުޒާހަރާކުރާ މީހުން ގަބޫލެއް ނުކުރިއެވެ.
ސޫދާނުގައި ފާއިތުވި ޑިސެންބަރު މަހުއްސުރެ ކުރިއަށްދާ މުޒާހަރާތައް އިންތިޒާމުކުރުމުގައި އިސްދައުރެއް އަދާކުރި މަސައްކަތްތެރިންގެ ޖަމްއިއްޔާ، ސޫދާން ޕްރޮފެޝަނަލްސް އެސޯސިއޭޝަނުން ބުނެފައި ވަނީ ދިފާއީ ވަޒީރު ލެފްޓިނެންޓް ޖެނެރަލް ޢަވަޟް ބިން ޢައުފު އިއްވެވި ބަޔާން ގަބޫލުނުކުރާކަމަށެވެ. އެ ޖަމްއިއްޔާއިން ވަނީ މުޒާހަރާތައް ކުރިއަށް ގެންދިއުމަށް އާއްމުންނަށް ގޮވާލާފައެވެ.
ސިފައިންގެ ވެރިން ވަނީ "ރައްޔިތުން އެބަޔަކާ އަދި މުއައްސަސަތާކަކާ ދެކޮޅަށް ނުކުތް މީހުންނާ މުއައްސަސާތަކެއް އެހެން ސިފައެއްގައި އިއާދަކުރި އަސްކަރީ އިންގިލާބެއް" ގެނެސްފައި ކަމަށް މަސައްކަތްތެރިންގެ މުސްތަގިއްލު ޖަމްއިއްޔާ، ސޫދާން ޕްރޮފެޝަނަލްސް އެސޯސިއޭޝަނުން ބުނެފައި ވެއެވެ.
'ގައުމު ފުނޑުފުނޑުކޮށް ރައްޔިތުން ކަތިލި މީހުން ދަނީ ޚުދުމުޚްތާރުކަމުގެ ތަޚުތު ގުޑުވާލި މަތިވެރި އުތުރިއެރުމުގައި ރައްޔިތުންގެ ގައިން އޮހޮރުނު ކޮންމެ ލޭ ތިއްކަކާއި ކަރުނަ ތިއްކެއް ވަގަށް ނެގުމަށް މަސައްކަތްކުރަމުން." އެ ޖަމްއިއްޔާއިން އިތުރަށް ބުނެފައި ވެއެވެ.
މިއަދުގެ ވަގުތެއްގައި ސޫދާނުގެ ގައުމީ ޓީވީން ވަނީ ސޫދާން ސިފައިންގެ ބަޔާނެއް ގެނެސްދީފައެވެ. އެ ބަޔާން އިއްވެވީ ފެބްރުއަރީ މަހުން ފެށިގެން ޢުމަރު ޙަސަން އަލްބަޝީރުގެ ނާއިބެއްގެ ގޮތުގައި ހުންނެވި ދިފާއީ ވަޒީރު ޢަވަޟް ބިން ޢައުފެވެ. އެ ބަޔާނުގައި އޭނާ ވިދާޅުވީ "ވެރިކަން މުލުން ލުހެލައި، އެވެރިކަމުގެ އެންމެ އިސް ފަރާތް ހިފަހައްޓައި، އޭނާ އަމާން ތަނެއްގައި ބަންދުކޮށްފައިވާ" ކަމުގައެވެ.
މީގެ އިތުރަށް ބިން ޢައުފު ވަނީ ސޫދާނުގެ ގާނޫނު އަސާސީއަށް އަމަލުކުރުން ހުއްޓާލައި، ތިން މަސްދުވަހަށް ކުއްލި ނުރައްކަލުގެ ހާލަތު އޮންނާނެކަން އިއުލާންކުރައްވާފައެވެ. އަދި ދެ އަހަރު ދުވަހުގެ އިންތިގާލީ މަރުހަލާއެއް ވެސް އިއުލާންކުރައްވާފައެވެ.
މި ބަޔާން ޓީވީން ފޮނުވުމާއެކު އަލްބަޝީރުގެ ވެރިކަން ނިމުމަކަށް އައުމުގެ އުފަލުގައި އެއްވެ ތިބި މީހުންގެ މެދުގައި ވަނީ ރުޅިވެރިކަން ފެތުރިގެން ގޮސްފައެވެ. މުޒާހަރާކުރާ މީހުން އަލްބަޝީރުއާ މުޚާޠަބުކޮށް ގޮވަމުން ދިޔަ "ހަމަ ވެއްޓޭނެ" މިހާރު ވަނީ "ދެވަނަ މީހާވެސް ވެއްޓޭނެ" އަށް ބަދަލުވެފައެވެ.
މިއަދު ހަވީރު މީސް މީޑިއާގައި އާއްމުވި ވީޑިއޯއަކުން ފެންނަ ގޮތުގައި މުޒާހަރާކުރަން ތިބި މީހުންގެ ތެރެއިން ބަޔަކު ވަނީ ދިފާއީ ވަޒީރު ބިން ޢައުފުގެ ކާރުކޮޅަށް ހަމަލާދީ "ކަލޭ ބޭނުމެއް ނޫނޭ" ބުނެ އަޑުގަދަކޮށްފައެވެ.
ސޫދާން ޕްރޮފެޝަނަލްސް އެސޯސިއޭޝަނާއި، އިދިކޮޅު ފަރާތްތަކުގެ ކޯލިޝަނުން ނެރުނު ބަޔާނެއްގައި ވަނި ސިފައިންގެ ބަޔާން އެއްގޮތަކަށްވެސް ބަލައި ނުގަންނާނެ ކަމަށާއި، މަދަނީ ސަރުކާރަކާ ވެރިކަން ހަވާލުކުރަންދެން މުޒާހަރާތައް ކުރިއަށް ގެންދާނެކަމަށް ބުނެފައެވެ.
