ފިލްމް ސްޓާރ ޢާމިރު ޚާނާއި ނަސީރުއްދީން ޝާހާއި ކުރީގެ މަޝްހޫރު ކްރިކެޓް ކުޅުންތެރިޔާ ނަވްޖީތު ސިއްދޫއަކީ ބާޣީން ކަމަށާއި ގަދަރުކުރަން އެކަށީގެންވާ ބައެއްނޫންކަމަށް ހިންދޫންގެ ހައްދުފަހަނަޅާފައިވާ ޖަމާއަތެއްކަމުގައިވާ "ރާޝްޓްރިޔާ ސިވިކް ސިންގް" (އާރު އެސް އެސް) ގެ ވެރިޔާ އަންދްރޭޝް ކުމާރު ބުނެފިއެވެ.
އާރުއެސްއެސްއިން ބޭއްވި ރަސްމިއްޔާތަކަށްފަހު މީޑިއާއަށް މައުލޫމާތުދެމުން، އިންޑިއާގައި އަޖްމަލް ޤިސާބް، ޔަޢުޤޫބް، އަދި ޢިޝްރަތު ޖަހާންފަދަ މުސްލިމް ޒުވާނުން ބޭނުން ނުވާކަމަށް ވެސް އަންދްރޭޝް ކުމާރު އަޑަށް ބާރުލާފައި ބުންޏެވެ.
އިންޑިއާގެ ހައްދުފަހަނަޅާފައިވާ ހިންދޫ ޖަމާޢަތްތަކުން ޢާމިރު ޚާނާއި ނަސީރުއްދީން ޝާހާއި ޒާތީގޮތުން ދިމާކޮށް ބަހުގެ ހަމަލާތައް ދެމުންދަނީ އެ ދެމީހުން ބައެއްފަހަރު ޕާކިސްތާނާއި އިންޑިއާގެ މުސްލިމުންގެ ހިމާޔަތުގައި ޚިޔާލުފާޅުކުރަމުންދާތީއެވެ. އަދި ނަވްޖީތު ސިއްދޫއާ ހައްދުފަހަނަޅާފައިވާ ހިންދޫން ދިމާކުރަމުންދަނީ އޭނާ ޕާކިސްތާނާ ގާތްގުޅުމެއް އުފެއްދުމަށް މަސައްކަތްކުރަމުންދާތީއެވެ.
ހައްދުފަހަނަޅާފައިވާ ހިންދޫން ކޮންމެ ގޮތަކަށް ސިފަކުރިޔަސް، ޢާމިރު ޚާނާއި ނަސީރުއްދީން ޝާހާއި ސިއްދޫއަކީ އިންޑިއާގެ އެތައް މިލިއަން މީހުންގެ ލޯބި ހޯދާފައިވާ އަގުބޮޑު ތަރިންނެވެ.
