ފާއިތުވި އަހަރުގެ ޖޫން މަހު ސިންގަޕޫރުގައި އެމެރިކާގެ ރައީސު ޑޮނާލްޑް ޓްރަމްޕްއާއި އުތުރު ކޮރެޔާގެ ޒައީމު ކިމް ޖޮންގ-އުން ބޭއްވެވި ފުރަތަމަ ބައްދަލުވުގައި ވެވުނު އެއްބަސްވުމާ ޚިލާފަށް އުތުރު ކޮރެޔާއިން ނިއުކުލިޔާ ހަތިޔާރު އެފެއްދުން ކުރިއަށް ގެންދާކަން ހާމަވެފައިވީ ނަމަވެސް، ރައީސު ޓްރަމްޕްއާއި ޒައީމު ކިމްގެ ދެވަނަ ބައްދަލުވުން މި ފެބުރުވަނީ މަހުގެ ފަހުކޮޅު ބާއްވާނެކަން ވައިޓް ހައުސްއިން ހާމަކޮށްފިއެވެ. އެހެންނަމަވެސް، ބައްދަލުވުން ބާއްވާނެ ވަކި ތަނެއް ހާމަކޮށްފައި ނުވެއެވެ.
މި ބައްދަލުވުން އޮންނާނެކަން ވައިޓް ހައުސްއިން ހާމަކޮށްފައި ވަނީ ޒައީމު ކިމްގެ ޚާއްސަ މަންދޫބު އަދި އުތުރު ކޮރެޔާގެ ޖާސޫސީ އިދާރާގެ ކުރީގެ ވެރިޔާ ކިމް ޔޮންގ ޗޮލްއާ ރައީސު ޓްރަމްޕް ބައްދަލުކުރެއްވުމަށް ފަހުއެވެ.
އުތުރޮ ކޮރެޔާގެ މަންދޫބާއެކު ޓްރަމްޕް ބޭއްވެވި ދޮޅު ގަޑިއިރުގެ ބައްދަލުވުމަށް ފަހު، ވައިޓް ހައުސްގެ ތަރުޖަމާނު ސާރާ ސޭންޑާސް ވިދާޅުވީ "ރައީސު ޓްރަމްޕް ހުންނެވީ ފަހުން އިއުލާން ކުރެވޭ ވަގުތެއްގައި ޒައީމު ކިމްއާ ބައްދަލުކުރެއްވުމުގެ އިންތިޒާރުގައި" ކަމުގައެވެ.
"ރައީސު ޓްރަމްޕް ވަނީ ކިމް ޔޮންގ ޗޮލްއާއެކު ދޮޅު ގަޑިއެއްހާ އިރަށް ބައްދަލުކުރައްވައި، ނިއުކުލިޔާ ހަތިޔާރު ނައްތާލުމާއި، ދެމެދުގައި ފެބުރުވަރީ މަސް ނިމޭހާ ތާނގައި ދެ ގައުމުގެ އެންމެ އިސްވެރިންގެ ބައްދަލުވުމެއް ބޭއްވުމާމެދު މަޝްވަރާ ކުރައްވާފައި" އޭނާ އިތުރަށް ވިދާޅުވިއެވެ.
ޖޫން މަހު ސިންގަޕޫރުގައި ބޭއްވި ބައްދަލުވުމަށް ފަހު އުތުރު ކޮރެޔާއިން ނިއުކުލިޔާ ޓެސްތައް ހުއްޓާލައި، ނިއުކުލިޔާ ހަތިޔާރާ ގުޅުން ހުރި ބައެއް ތަންތަން ރޫޅާލި ނަމަވެސް، އެގައުމުން ނިއުކުލިޔާ ހަތިޔާރު އުފެއްދުމުގެ މަސައްކަތް ހުއްޓާލާފައި ނުވެއެވެ. އެހެންނަމަވެސް، ރައީސު ޓްރަމްޕް އުއްމީދުކުރައްވަނީ ދެވަނަ ބައްދަލުވުމުގައި ނިއުކުލިޔާ ހަތިޔާރުގެ ޕްރޮގްރާމު މުޅިން ހުއްޓާލުމަށް އުތުރު ކޮރެޔާ އެއްބަސްކުރެއްވޭނޭ ކަމުގައެވެ.
