ދިވެހިންގެ މެދުގައި އެކުވެރިކަމާއި ވަޙުދަތު ދެމެހެއްޓުމަށްޓަކައި ގައުމުގައި މިއޮތް ދީނީއެއްބައިވަންތަކަން ދެމެހެއްޓުމަކީ ކޮންމެހެން ލާޒިމް ކަމެއް ކަމުގައި މިއަދުގެ ހުކުރު ޚުތުބާގައި ބުނެފިއެވެ.
ހުކުރު ޚުތުބާގައި ބުނެފައި ވަނީ މިއަދާ ހަމައަށްވެސް ދިވެހި ގައުމުގެ އަމާންކަމާއި، ސުލްޙަ މަސަލަސްކަން ދެމިއޮތީ ދިވެހިންގެ މެދުގައި އޮތް ދީނީ އެއްބައިވަންތަ ކަމުގެ ސަބަބުން ކަމަށެވެ. އަދި ދިވެހިންނަށް ލިބިފައިވާ އެންމެ ބޮޑު ނިއުމަތަކީ އިސްލާމް ދީން ކަމަށާއި، އިސްލާމް ދީނަކީ ދިވެހި ގައުމުގެ އެކުވެރިކަމާއި އެއްބައިވަންތަ ކަމުގެ އަސާސީ ރުކުން ކަމުގައިވެސް ބުނެފައިވެއެވެ. އަދި އިސްލާމް ދީނަކީ ދިވެހި ގައުމުގެ އަމާންކަމާއި ސުލްޙައިގެ ރަމްޒު ކަމަށްވެސް ބުނެފައިވެއެވެ.
ޚުތުބާގައި ބުނެފައި ވަނީ ދުނިޔޭގެ އެކިކަންކޮޅު ތަކަށް ނަޒަރު ހިންގާލާއިރު ފެންނަމުންދާ ހަމަނުޖެހުންތަކާއި، ލޭއޮހޮރުވުންތަކުގެ ސަބަބަކަށް ވެފައި އޮތީ ޒަމާނުއްސުރެ އެގައުމުތަކުގައި އޮތް ދީނީ އަދި ނަސްލީ ދެކޮޅުވެރިކަން ކަމަށެވެ.
"ނަމަވެސް މާތް ﷲގެ ރަޙްމަތްފުޅުން ދިވެހިންގެ މެދުގައި މިފަދަ އިޖުތިމާއީ ބައިބައިވުންތަކެއް ނެތެވެ. އަދި ދީނީ ބައިބައިވުމެއްވެސް ނެތެވެ." ޚުތުބާގައި ބުނެފައިވެއެވެ.
މުސްލިމުންނަކީ މާތް ﷲ އަށް އީމާންވާ، އެއްދީނެއްގެ އަހުލުވެރިން ކަމަށާއި މުސްލިމުންގެ މެދުގައި އޮންނަންޖެހޭ އެއްބައިވަންތަކަމުގެ އަސާސް ކަމުގައި ލައްވާފައި ވަނީ ﷲ އަށް އީމާން ވުމުގެ އަޤީދާ ކަމަށްވެސް ޚުތުބާގައި ބުނެފައިވެއެވެ. އެގޮތުން މުސްލިމުންގެ މެދުގައި އޮންނަ ލޯތްބާއި ހަމްދަރުދީއަކީ އީމާންކަމާއި ގުޅި ލާމެހިފައިވާ ކަންކަން ކަމަށްވެސް ބުނެފައިވެއެވެ.
މުޖުތަމައު ބައިބައިކޮށްލުމަށް މަސައްކަތްކުރާ މީހުން، މުސްލިމުންގެ އަބުރާއި އިއްޒަތަށް އެއްވެސް ގޮތަކަށް ނުބަލާ ކަމަށާއި، ނަމަވެސް މުސްލިމުންގެ އަބުރާއި އިއްޒަތާއި، ލެޔާއި މުދަލަކީވެސް ﷲ ޙުރުމަތްތެރި ކުރައްވާފައިވާ ތަކެތިކަން ޚުތުބާގައި ބަޔާން ކޮށްފައިވެއެވެ.
