ކުޅިވަރަކީ އެންމެން އެއްބައިވަންތަކުރުވާ ކަމެއް ކަމަށާއި، ޚިޔާލު ތަފާތުވުންތައް ދޫކޮށް އެންމެން އެއްތާކުން ފެނުމަކީ ވަރަށް އުފާވެރި މަންޒަރެއްކަމުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
ރައީސް މިހެން ވިދާޅުވީ ދުޅަހެޔޮ ހަށިހެޔޮ ޢީދާއި ގުޅިގެން މިރޭ ބޭއްވި ޚާއްޞަ ފުޓްބޯޅަ މެޗުތަކުގެ ތެރެއިން ދެއްވި ބަސްދީގަތުމެއްގައި ކަމަށް ރައީސް އޮފީހުން ވަނީ ވިދާޅުވެފައެވެ.
ކުޅިވަރު މި ޢީދާ ގުޅިގެން މިރޭ ބޭއްވި ޚާއްޞަ ފުޓްބޯޅަ މެޗެއްގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙާއި، އެމަނިކުފާނުގެ ނާއިބު ފައިޞަލް ނަޞީމް ވަނީ ބައިވެރިވެވަޑައިގެންފައެވެ.
މި މެޗުތައް ބައްލަވައިލެއްވުމަށް ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަޙްމަދު ވަނީ ދަނޑަށް ވަޑައިގެންފައެވެ.
މިރޭ ކުޅުނު ފުޓްބޯޅަ މެޗުތަކުގައި ބައިވެރިވެ ވަޑައިގެންނެވި ބޭފުޅުންގެ ތެރޭގައި ރައްޔިތުންގެ މަޖިލީހުގެ ރައީސް ޤާސިމް އިބްރާހީމާއި، ކުރީގެ ރައީސުލްޖުމްހޫރިއްޔާ މުޙައްމަދު ނަޝީދާއި، ވަޒީރުންގެ މަޖިލީހުގެ މެންބަރުންނާއި، ރައްޔިތުންގެ މަޖިލީހުގެ ބައެއް މެންބަރުން ހިމެނިވަޑައިގަންނަވައެވެ.
މިރޭގެ ފުޓްބޯޅަ މެޗުތައް ބައްލަވާލެއްވުމަށް ކުރީގެ ރައީސުލްޖުމްހޫރިއްޔާ އަލްއުސްތާޒު މައުމޫން ޢަބްދުލް ޤައްޔޫމާއި ސަރުކާރުގެ އިސް ބައެއް ބޭފުޅުން ވެސް ރަސްމީ ދަނޑަށް ވަޑައިގެންނެވި ކަމަށް ރައީސް އޮފީހުން ވިދާޅުވެފައިވެއެވެ.
