46 ގައުމަކުން 300 އަށްވުރެ ގިނަ މަންދޫބުން މިއަދުގެ ރަސްމިއްޔާތުގައި ބައިވެރިވެވަޑައިގަންނަވާނެ: ފޮރިން މިނިސްޓްރީ

ރައީސް އިބްރާހިމް މުޙައްމަދް ޞާލިޙް އާއި އެމަނިކުފާނުގެ ނައިބު ފައިސަލް ނަސީމް ހުވައި ކުރެއްވުމުގެ ރަސްމިއްޔާތުގައި 46 ގައުމަކުން 300އަށް ވުރެ ގިނަ މަންދޫބުން ބައިވެރިވެ ވަޑައިގަންނަވާނެ ކަމަށް ފޮރިން މިނިސްޓްރީ އިން ހާމަކޮށްފިއެވެ.

ފޮރިން މިނިސްޓްރީ އިން ހުކުރު ދުވަހު ނެރުއްވާފައިވާ ބަޔާނުގައި ހާމަކުރައްވާފައިވާ ގޮތުގައި މިއަދު ހަވީރު ގަލޮޅު ދަނޑުގައި އޮންނަ ރަސްމިއްޔާތުގައި ބައިވެރިވެ ވަޑައިގަންނަވާ އެންމެ އިސްވެރިޔަކީ އިންޑިއާގެ ބޮޑުވަޒީރު ނަރެންދްރަ މޯދީ އެވެ. އިސް މަންދޫބުންގެ ތެރޭގައި ހިމެނިވަޑައިގަންނަވަނީ:

- ސްރީ ލަންކާގެ ކުރީގެ ރައީސް ޗަންދްރިކާ ބަންޑާރަނަޔަކަ ކުމާރްތުންގާ

- ސުޢޫދީ ޢަރަބިޔާގެ ރަސްގެފާނު ސަލްމާން ބިން ޢަބްދުލްޢަޒީޒް އަލްސަޢުދުގެ މުޝީރު ވަލީ އަޙްދް ޕްރިންސް ޑރ. މަންޞޫރް ބިން މުޙައްމަދު ޢަބްދުލްޢަޒީޒް އަލްސަޢުދު

- އެކުވެރި ޢަރަބި ޢިމާރާތުގެ ރަސްގެފާނުގެ ދަރިކަލުން ހިޒް ހައިނެސް ޝައިޚް ހަމްދާން ބިން މުޙައްމަދް ބިން ޒައިދު އަލް ނަޙްޔާން

- ޕާކިސްތަނުގެ ސެނެޓުގެ ޗެއަރމަން ހިސް އެކްސެލެންސީ މުޙައްމަދް ޞާދިޤް ސަންޖްރާނީ

ސްރީ ލަންކާގެ ފޮރިން އެފެއަރޒް މިނިސްޓަރ އޮނަރަބްލް ޑރ. ސަރަތް އަމުނުގަމަ

- ސްރީ ލަންކާގެ މިނިސްޓަރ އޮފް ޕްރޮވިންޝަލް ކައުންސިލް، ފައިޒަރް މުޞްްޠަފާ

- ފަލަސްތީނުގެ މިނިސްޓަރ އޮފް ފޮރިން އެފެއަރޒް އެންޑް އެކްސްޕެޓްރިއޭޓްސް ހިޒް އެކްސެލެންސީ ޑރ. ރިއާޒް މާލިކީ

- ޗައިނާ ރައީސްގެ ޚާއްޞަ މަންދޫބު، ޗައިނާގެ މިނިސްޓަރ އޮފް ކަލްޗަރ އެންޑް ޓުުއަރިޒަމް ހިޒް އެކްސެލެންސީ ލުއޯ ޝުގަން

- ޖަޕާން ރައީސްގެ ފަރާތްޕުޅުން ޖަޕާނުގެ ގާނޫނު ހަދާ މަޖިލީހުގެ މެންބަރު އޮނޮރަބްލް ވަޓަރު ޓަކެޝީތާ

- މޮރކޯގެ ރަސްގެފާނުގެ ފަރާތްޕުޅުން މޮރޮކޯގެ ސެކްރެޓަރީ އޮފް ސްޓޭޓް ފޯރ ފޮރިން އެފެއަރޒް އެނޑް އިންޓަރނޭޝަނަލް ކޯޕަރޭޝަން ހިޒް އެކްސެލެންސީ  މޫނިއްޔާ ބޫޞިޠާ

- ސީޝެލްސްގެ ސެކްރެޓަރީ އޮފް ސްޓޭޓް ކެބިނެޓް އެފެއަރޒް ހިޒް އެކްސެލެންސީ މުޙައްމަދް ޢަފީފް

- ތުރުކީގެ ރައީސްގެ ޚާއްޞަ މަންދޫބް ތުރުކީގެ ފޮރިން މިނިސްޓްރީގެ ނައިބު ހިޒް އެކްސެލެންސީ ޔަވޫޒް ސަލީމް ކިރާން

- ސާރބިއާގެ ރައީސްގެ ޚާއްޞަ މަންދޫބު، ސަރބިއާގެ ފޮރިން އެފެއަރޒް މިނިސްޓްރީގެ ޕޮލިޓިކަލް ޑިރެކްޓަރ އެމްބެސެޑަރ ޒޮރާން ވޫޖިކް

- ޔޫރަޕިއަން ޔުނިއަން އެކްސްޓަރނަލް ސަރވިސްގެ ޑެޕިއުޓީ ސެކްރެޓަރީ ޖެނެރަލް  ޖީން ކްރިސްޓޯފް ބެލިއަރޑް

- އިންޓަރ-ޕާލަމެންޓަރީ ޔޫނިއަންގެ ސެކްރެޓަރީ ޖެނެރަލް މާރޓިން ޗުންގޮންގ

- ސާކުގެ ސެކްރެޓަރީ ޖެނެރަލް ހިޒް އެކްސެލެންސީ އަމްޖަދް ޙުސައިން ބީ. ސިއާލް ހިމެނިވަޑައިގަންނަވައެވެ.

މީގެ އިތުރުން އެކި ގައުމުތަކުގެ ސަފީރުންނާއި ސަރުކާރުގެ އިސް އޮފިޝަލުންނާއި ވިޔަފާރީގރީގައި އިސްކޮށް އުޅުއްވާ ބޭފުޅުން މިއަދުގެ ރަސްމިއްޔާތުގައި ބައިވެރިވެ ވަޑައިގަންނަވާނެ ކަމަށް ފޮރިން މިނިސްޓްރީގެ ބަޔާނުގަިއ ހާމަކޮށްފައިވެއެވެ.

ރަސްމިއްޔާތުގައި ބައިވެރިވެ ވަޑައިގަންނަވާ މަންދޫބުންގެ ތެރެއިން ބައެއް ބޭފުޅުން ރައީސް އިބްރާހީމް މުޙައްމަދް ޞާލިޙްގެ އަރިހަށް އިޙްތިރާމްގެ ޒިޔާރަތެއް ކުރައްވާ ގޮތަަށްވެސް ވަނީ ހަމަޖެހިފައެވެ. އަދި ރައީސްގެ ފަރާތްޕުޅުން ދެއްވާ ޚާއްޞަ ޖާފަތެއްގައިވެސް މަންދޫބުން ބައިވެރިވެ ވަޑައިގަންނަވާނެއެވެ. މި ޖާފަތް އޮންނާނީ މިރޭ ކުރުނބާ މޯލްޑިވްސް ގައެވެ.