ރައްޔިތުންގެ މަޖިލީހުން ޖުޑީޝަލް ސާވިސް ކޮމިޝަން (ޖޭއެސްސީ) އަށް ކަނޑައަޅާފައި ހުންނަވާ މެމްބަރު ގުރައިދޫ ދާއިރާގެ މެމްބަރު އިބްރާހިމް ރިޒާ އެ މަޤާމުން ވަކި ކުރަން މަޖިލީހުން ފާސް ކުރައްވައިފިއެވެ. މަޖިލީހުގެ މިނިންމުމާއެކު ރިޒާ ވަނީ އެމަޤާމުން ވަކިވެފައެވެ.
ރިޒާ ވަކިކުރަން ފެންނަ ކަމަށް ވޯޓު ދެއްވީ ވޯޓުގައި ބައިވެރިވެ ވަޑައިގެންނެވި 67 މެމްބަރުންގެ ތެރެއިން 42 މެމްބަރުންނެވެ. އޭނާ ވަކިކުރަން ނުފެންނަ ކަމަށް ވޯޓު ދެއްވީ 24 މެމްބަރުންނެވެ. ވަކިކޮޅަކަށް ވޯޓުނުދެއްވައި އެއް މެމްބަރަކު އިންނެވިއެވެ.
ރިޒާ ވަކިކުރަން މަޖިލީހަށް ހުށަހެޅުއްވީ ވައިކަރަދޫ ދާއިރާގެ މެމްބަރު މުޙައްމަދު ނާޒިމެވެ. މި މައްސަލައިގެ ބަޙުސް މަރުޙަލާގައި އެމްޑީޕީއާއި އެޕާޓީއަށް ތާއިދުކުރާ މެމްބަރުންވަނީ ރިޒާއަށް ތުހުމަތުތަކެއް ކޮށްފައެވެ. އެގޮތުން އޭނާވަނީ ރައީސް ޔާމީން ހިންގެވި އަނިޔާވެރިކަމުގައި ބައިވެރިވެފައި ކަމަށެވެ. އެހެންނަމަވެސް ޕީޕީއެމްގެ މެމްބަރުންވަނީ އެކަން ދިފާޢުކޮށް ވާހަކަ ދައްކައިފިއެވެ.
މި މައްސަލާގައި ރިޒާއަށް ލިބިވަޑައިގެންނެވި ފުރުސަތުގައި އޭނާ ވިދާޅުވީ އެ ކޮމިޝަނުގައި އިންނަވައިގެން މަސައްކަތް ކުރައްވާފައިވަނީ އެންމެ އެކަށީގެންވާ ގޮތުގައި އިޚުލާސްތެރި ކަމާއެކު ކަމަށެވެ.
