ރައްޔިތުންގެ މަޖިލީހުގެ އައު ރައީސް މާމިގިލީ ދާއިރާގެ މެމްބަރު ޤާސިމް އިބްރާހީމް މަޖިލީހުގެ ރައީސަކަށް އިންތިޚާބު ކުރެއްވި ހިސާބުން ފެށިގެން ރައްޔިތުންގެ މަޖިލިސް ޕްރޮފެޝަނަލްކޮށް ހިނގާނެ ކަމުގެ އުންމީދު ބޮޑު ކަމަށް ތިމަރަފުށީ ދާއިރާގެ މެމްބަރު މުޙައްމަދު މުސްޠަފާ ވިދާޅުވެއްޖެއެވެ.
އޭނާ ކުރެއްވި ޓްވީޓެއްގައި ވިދާޅުވެފައިވަނީ ޤާސިމްގެ ދައުރު އެންމެ ވައްތަރުވަނީ މަޖިލީހުގެ ކުރީގެ ރައީސް ޢަބްދުﷲ ޝާހިދުގެ ރިޔާސަތުގެ ދަށުގައި ހިނގި 17 ވަނަ މަޖިލީހާ ކަމަށެވެ.
"ޤާސިމް އިބްރާހީމް މަޖިލީހުގެ ރައީސަކަށް އައްޔަންކުރި ހިސާބުން ޕްރޮފެޝަނަލް ރައްޔިތުންގެ މަޖިލީހެއް ހިންގަވާނެ ކަމުގެ އުންމީދު ބޮޑު. ލަފާ ކުރެވޭގޮތުގައި އެންމެ ވައްތަރުވަނީ ޢަބްދުﷲ ޝާހިދުގެ ސްޕީކަރ ކަމުގައި ހިނގި 17 ވަނަ މަޖިލިހާ،" މުސްޠަފާގެ ޓްވީޓުގައި ވިދާޅުވެފައިވެއެވެ.
ރައްޔިތުންގެ މަޖިލީހުގެ ރައީސަކަށް އެންމެ ފަހުން ހުންނެވި ޢަބްދުﷲ މަސީޙުގެ އިތުބާރުނެތް ކަމުގެ ވޯޓެއް ނެންގެވުމަށް ތިންވަނަ ފަހަރަށް މަޖިލީހަށް ވެއްދުމަށްފަހި ވޯޓަށް އެހުމަށް ޖަލްސާ ބާއްވަން ތައްޔާރުވެފައިވަނިކޮށް މަސީޙުވަނީ އިސްތިއުފާ ދެއްވައިފައެވެ.
މަޖިލީހުގެ ރައީސަކަށް ޤާސިމް އިންތިޚާބު ކުރެއްވީ އެފަހުންނެވެ. ޤާސިމް ރައީސަކަށް ވަޑައިގެންނެވީ 62 ވޯޓު ހޯއްދަވައިގެންނެވެ. ޤާސިމާ ވާދަކުރެއްވި ޕީޕީއެމްގެ ނާއިބު ލީޑަރު ފޮނަދޫ ދާއިރާގެ މެމްބަރަށް ލިބިވަޑައިގެންނެވީ 16 ވޯޓެވެ.
