ނާއިންސާފުން ފުލެޓުތައް ދީފައިވީނަމަވެސް އެތަންތަނުގައި ދިރިއުޅޭ މީހުން ނެރުމަށް ބޭނުންފުޅު ނުވާކަމަށް މިއަދު ދެއްކެވި ވާހަކަފުޅަކީ ހަމައެކަނި ދިއްދޫގައި ޢިމާރާތްކޮށްފައިވާ ފުލެޓުތަކުގެ ވާހަކަ ކަމަށް ރާއްޖޭގެ ކުރީގެ ރައީސް އަދި އެމްޑީޕީގެ ރައީސް މުޙައްމަދު ނަޝީދު ވިދާޅުވެއްޖެއެވެ.
ދިއްދުއަށް ކުރެއްވި އެއްދުވަހުގެ ދަތުރުފުޅުގައި އެމްޑީޕީ ސަޕޯޓަރުން ފުލެޓާބެހޭ ގޮތުން ކުރި ޝަކުވާއަށް ޖަވާބު ދެއްވަމުން ރައީސް ނަޝީދު ވިދާޅުވެފައިވަނީ ނުޙައްގުން ފުލެޓު ދީފައިވިޔަސް އެ މީހުން އެތަނުން ނެރުމަކީ އެމަނިކުފާނު އެދިވަޑައިގަންނަވާ ގޮތެއް ނޫންކަމަށެވެ. އޭގެ ބަދަލުގައި އެކަން ޙައްލުވާނީ އިތުރު ފުލެޓުތައް އަޅައިގެން ކަމަށް އެމަނިކުފާނު ވިދާޅުވިއެވެ.
އެމްޑީޕީ ސަޕޯޓަރުން ޤަބޫލުކުރާ ގޮތުގައި ފުލެޓު ދިނުމުގައި މިސަރުކާރުން ވަނީ މީހުންގެ ސިޔާސީ ފިކުރަށް ބަލައިފައެވެ. އެގޮތުން ޕީޕީއެމްގެ ފިކުރުގެ މީހުންނަށް ފުލެޓުދީފައިވާ ކަމުގެ ތުހުމަތު އެމްޑީޕީގެ ސަޕޯޓަރުންވަނީ މިސަރުކާރަށް ކޮށްފައެވެ.
ފުލެޓުތަކާ ބެހޭގޮތުން ނަޝީދު އެދެއްކެވި ވާހަކަފުޅު މީޑިއާގައި ޢާއްމުވުމުން އެމަނިކުފާނު މިރޭ ކުރެއްވި ޓްވީޓުގައި ވިދާޅުވީ އެމަނިކުފާނު ދެއްކެވީ ހުރިހާ ފުލެޓުތަކެއްގެ ވާހަކަނޫންކަމަށެވެ. އެމަނިކުފާނު ދެއްކެވީ ހަމައެކަނި ދިއްދޫގައި އަޅައިފައިވާ ފުލެޓުތަކުގެ ވާހަކައެކަނި ކަމަށް ވަނީ ވިދާޅުވެފައެވެ. އެއީ ހުޅުމާލޭގައި ބޭއިންސާފުން ދިނުމަށް ލިސްޓް ކުރެވިފައިވާ ފުލެޓްތަކެއް ނޫން،"ނަޝީދު" ވިދާޅުވެފައިވެއެވެ.
ހުޅުމާލޭގެ ދެވަނަ ފިޔަވަހީގައި 7000 ފުލެޓު އެޅުމުގެ މަޝްރޫޢެއް މިސަރުކާރުން ވަނީ ފަށްޓަވައިފައެވެ. އެފުލެޓު ދިނުމުގައި ވެސް ސަރުކާރުން ވަނީ ތަފާތުކުރުންތައް ގެންގުޅެފައި ކަމުގެ ޝަކުވާތައް ވަނީ އިތުރު ވެފައެވެ.
