ދިވެހިރާއްޖޭގެ ފަޚުރުވެރި ޤައުމީ ދުވަހުގެ މުނާޞަބަތާ ގުޅިގެން އެމްއެންޑީއެފްގެ ޑްރިލް ޑިސްޕްލޭ ތިލަންދުންމަތީ އުތުރުބުރީ އުތީމުގައި މިއަދު ބާއްވައިފިއެވެ.
އެމްއެންޑީއެފްގެ ފަރާތުން ބޭއްވި ޑްރިލް ޑިސްޕްލޭ ހަރަކާތް ކުރިއަށްގެންގޮސްފައިވަނީ މިއަދު ހަވީރު އުތީމު ބަނދަރު ސަރަޙައްދުގައެވެ. އަދި، ޤައުމީ ދުވަހާ ގުޅިގެން ހދ. ކުޅުދުއްފުށީގައި ވެސް މާދަމާ ހަވީރު 16:30 ގައި، އެރަށު ޒޯން ސްޓޭޑިއަމް ސަރަޙައްދުގައި، އެމްއެންޑީއެފްގެ ޑްރިލް ޑިސްޕްލޭގެ ހަރަކާތްތައް ބޭއްވުމަށް ވަނީ ހަމަޖެހިފައި ކަމަށް އެމްއެންޑީއެފުން ވިދާޅުވެފައިވެއެވެ.
އުތީމުގައި މިއަދު ބޭއްވި ޑްރިލް ޑިސްޕްލޭ ބަލާލުމަށް ގިނަ އަދަދެއްގެ މީހުން ޒިޔާރަތްކުރި ކަމަށް ވެސް އެމްއެންޑީއެފުން ވިދާޅުވިއެވެ. އެޙަރަކާތް ވެގެންދިޔައީ ވަރަށް ބޮޑު ތަރުޙީބެއް ޢާއްމުންގެ ފަރާތުން ލިބުނު ޙަރަކާތަކަށެވެ.
ދިވެހިރާއްޖޭގައި ފާހަގަކުރާ ޤައުމީ ދުވަސްތަކާ ގުޅިގެން ރާއްޖޭގެ އެކި ރަށްރަށުގައި އެމްއެންޑީއެފް ޑްރިލް ޑިސްޕްލޭ މީގެކުރިން ވެސް ހުށަހަޅައިދީފައިވެއެވެ.
