ދޫނިދޫ ޖަލުގައި މިހާރު ހުންނެވި ރާއްޖޭގެ ކުރީގެ ނާއިބު ރައީސް އަޙުމަދު އަދީބަށް ޑރ. ދެއްވައިފައިވާ ބާރުގަދަ ބޭހެއް ބޭނުން ކުރެއްވުމުން ވަރުބަލިވެ، ބޯ އަނބުރާ ކަމުގެ ޝަކުވާ އެމަނިކުފާނު ކުރައްވައިފިއެވެ.
އެމަނިކުފާނުގެ އަނބިކަނބަލުން މަރިޔަމް ނަޝްވާ ކުރައްވައިފައިވާ ޓްވީޓެއްގައި ވިދާޅުވެފައިވަނީ އެ ބޭސް ބޭނުންކުރެއްވުމުން ވަރުބަލިވެ، އަނބުރައިގަތުމުގެ ސަބަބުން އެމަނިކުފާނު ހުންނަވާ ގޮޅިއަށް ރޭ ވެއްޓި ވަޑައިނުގަތީ ކިރިޔާކަމަށް މިއަދު ގުޅުއްވާފައި އެމަނިކުފާނު ވިދާޅުވި ކަމަށެވެ.
އަދީބުގެ ޢާއިލައިން ކުރިން ބުނެފައިވަނީ އެކަށީގެންވާ ބޭސްފަރުވާ އެމަނިކުފާނަށް ލިބވަޑައި ނުގެން ޖަލުގައި ހުންނަވަން ޖެހިވަޑައިގެންނެވުމުން ޞިއްޙީގޮތުން ތަފާތު މައްސަލަތައް ދިމާވަމުންދާ ކަމަށެވެ. އެގޮތުން އެމަނިކުފާނުގެ އެތެރެހަށީގައި ސިސްޓެއް އުފެދިފައިވާ ކަމަށާއި، ކިޑްނީގައި ހިލަ އުފެދިފައިވާ ކަމަށް އާއިލާ އިން ކުރިން ވަނީ ބުނެފައެވެ. އޭގެ އިތުރަށް ލޮލަށްޖެހޭ ނުރައްކާތެރި ބައްޔެއް ކަމަށްވާ "ގުލްކޯމާ" ވެސް ޖެހިފައިވާ ކަމަށް އާއިލާ އިން ކުރިން ބުނެފައިވެއެވެ.
އެ މައްސަލަތަކަށް ފަރުވާ ހޯއްދެވުމަށް އެމަނިކުފާނު ރާއްޖެއިން ބޭރަށް ވަޑައިގެންނެވުމުގެ ހުއްދައަކަށް އަދީބުގެ ފަރާތްޕުޅުންވަނީ ކަމާބެހޭ ފަރާތްތަކުގައި އެދިވަޑައިގެންފައެވެ. އަދީބަށް ބޭސްފަރުވާ ކުރެއްވުމުގެ ފުރުސަތު ދެއްވުމަށް އިދިކޮޅު ފަރާތްތަކުންވެސް ގެންދަވަނީ ގޮވައިލައްވަމުންނެވެ. އެހެންނަމަވެސް އަދި ރާއްޖެއިން ބޭރަށް އެމަނިކުފާނު ފޮނުއްވައިފައެއް ނުވެއެވެ. އެމަނިކުފާނަށް ދިމާވެފައިވާ ޞީއްޙީ މައްސަލަތަކަށް ފަރުވާ ކުރައްވަމުން ގެންދަވަނީ ރާއްޖެއިންނެވެ.
އަދީބުގެ ޞިއްޙީ ޙާލުކޮޅޭ ބެހޭގޮތުން މާބޮޑު ތަފްސީލެއް މިފަހަކުން ލިބިފައެއް ނުވެއެވެ.
އަޙުމަދު އަދީބަކީ ތަފާތު މައްސަލަތަކެއްގެ ތުހުމަތުގައި ބަންދުކުރެވި އެކަންކަން ތަޙުޤީޤު ކުރެއްވުމަށްފަހު ޝަރީޢަތުން 33 އަހަރުގެ ޙުކުމެއް ކުރައްވައިފައިވާ ބޭފުޅެކެވެ.
