އެމަނިކުފާނު މަސައްކަތް ކުރައްވަނީ ދިވެހި ރައްޔިތުންނަށް ހިތްހަމަޖެހުން ގެނެސްދީ ސަރުކާރަށް އިތުރު ކުރިއެރުމާއި މަންފާ ލިބިގެންދާނެ ލުއިފަސޭހަ ގޮތަކަށް ކަމަށް ރައްޔިތުންގެ މަޖިލީހުގެ އައު ރައީސް މާމިގިލީ ދާއިރާގެ މަޖިލީސް މެމްބަރު ޤާސިމް އިބްރާހީމް ވިދާޅުވެއްޖެއެވެ.
ޤާސިމް މިހެން ވިދާޅުވީ މަޖިލީހުގެ ރައީސް ކަމަށް އެމަނިކުފާނު އިންތިޚާބު ކުރެއްވުމަށްފަހު މަޖިލީހުން ބޭރަށް ނުކުމެ ވަޑައިގެން ނޫސްވެރިންނާ ބައްދަލު ކުރައްވައި ދެއްކެވި ވާހަކަފުޅުގައެވެ.
"ﷲ ގެ ވާގިފުޅާއެކު ދިވެހިރައްޔިތުންނަށް ހިތްހަމަޖެހުން ގެނެސްދޭނެ ދުވަސްތަކާއި، ދިވެހި ސަރުކާރަށް އިތުރު ކުރިއެރުމާއި އިތުރު މަންފާ ލިބިގެންދާނެ ލުއިފަސޭހަ ގޮތެއްގައި އަޅުގަނޑު މަސައްކަތްކުރާނީ،" ޤާސިމް ވިދާޅުވިއެވެ.
އެމަނިކުފާނު ވިދާޅުވީ މަޖިލީހުގެ މެމްބަރުން މިރޭ ޙަވާލު ކުރެއްވީ ވަރަށްބޮޑު މަސައްކަތެއް ކަމަށެވެ. އެ މަސްއޫލިއްޔަތު އަދާކުރެއްވުމުގައު ވަފާތެރި ކަމާއި އިޚުލާސްތެރި ކަމާއެކު މަސައްކަތް ކުރައްވާނެ ކަމަށެވެ.
"އަޅުގަނޑާ ރައްޔިތުންގެ މަޖިލީހުގެ ޢިއްޒަތްތެރި މެމްބަރުން މިޙަވާލު ކުރެއްވީ ވަރަށްބޮޑު މަސްއޫލިއްޔަތެއް. އެ މަސްއޫލިއްޔަތު އަދާކުރުމުގައި އަޅުގަނޑު އިރާދަ ކުރެއްވިއްޔާ ވަފާތެރިކަމާއި އިޚްލާސްތެރިކަމާއެކު މަސައްކަތް ކުރާނީ ދިވެހިރާއްޖޭގެ ޤާނޫނު އަސާސީއަށާއި އިސްލާމްދީނަށާއި، އަދި ޤައުމުގެ ރައްޔިތުންނަށް މަންފާ ލިބެނިވިހެން،" ޤާސިމް ވިދާޅުވިއެވެ.
އެ މަސްއޫލިއްޔަތު އަދާކުރުމުގައި ދިވެހި ދައުލަތާއި ސަރުކާރަށް އިޚްލާސްތެރިވެ ވަޑައިގަންނަވާނެ ކަމަށް ވެސް ޤާސިމް ވިދާޅުވިއެވެ. ޤާސިމް ވިދާޅުވީ ދިވެހިރާއްޖޭގެ އެންމެހާ ލޮބުވެތި ރައްޔިތުން ބޭނުންވެފައިވާ ޑިމޮކްރަޓިކް ޙަޔާތެއް ގެނެސްދިނުމުގައި ވޭތުވެދިޔަ ތަނުގައި ފެނިގެން ދިޔަކަލަ ނާއުންމީދީ އެއްވެސް ކަމެއް ރައްޔިތުންނާ ހަމައަށް ނާންނާނެ ގޮތުގައި މަސައްކަތް ކުރައްވާނެ ކަމަށެވެ. އެ މަސައްކަތް ކުރައްވާނީ މަޖިލީހުގެ ޤަވާޢިދާއި ޤާނޫނު ޢަސާސީއާއި އަދި ޤާނޫނުގެ އިމުގެ ތެރޭގައި ކަމަށް ވެސް ޤާސިމް ވިދާޅުވއެވެ.
