ސިނަމާލެ ބުރިޖު ހުރަސްކޮށް މާލެއިން ހުޅުމާލެއަށް ދާންދިޔަ ވޭނެއް ކޮންޓްރޯލް ނުވެގޮސް ފެންސްގައި ޖެހި އެކްސިޑެންޓެއް ވެއްޖެއެވެ.
މިއަދު ހެނދުނު މިހާދިސާ ހިނގިއިރު ވޭން ދުއްވަން އިނީ ބިދޭސީ ފިރިހެނެކެވެ. މި އެކްސިޑެންޓުގައި އޭނާއަށްވަނީ އެކިވަރުގެ އަނިޔާ ވެފައެވެ. އެކްސިޑެންޓަށްފަހު ހުޅުމާލެ ހޮސްޕިޓަލުން އޭނާއަށް ފަރުވާދީފައިވެއެވެ.
މިއަދު ހެނދުނު " 6:00 އެހައިކަންހާއިރު މާލެއިން ހުޅުމާލެއަށް ދުއްވާފައިދިޔަ ވޭނެއް ހައިވޭ ދެ ކަފިވާ ހިސާބުން ކޮންޓްރޯލް ނުވެގޮސް އަރިމަތީ ފެންސްގައި ޖެހި ނުރައްކާތެރި އެކްސިޑެންޓެއް ހިނގާފައިވޭ،" އެކްސިޑެންޓާ ބެހޭ ގޮތުން ފުލުހުން ވިދާޅުވެފައިވެއެވެ.
އެކްސިޑެންޓުގައި އަނިޔާވި ބިދޭސީމީހާ އަށް އެކިވަރުގެ އަނިޔާ ވެފައިވާ ކަމަށާއި އިތުރުފަރުވާއަށް އޭނާ މިހާރުވަނީ އައިޖީއެމް ހޮސްޕިޓަލަށް ބަދަލުކޮށްފައި ކަމަށް ހުޅުމާލެ ހޮސްޕިޓަލް ހިންގާ އާސަންދަ ކުންފުނިން ވިދާޅުވިއެވެ.
ސިނަމާލެ ބުރިޖު ހުޅުވިފަހުން އެތަނުގައި އެކްސިޑެންޓު ހިނގުން ވަނީ އިތުރުވެފައެވެ. އެކްސިޑެންޓުތަކުހައި މީހުންނަށް ބޮޑެތި އަނިޔާވަމުންދާ ކަމަށް ވަނީ ފާހަގަ ވެފައެވެ.
