ހިތަދޫ ރީޖަނަލް ހޮސްޕިޓަލް (އެޗުއާރުއެޗު) ގައި ކަކުލުހުޅު ބަދަލު ކުރުމުގެ ފުރަތަމަ އޮޕަރޭޝަން ކާމިޔާބު ކަމާއެކު މިއަދު ކޮށްފިއެވެ.
މިއީ މާލެ ފިޔަވައި ރާއްޖޭގެ އެހެން ރަށެއްގައި މިފަދަ އޮޕަރޭޝަނެއް ކުރެއްވި ފުރަތަމަ ފަހަރެވެ. މި އޮޕަރޭޝަންގައި ބައިވެރިވެ ވަޑައިގެންނެވި އެއްބޭފުޅެއް ކަމަށްވާ ޑރ. ހަބީބު ވިދާޅުވީ މިއީ ވަރަށް ކާމިޔާބު އޮޕަރޭޝަނެއް ކަމަށެވެ.
މިއަދު އޮޕަރޭޝަންކޮށްފައިވަނީ އުމުރުން 76 އަހަރުގެ އަންހެނެއްގެ ފައެވެ. ހިތަދުއަށް ނިސްބަތްވާ އެމީހާގެ އެއްފައިގެ ކަކުލު ހުޅު ބަދަލުކުރި މި އޮޕަރޭޝަނުގައި އިސްކޮށް ހުންނެވީ އައިޖީއެމްއެޗުގެ ކަށީގެ ޑިޕާޓްމެންޓްގެ ވެރިޔާ އަދި ކަށީގެ މަޝްހޫރު ޑޮކްޓަރު ޢަލީ މުޒުނީއެވެ. އޭނާއަކީ އައްޑުއަށް ނިސްބަތްވެ ވަޑައިގަންނަވާ ބޭފުޅެކެވެ. އެ ޓީމުގައި ދެން ވެސް ހިމެނި ވަޑައިގެންނެވީ އައްޑުއަށް ނިސްބަތްވެ ވަޑައިގަންނަވާ ދެބޭފުޅުންނެވެ. އެއީ ރާއްޖޭގައި ފުރަތަމަ ކަށީގެ ޑޮކްޓަރު އަދި މިފަދަ އޮޕަރޭޝަނެއް ރާއްޖޭގައި ފުރަތަމަ ކުރަންފެށި ޑރ. މުޙައްމަދު ޙަބީބާއި، ޑރ. ޙުސައިން ފައިޞަލް އެވެ. އެބޭފުޅުންނާއެކު ޓެކްނީޝަނެއްގެ ގޮތުގައި ބައިވެރިވެ ވަޑައިގެންނެވީ ޢަބްދުﷲ ރާފިޢުއެވެ.
މި އަންހެންމީހާގެ އެއްފައިގެ ކަކުލު ހުޅު ބަދަލުކުރިޔަސް ދެވަނަފައިގެ ހުޅުވެސް ވަނީ ބަދަލު ކުރަންވެފައެވެ. އެފައިގެ އޮޕަރޭޝަން ދޮޅު މަހެއްހާ ދުވަސްތެރޭ ކުރާގޮތަށް ވެސް ވަނީ ހަމަޖެހިފައެވެ.
މަޢުލޫމާތު ލިބިފައިވާ ގޮތުގައި މި އޮޕަރޭޝަން ކުރަން ފަށައިފައިވަނީ މިއަދު ހެނދުނު 10:30 ގައެވެ. ނިންމައިލެވުނީ މެންދުރު ފަހު އެކެއްޖަހާ އެހައިންކަންހާއިރު ކަމަށް ވެސް މަޢުލޫމާތު ލިބިފައިވެއެވެ. މިފަދަ އޮޕަރޭޝަނެއް ކުރެއްވުމަށް ޑރ. މުޒުނީ އާންމުކޮށް ހޭދަ ކުރައްވަނީ އެއްގަޑި ސާޅީސް ފަސް މިނިޓް ކަމަށް ވެސް މަޢުލޫމާތު ލިބިފައިވެއެވެ.
މި އޮޕަރޭޝަނުގައި ބައިވެރިވެ ވަޑައިގެންނެވި ޑރ. ޙަބީބު ވިދާޅުވީ ކަކުލު ހުޅުގެ އޮޕަރޭޝަން ކުރާނީ ބޭސްދީގެން ވެސް އެއްވެސް ގޮތެއް ނުވެ މީހާއަށް ނޫޅެވޭ ހިސާބަށް ދިޔުމުން ކަމަށެވެ.
ކުރިއަށްއޮތް 18 މަސް ދުވަހަށް ޑރ. މުޒުނީގެ އެޕޮއިންޓްމަންޓްތައް ވަނީ ފުލްވެފައި ކަމަށް ވެސް މަޢުލޫމާތު ލިބިފައިވެއެވެ. އޭގެ ތެރޭގައި ގިނައީ ކަކުލުގެ ހުޅުބަދަލު ކުރުންފަދަ އޮޕަރޭޝަންތައް ކަމަށް ވެސް އެނގިފައިވެއެވެ.
ޑރ. ޙަބީބު ވިދާޅުވީ މުޒުނީ މަސައްކަތް ކުރައްވަނީ ރީޖަނަލް ހޮސްޕިޓަލްތަކުގައި މި އޮޕަރޭޝަންތައް (ދޭތެރެ ދޭތެރެއިން) ކުރެއްވުމަށްކަން އެނޑިވަޑައިގެންފައިވާ ކަމަށެވެ.
މިއަދުގެ އޮޕަރޭޝަން ކޮށްފައިވަނީ އެކަމަށް ބޭނުންވާ ސާމާނު އައިޖީއެމްއެޗުން ގެނެސްގެންނެވެ.
