އިއްޔެ ބްރެޒިލްގައި ބޭއްުވުނު ރިޔާސީ އިންތިޚާބުގެ ދެވަނަ ބުރު ކަނާތު ފިޔައިގެ ކެންޑިޑޭޓް ޖައިރް ބޮލްސޮނާރޯ ކާމިޔާބުކުރައްވައިފިއެވެ. އޭނާ ކާމިޔާބީ ގުޅިންގެން ދެއްކެވި ވާހަކަފުޅުގައި އޭނާ ވިދާޅުވީ ގާނޫނު އަސާސީއާއި، ޑިމޮކްރަސީއާއި، މިނިވަންކަން ދިފާއުކުރައްވާނެ ކަމަށާއި، "އެންމެން ގުޅިގެން ބްރެޒިލްގެ މުސްތަގުބަލު ބަދަލުކުރާނެ" ކަމުގައެވެ.
މި ވަގުތާއި ހަމައަށް (މާލޭ ގަޑިން ހެނދުނު 6:10) ވޯޓުގެ %94 ގުނާ ނިމިފައިވާއިރު، އުމުރުފުޅުން 63 އަހަރުގެ ބޮލްސޮނާރޯ ވަނީ ވޯޓުގެ %55.5 ހޯއްދަވާފައެވެ. އޭނާއާއި ވާދަކުރެއްވި ކަނާތުފިޔައިގެ ފެނާންޑޯ ހައްދާދަށް ލިބިވަޑައިގަތީ ވޯޓުގެ %44.5 އެވެ.
ބަޑިގެންގުޅުން ހުއްދަކުރުމަށާއި، ގައިދީންނަށް ޖަލުގައި އަދަބުދީގެން އެއްބަސްްކުރުވުމަށް ތާއީދުކުރުއްވާ ބޮލްސޮނާރޯގެ އިންތިޚާބީ ވައުދުތަކުގެ ތެރޭގައި ކޮރަޕްޝަން ނައްތާލުމާއި، ޖަރީމާތައް މަދުކުރުން ހިމެނެއެވެ.
ސިފައިންގެ ކެޕްޓަނެއްގެ ގޮތުގައި ކުރިން މަސައްކަތްކުރެއްވި ބޮލްސޮނާރޯ އިންތިޚާބު ކާމިޔާބުކުރެއްވުމަށް ފޭސްބުކް ލައިވް މެދުވެރިކޮށް އާއްމު ރައްޔިތުންނާ މުޚާޠަބުކުރެއްވި އިރުވެސް އޭނާގެ ރާގުގައި ހުރީ އަސްކަރީ ގޮތް ކަމަށް ގިނަ ބަޔަކު ދެކެއެވެ. އޭނާ ވިދާޅުވީ އޭނާ ވެރިކަން ކުރައްވާނީ ވަކި ޕާޓީއެެއްގެ ނުވަަތަ ވަކި މީހެއްގެ ވެރިކަން ނޫންކަމަށާއި، ވެރިކަން ކުރައްވާނީ "މުޤައްދަސް ފޮތާއި، ގާނޫނު އަސާސީއަށް ތަބައަވެގެން" ކަމަށެވެ.
"މިއީ ޕާޓީއަކުން ވާ ވައުދެއް ނޫން. އަދި މީހަކު ދައްކާ ވާހަކައެއްވެސް. މިއީ ކަލާނގެ ކުރިފުޅުމަތީގައި ކުރާ ހުވައެއް." ބޮލްސޮނާރޯ ވިދާޅުވިއެވެ.
1964 އިން 1985 އަށް ބްރެޒިލްގައި އޮތް އަސްކަރީ ޚުދްމުޚްތާރު ވެރިކަމަށް ތާއީދުކުރައްވާ ބޮލްސޮނާރޯގެ އެންމެ ބޮޑެ ކެމްޕޭން ވައުދަކަށް ހައްދަވާފައި ވަނީ ބްރެޒިލްގައި ހަައްދުން ނައްޓާފައިވާ ޖަރީމާތައް ހުއްޓުވުމެވެ. ފާއިތުވި އަހަރު އެކަނިވެސް ބްރެޒިލްގައި ގާތްގަނޑަކަށް 64 ހާސް މީހުން މަރާފައި ވެއެވެ. އޭނާ ވަނީ އަމިއްލަ ދިފާއުގައި ބަޑިގެންގުޅުމުގެ ހުއްދަދޭ މިންވަރު އިތުރުކުރެއްވުމަށާއި، މުުޖުރިމުންނާއި ކުރިމަތިލުމުގައި މީހުން މެރުމުގެ އިޚްތިޔާރު ފުލުހުންނަށް ދެއްވާނެކަމަށް ވައުދުވެވަޑައިގެންފައެވެ.
އިޓަލީއަށް ނިސްބަތްވާ އާއިލާއަކަށް 1955 ވަނަ އަހަރު ސައޮޕާއުލޯއަށް އުފަންވެވަޑައިގަތް ޖައިރް ބޮލްސޮނާރޯ ވަނީ 1971 އިން 1988 އަށް ސިފައިންގެ ތެރޭގައި ޚިދުމަތްކުރައްވާފައެވެ. ކްރިސްޓިއަން ޑިމޮކްރެޓިކް ޕާޓީގެ ފަރާތުން 1990 ވަނަ އަހަރު ރިއޯޑި ޖެނީރޯގެ ކައުންސިލަރަކަށް ހޮވިވަޑައިގަތް ބޮލްސޮނާރޯ ވަނީ ހަމަ އެޕާޓީގެ ފަރާތުން 1991 ވަނަ އަހަރު ބްރެޒިލްގެ ގާނޫނު ހަދަާ މަޖިލީހުގެ މެންބަރުކަމަށް ހޮވިވަޑައިގެންފައެެވެ. މިހާރުވެސް އޭނާއަކީ މެންބަރެކެވެ.
ސޯޝަލް ލިބަރަލް ޕާޓީގެ ކެންޑިޑޭޓެއްގެ ގޮތުގައި ވާދަކުރައްވައި ރިޔާސީ އިންތިޚާބު ކާމިޔުާބުކުރެއްވި ބޮލްސޮނާރޯ ރައީސުކަމުގެ ހުވައި ކުރައްވާނީ 1 ޖަނަވަރީ 2019 ގައެވެ.
