ކުރީގެ ރައީސް މުޙައްމަދު ނަޝީދުގެ މައްޗަށް ކްރިމިނަލް ކޯޓުން ކުރައްވައިފައިވާ 13 އަހަރުގެ ޖަލު ޙުކުމް ރިވިއު ކޮށްދެއްވުމަށްއެދި ޕްރޮސެކިޔުޓަރޖެނެރަލް (ޕީޖީ) ސްޕްރީމް ކޯޓުގައި އެދިވަޑައިގެންފިއެވެ.
ޕޖީ ސްޕްރީމްކޯޓުގައި މިކަމަށް އެދިވަޑައިގެންނެވީ ރައީސް ނަޝީދު މިނިވަން ކޮށްދެއްވުމަށް އެދި ރައްޔިތުންގެ މަޖިލީހަށް ޤަރާރެއް ވެސް ހުށަހަޅުއްވައިފައިވަނިކޮށްނެވެ. ރައީސް ނަޝީދުގެ މައްޗަށް 13 އަހަރުގެ ޖަލުޙުކުމެއް އައިސްފައިވަނީ ޤާނޫނާ ޚިލާފަށް ޤާޒީއަކު ބަންދުކުރި މައްސަލައެއްގައެވެ.
ރައީސް ނަޝީދުގެ މައްސަލަ ރިވިއު ކޮށްދެއްވުމަށް އެދި ޕީޖީ ސްޕްރީމްކޯޓުގައި މިއަދު އެދިވަޑައިގެންނެވުމުން އެކަމަށް ކޯޓުން ޢަމަލު ކުރައްވައިފައިވަނީ ކިހިނެއްކަމެއް އަދި ކަށަވަރުވެފައެއް ނުވެއެވެ.
ރައީސް ނަޝީދު މިނިވަން ކުރައްވަން ރައްޔިތުންގެ މަޖިލީހަށް ހުށަހަޅުއްވައިފައިވާ ޤަރާރާބެހޭ ގޮތުން މަޝްހޫރު ޤާނޫނީ ވަކީލް އަދި ކުރީގެ ޑެޕިޔުޓީ ޕްރޮސެކިޔުޓަރ ޖެނެރަލް ޙުސައިން ޝަމީމް ވިދާޅުވީ މަޖިލީހުން ފާސްކުރަން ޖެހޭނީ އެމައްސަލަ ޕީޖީއަށް ހުށަހަޅައި ޕީޖީމެދުވެރިކޮށް ކޯޓަށް ހުށަހަޅުއްވާ ގޮތަށް ކަމަށެވެ. އެހެންނަމަވެސް އެކަން ހިނގައިދިޔައީ އެގޮތަށް ކަމެއް ވެސް އަދި ސާފެއްނުވެއެވެ.
ޝަމީމް ވިދާޅުވީ ރައީސް ނަޝީދު މިނިވަން ކުރެއްވުމާމެދު މަޖިލީހުން ނިންމާގޮތެއް ޕްރޮސެކިޔުޓަރޖެނެރަލް އަށް ހުށަހަޅައިގެން އޭގައި ހުރި ޤާނޫނީ ސަބަބުތައް ރަނގަޅުތޯ ބެއްލެވުމަށްފަހު އެކަށީގެންވާ ސަބަބުތަކެއް ވާކަމަށް ޕީޖީއަށް ޤަބޫލުކުރެއްވޭ ކަމަށްވާނަމަ އެ މައްސަލަ ކޯޓަށް ހުށަހެޅުއްވިދާނެ ކަމަށެވެ.
"އެކަމަކު ޕީޖީއަށް ލާޒިމެއް ނުވާނެ މަޖިލީހުން ބުނާގޮތެއް ހަދާކަށް. ނަމަވެސް މަޖިލީހުގެ ނިންމުން ޕީޖީއަށް ޤަބޫލު ކުރެވެންޏާ ހުށަހެޅިދާނެ ސްޕްރީމް ކޯޓަށް،" ޝަމީމް ވިދާޅުވިއެވެ.
