މިޔަންމާގައި ރޮހިންޖާ މުސްލިމުންނާ ދެކޮޅަށް ކުރިއަށްދާ ނަސްލުނައްތާލުމުގެ މަސައްކަތް އަދިވެސް ނުހުއްޓޭކަަމަށް އެކުވެރި ދައުލަތްތައް (އދ) ގެ ރިޕޯޓެއްގައި ބުނެފިއެވެ.
މިިކަން ހާމަކޮށްފައި ވަނީ ހަގީގަތް ހޯދަން އދ. ން މިޔަންމާއަށް ފޮނުވި ވަފުދު އެެނބުރި އައިސް އިއްޔެ ސަލާމަތީ މަޖިލީހަށް ހުށަހެޅި ރިޕޯޓުގައެވެ.
ނޫސްވެރިންނަށް މައުލޫމާތުދެއްވަމުން އދ. ން މިޔަންމާއަށް ފޮނުވި ޔޫއެން ފެކްޓް ފައިންޑިންގ މިޝަން އޮން މިޔަންމާ ގެ ޗެއާމަން މަރްޒޫކީ ދަރުސްމަން ވިދާޅުވީ ގިނަ ބަޔަކު އެއްެފަހަރާ މަރާލުމުގެ އިތުރަށް، ގެދޮރުން ބޭރުކޮށްލުމާ، މުޖުތަމައުން އެކަހެރިކުރުމާ، ކުދިން ނުލިބޭ ގޮތް ހެދުމާ، ކޭމްޕްތަކުގެ އުޅެން މަޖުބޫރުކުރުން ފަދަ އަމަލުތައް ރޮހިންޖާ މުސްލިމުންނާ ދެކޮޅަށް ދަނީ ހިންގަމުންނެވެ.
"މިއީ މެދުނުކެނޑި ކުރިއަށްދާ ނަސްލުނަައްތާލުމުގެ މަސައްކަތެއް" ދަރުސްމަން ވިދާޅުވިއެވެ.
"އަހަރުމެން ދެކެނީ މިކަން ކުރެވޭ އެ މަގުސަދުގައި ކަމަށް ބެލޭނެ ސަބަބުތައް އެބަހުރިކަމަށް" ރަޝިޔާއާއި ޗައިނާގެ ދެކޮޅުހެދުމާއެކުވެސް ކުރިއަށް ދިޔަ އދ. ގެ ސަލާމަތީ މަޖިލީހުގެ ބައްދަލުވުމަށް ރިޕޯޓު ހުށަހެޅުއްވުމަށްފަހު ދަރުސްމަން ވިދާޅުވިއެވެ.
މިޔަންމާގެ މައްސަލަ ބައިނަލްއަގްވާމީ ޖިނާއީ ކޯޓު (އިންޓަނޭޝަލަން ކްރިމިނަލް ކޯޓް- އައިސީސީ) އަށް ހުށަހެޅުމަށް، ނުވަތަ ކުރީގެ ޔޫގޯސްލޭވިޔާގެ މައްސަލަތައް ތަހުގީގުކުރުމަށް އުފެއްދި އިންޓަނޭޝަނަލް ކްރިމިނަލް ޓްރައިިބިއުނަލެއް އުފައްދައިގެން މިޔަންމާގެ މައްސަލަ ބެލުމަށް، 444 ސަފްހާގެ މައްޗަށް އެކުލެވޭ ރިޕޯޓުގައި ގޮވާލާފައި ވެއެވެ.
ރިޕޯޓުގައި އިތުރަށް ބުނެފައިވާ ގޮތުގައި މިޔަންމާ ސިފައިންގެ ކޮމާންޑާ އިން ޗީފް މިން އާންގް ހްލައިންގް ހިމެނޭހެން، މިޔަންމާ ސިފައިންގެ ކޮމާންޑަރުންގެ މައްޗަށް ރަކާއިން ސްޓޭޓުގައި ނަސްލުނައްތާލުމުގެ ކުށުގައި ދައުވާ އުފުލަންޖެހެއެވެ.
7 ލައްކަ 20 ހާސް ރޮހިންޖާ މުސްލިމުން ބަންގްލަދޭޝްއަސް ހިޖުރަކުރަން މަޖުބޫރުކުރި އަނިޔާވެރި އަލަމުތަކަށް މިޔަންމާ ސަރުކާރުން އިންކާރުކުރެއެވެ.
ދަރުސްމާން ވިދާޅުވި ގޮތުގައި މިޔަންމާގެ އަސްކަރިއްޔާއިން ހިންގި ލާއިންސާނީ އަމަލުތަަކުގެ ސަބަބުން މުސްލިމުން ދިރިއުޅެމުން ދިޔަ 390 އަވަށެއް ސުންނާފަތިވެ، 10 ހާސް މީހުން މަރުވެފައި ވެއެވެ.
