އިނގިރޭސީންގެ ހިމާޔަތް ހޯއްދަވައިގެން އިނގިރޭސިވިލާތުގައި އުޅުއްވަމުން ގެންދަވާ ރާއްޖޭގެ ކުރީގެ ރައީސް މުހައްމަދު ނަޝީދު އިނގިރޭސިވިލާތުން ސްރީލަންކާއަށް މިއަދު ވަޑައިގެންފިއެވެ.
އެމަނިކުފާނު އިނގިރޭސީވިލާތުގައި އުޅުއްވިޔަސް ވަރަށްގިނައިން ސްރީލަންކާއަށް ވަޑައިގަންނަވައެވެ. އެވަޑައިގަންނަވާފަހަރުތަކުގައި އެގައުމުގައި އުޅޭ ދިވެހިންނާ ވެސް އެމަނިކުފާނު ބައްދަލު ކުރައްވަފައެވެ. ސައުދީ ރަސްގެފާނުގެ ދައުވަތަކަށް ވަރަށްފަހުން އެމަނިކުފާނުވަނީ ދައުދީއަށް ވެސް ވަޑައިގެންފައެވެ.
ރައީސް ނަޝީދު ލަންކާއަށް ވަޑައިގެންނެވީ އަންނަ މަހު އެކެއްގައި އެމަނިކުފާނު ރާއްޖެ ވަޑައިގަންނަވާނެ ކަމަށް ވިދާޅުވެފައިވާ ވަގުތެއްގައެވެ. އެމަނިކުފާނު ނޮވެމްބަރ އެކެއްގައި ރާއްޖެއަށް ވަޑައިގެންނެވުމަށްފަހު ތިނެއްގައި އައްޑުއަށް ވަޑައިގަންނަވާގޮތަށް ވެސް ވަނީ ހަމަޖެހިފައި ކަމަށް މައުލޫމާތު ލިބިފައިވެއެވެ. އެމަނިކުފާނު އައްޑުއަށް ވަޑައިގަންނަވާތީ އެމަނިކުފާނާ ބައްދަލު ކުރެއްވުމަށް ބޭނުންވާ ކައިރިއަތޮޅުތަކުގެ މީހުން އައްޑުއަށް ދިޔުމަށް ތައްޔާރުވަމުންދާ ކަމަށް މައުލޫމާތު ލިބިފައިވެއެވެ.
ރައީސް ނަޝީދަކީ ގާޒީއަކު ބަންދުކުރި ކަމުގެ މައްސަލައެއްގައި 13 އަހަރުގެ ޖަލު ހުކުމެއް ތަންފީޒު ކުރައްވަމުން ގެންދަވާ ބޭފުޅެކެވެ. ބޭސްފަރުވާއަށް އިނގިރޭސީވިލާތަށް ވަޑައިގެންނެވުމަށްފަހު އެގައުމުން ހިމާޔަތް ހޯއްދަވައިގެން އެމަނިކުފާނު އުޅުއްވަނީ އެ ގައުމުގައެވެ.
