ތުރުކީގެ ރައީސު ރަޖަބް ޠައްޔިބު އެރްދޮޣާން މި އޮކްޓޯބަރު މަހު 27 ވަނަ ދުވަހު ފްރާންސް، ޖަރުމަނު އަދި ރަޝިޔާގެ އެންެމެ އިސް ވެެރިންނާއެކު ބައްދަލުވުމެއް ބާއްވަވާނެކަމުގައި އޭނާގެ ތަރުޖަމާނު ހާމަކުރައްވައިފިއެވެ.
އެންމެ އިސްވެރިންގެ މި ބައްދަލުވުމުގައި ރައީސު އެރްދޮޣާންގެ އިތުރަށް ފަރަންސޭސި ރައީސު އިމާނުއެލް މެކްރޯންއާއި ޖަރުމަނުގެ ޗާންސެލާ އެންޖެލާ މާކެލްއާއި ރަޝިޔާގެ ރައީސު ވްލާޑިމީރް ޕުޓިން ބައިވެރިވެވަޑައިގަންނަވާނެކަމުގައި، ތުރުކީގެ ރަސްމީ ނިއުސް އެޖެންސީ އަނަޑޮލޫއަށް މައުލޫމާތު ދެއްވަމުން، ރައީސު އެރްދޮޣާންގެ ތަރުޖަމާނު އިބްރާހީމް ކާލިން ވިދާޅުވިއެވެ.
އެރްދޮޣާން ކުރިން މަސައްކަތްޕުޅު ކުރެއްވީ އެ ބައްދަލުވުން ސެޕްޓެންބަރު މަހުގެ ތެރޭގައި ބޭއްވެވުމަށެވެ. އެހެންނަމަވެސް، އެކަން ކުރެއްވޭ ގޮތް ނުވީއެވެ.
ކާލިން ހަމާކުރެއްވި ގޮތުގައި އެ ބައްދަލުވުމުގައި ސީރިޔާގެ މައްސަލައަށް ދާއިމީ ހައްލެއް ހޯދުމަށް މަސައްކަތްކުރުމުގެ އިތުރަށް، އިދިކޮޅު ހަނގުރާމަވެރިންގެ ބާރުގެ ދަށުގައި އޮތް އިދްލިބުގެ ހާލަތާމެދު ވެސް ވާހަކަދައްކާނެއެވެ.
ސީރިޔާގެ ސަރުކާރު ދިފާއުކުރައްވާ ރައީސު ޕުޓިންްއާ އިދިކޮޅު ފަރާތްތަކަށް ތާއީދުކުރައްވާ ރައީސު އެރްދޮޣާން ވަނީ، 3 މިލިއަން މީހުންގެ އާބާދިއެެއް އޮންނަ އިދްލިބުގެ ވަށައިގެން، ހަނގުރާމަވެރި ހަތިޔާރު ނުގެންގުޅޭ ސަރަހައްދެއް ގާއިމުކުރުމަށް ފާއިތުވި ސެޕްޓެންބަރު މަހުގެ 17 ވަނަ ދުވަހު އެއްބަސްވުމެއް އެކުލަވާލައްވާފައެވެ.
15-20 ކިލޯމީޓަރު ފުޅާ މި ސަރަހައްދު ގާއިމުކުރެވުނީ، ސީރިޔާ ސަރުކާރު ސިފައިން އިދްލިބަށް ހަމަލާދީފިނަމަ އެތައް މިލިއަން ރެފިއުޖީންނެއް އަނެއްކާވެސް ތުރުކީގެ ތެރެއަށް ވަންނާނެތީ، އެކަން ހުއްޓުވުމަށް އެރްދޮޣާންކުރެއްވި ބުރު މަސައްކަތުގެ ސަބަބުންނެވެ.
ހަނގުރާމައިގައި ވާދަވެރި ދެ ފަރާތަަށް ތާއީދުކުރި ނަމަވެސް ތުރުކީއާއި ރަޝިޔާއަކީ ސީރިޔާގެ ހަނގުރާމައަށް ދާއިމީ ހައްލެއް ގެނައުމަށާއި، އެކި ފަހަރު މަތިން ސީރިޔާގެ އެކި ހިސާބުތަކުގައި ވަގުތީ ހަނގުރާމަ ހުއްޓުމާއި، ވަގުތީ ސުލްހަ ގާއިމުކުރުމުގައި ގުޅިގެން މަސައްކަތްކުރާ ދެގައުމެވެ. މިކަމުގެ ސަބަބުން ހަނގުރާމައިގެ ސަބަބުން އާއްމުންނަށް ލިބޭ ގެއްލުން ކޮންމެވެސް ވަރަށް ކުޑަވެފައިވާކަން ފާހަގަކުރެވެއެވެ.
