އެޗުޑީސީގެ މުދާތަކެއް ދޯންޏަކަށް އަރުވައިގެން ގެންދަން އުޅުނު މައްސަލައިގައި މިހާތަނަށް އެއްވެސް މީހަކު ބަންދުކޮށްފައިނުވާ ކަމަށް ފުލުހުން ވިދާޅުވެއްޖެއެވެ.
ފުލުހުންގެ މީޑިއާއިން ވިދާޅުވީ އެ މައްސަލަ މިހާރު ގެންދަނީ ތަހުގީގުކުރަމުން ކަމަށެވެ. "އަޅުގަނޑުމެން މިގެންދަނީ އެ މައްސަލަ ތަހުގީގު ކުރަމުން. އެހެންނަމަ ވެސް އެކަމާ ގުޅިގެން މިހާތަނަށް އެއްވެސް މީހަކު ބަންދު ކޮށްފައެއް ނުވޭ،" ޕޮލިސް މީޑިއާއިން ވިދާޅުވިއެވެ.
އެޗުޑިސީގެ މުދާތަކުގެ ތެރޭގައި ހިމެނޭ ދަގަނޑު ހޮޅިތަކެއް ދޯންޏަކަށް އަރުވައިގެން ހުޅުމާލެއިން ބޭރުކުރަން އުޅުނީ އެޗުޑީސީގެ މުވައްޒަފުން ތަކެކެވެ. އެމީހުންނަށް އެ ނުގެންދެވެނީސް ފުލުހުންނާއި އެޗުޑީސީ ގުޅިގެން ވަނީ އެކަން ހުއްޓުވައި މައްސަލައިގެ ތަހުގީގު ފަށައިފައެވެ. އެ މީހުން އެއްޗެހި ގެންދަން އުޅުނީ އިއްޔެ ހަވީރުއެވެ.
މި ހޮޅިތަކަކީ ރައީސް ޔާމީންގެ ކެމްޕޭނަށް ބޭނުންކުރި ހޮޅިތަކެކެވެ. އެ ތަކެތި ބޭނުން ކުރުމަށްފަހު އެޗުޑީސީއާ ހަވާލު ކުރުމެއްނެތި ދޯންޏަކަށް އަރުވައިގެން ގެންދަން އުޅުނު ކަމުގެ މައުލޫމާތު އެޗުޑީސީއަށް ދީފައިވަނީ އާންމު ފަރާތަކުންނެވެ. އެ މީހުން ގެންދަން އުޅުނީ ކިތައް ހޮޅިކަމެއް އަދި ކަށަވަރު ވެފައެއް ނުވެއެވެ.
ފުލުހުންގެ އިތުރަށް އެޗުޑީސީން މިހާރުވަނީ މިކަމާ ގުޅިގެން އިންޓަރނަލް ތަހުގީގެއް ކުރުމަށްފަށައިފައެވެ. އޭގެ އިތުރަށް އޮޑިޓް އޮފީހުން ވެސް މިހާރު ވަނީ އެޗުޑީސީގެ އޮޑިޓެއް ކުރުމަށެވެ.
