ތ. ވިލުފުށިން ފުރައިގެން ވޭމަންޑޫއަށް ދަތުކުރަމުންދިޔަ ލޯންޗެސް ބަންޑުން ޖަހާލުމާއި ގުޅިގެން ކަނޑުވި 4 މީހުން ސަލާމަތްކޮށް ވޭމަންޑޫ އަށް ގެނެސްފިއެވެ.
މިއަދު ހެނދުނު 09:30 ހާއިރު ތ. މަޑިފުށިން ފުރައިގެން ތ. ވޭމަންޑުއަށް ދަތުރު ކުރަނިކޮށް ލޯންޗް ބަންޑުން ޖަހާލި ކަމުގެ މަޢުލޫމާތު ފުލުހުންނަށް ލިބިފައިވަނީ މިއަދު މެންދުރު 12 ޖަހަން އުޅެނިކޮށެވެ.
މި މަޢުލޫމާތު ލިބުމާއެކު ވޭމަންޑޫގައި މަސައްކަތްކުރާ ފުލުހުން ވަނީ އެއަތޮޅުގައި އޮންނަ ސީއެމްބިއުލާންސްގެ އެހީތެރިކަން ހޯދައި އެބޭފުޅުންގެ އެހީތެރިކަމާއެކު، ލޯންޗް ބަންޑުންޖަހާލިކަމަށް މަޢުލޫމާތު ލިބުނު ސަރަޙައްދަށް ގޮސް މީހުން ސަލާމަތް ކުރުމުގެ މަސައްކަތް ފަށާފައެވެ.
މިޙާދިސާގައި ލޯންޗް ބަންޑުން ޖަހާލާފައިވަނީ ތ. ވޭމަންޑޫ ކައިރީ އޮންނަ ކަނި މީދޫ ކިޔާ ފަޅު ރަށެއްގެ ކައިރިއަށެވެ. ލޯންޗް ބަންޑުންޖަހާލުމާއެކު ލޯންޗްގައި ތިބި 4 މީހުން ވަނީ ފަތާފައި ކަނިމީދޫ ތޮށިމައްޗަށް އަރާފައެވެ. ފުލުހުން އެމީހުން ސަލާމަތް ކޮށްފައިވަނީ ތޮށިމަތީގައި ތިއްބައެވެ.
މި ޙާދިސާގައި 4 މީހުންނަށްވެސް އެކި ވަރުގެ އަނިޔާ ލިބިފައިވިނަމަވެސް ސީރިއަސް އަނިޔާތަކެއް ލިބިފައި ނުވާކަމުގައި ތ. އަތޮޅު ކޮމާންޑަރު ސަބްއިންސްޕެކްޓަރ އޮފް ޕޮލިސް ޢަލީ ޝުޖާޢު މަޢުލޫމާތު ދެއްވިއެވެ.
މި ޙާދިސާގައި ބަންޑުން ޖަހާލި ލޯންޗް މިވަގުތު އޮތީ ކަނިމީދޫ ކިޔާ ފަޅުރަށާ ދިމާ ބޭރުގައެވެ. ލޯންޗް ސަލާމަތް ކުރުމުގެ މަސައްކަތް ލޯންޗުގެ ވެރިފަރާތާއި ފުލުހުންނާއި ރައްޔިތުން ގުޅިގެން ދަނީ ކުރަމުންނެވެ.
މިހާތަނަށް ބެލި ބެލުމުން އެނގިފައިވާ ގޮތުގައި ލޯންޗް ބަންޑުން ޖަހާލާފައިވަނީ ވައިބާރުވެ ކަނޑު ގަދަ ވުމުގެ ސަބަބުންނެވެ.
