މިމަހު 6 ވަނަ ދުވަހުގެރޭ އައްޑޫސިޓީ މަރަދޫގައި ޒުވާނަކަށް ވަޅިން ހަމަލާދިން މައްސަލައާ ގުޅިގެން މިހާތަނަށް 10 މީހުން ބަންދުކޮށްފި ކަމަށް ފުލުހުން ވިދާޅުވެއްޖެއެވެ.
މި މީހުން ބަންދުކުރީ ތިން ފަހަރެއްގެ މަތިންނެވެ. ފުރަތަމަ ބަންދުކޮށްފައިވަނީ 17 އަހަރުގެ ފިރިހެން ކުއްޖެކެވެ. އޭނާ ބަންދުކުރީ ފިލައިގެން ހުޅުމީދުއަށްދިޔަ ތަނުންނެވެ. އޭނާ ބަންދުކުރީ ކޯޓު އަމުރެއްގެ ދަށުންނެވެ.
އެފަހުންވަނީ ފަސް މީހަކު ބަންދުކޮށްފައެވެ. އެފަހަރު ބަންދުކޮށްފައިވަނީ ސާތާރަ އަހަރާއި 21 އަހަރާ ދެމެދުގެ ކުދިންނެވެ. އެމީހުން ބަންދުކުރީ ފޭދޫ ގެއެއްގެ ތެރޭގައި ފިލައި ތިއްބައެވެ.
އެފަހުން ރޭވަނީ ސާތަރަ އަހަރާއި 26 އަހަރާ ދެމެދުގެ 4 މީހަކު ބަންދު ކޮށްފައެވެ. ފުލުހުން ވިދާޅުވީ އެމީހުން ބަންދުކޮށްފައިވަނީ ކޯޓު އަމުރެއްގެ ދަށުން ކަމަށެވެ. މި މީހުން ވެސް ބަންދުކޮށްފައިވަނީ ފޭދޫއިން ކަމަށް ފުލުހުން ވިދާޅުވިއެވެ.
މަރަދޫގައި ހަމަލާދީފައިވަނީ އުމުރުން 22 އަހަރުގެ މުހައްމަދު އީވާން ނަމަކަށް ކިޔާ ޒުވާނަކަށެވެ. އޭނާގެ ކަރަށާއި ބުރިކައްޓަށާއި ބޮލަށް ވަނީ ވަޅިން ހަމަލާ ދީފައެވެ. ހިތަދޫ ރީޖަނަލް ހޮސްޕިޓަލުގެ އައީސީޔޫގައި ފަރުވާ ދިނުމަށްފަހު އޭނާ މިހާރުވަނީ މާލޭ އައިޖީއެމްއެޗް އަށް ބަދަލުކޮށްފައެވެ. މިހާރުވަނީ އޭނާގެ ފުއްޕާމޭގެ އޮޕަރޭޝަނެއް ވެސް ކޮށްފައެވެ. އޮޕަރޭޝަން ކާމިޔާބު ކަމަށް ވެސް މައުލޫމާތު ވަނީ ލިބިފައެވެ.
