ސަރުކާރުގެ ބާރުތައް ބަދަލު ކުރުމުގެ މަސައްކަތް ކުރިއަށްދަނީ ވަރަށް އޮމާންކަމާއި އަމާން ކަމާއެކު ކަމަށް ފިޝަރީޒް މިނިސްޓަރ ޑރ. މުހައްމަދު ޝައިނީ ވިދާޅުވެއްޖެއެވެ.
ޑރ. ޝައިނީ ވިދާޅުވީ 23 ސެޕްޓެމްބަރު ގައި ބޭއްވި ރިޔާސީ އިންތިޚާބު ކާމިޔާބު ކުރެއްވި އިބްރާހީމް މުހައްމަދު ސާލިހާ ވެރިކަމުގެ ބާރުތައް ހަވާކުރެއްވުމަށް ކުރައްވަންޖެހޭ ހުރިހާކަމެއްވެސް އޮމާން ކަމާއެކުދާ ކަމަށެވެ.
ޑރ. ޝައިނީ ވިދާޅުވީ އަންނަ އަހަރަށް ހުށަހަޅާ ބަޖެޓަކީ އައު ސަރުކާރުގެ އެއްޗެއްކަށް ހެދުމަށްޓަކައި އެފަރާތްތަކުން ބޭނުންކަންކަން ހިމެނުމަށްފަހު ބަޖެޓު ހުށަހެޅުމުގެ ފުރުސަތު ވެސް ރައީސް ޔާމީން އިދިކޮޅު ފަރާތްތަކަށް ދެއްވައިފައިވާ ކަމަށެވެ. އެއީ ވެސް ބާރުތައް ބަދަލުކުރުމުގެ މަރުހަލާ އޮމާންކަމާއެކު ދާކަމުގެ ހެއްކެއް ކަމަށް ވެސް ވިދާޅުވިއެވެ.
ވެރިކަން ބަދަލު ކުރުމުގެ މަރުހަލާގެ ކަންކަން ކުރިއަށް ގެންދިޔުމަށްޓަކައި އިބްރާހީމް މުހައްމަދު ސާލިހު އެކުލަވާލައްވައިފައިވާ ކޮމިޓީން މިއަދުވެސް ވަނީ ސަރުކާރުގެ ބައެއް ކުންފުނިތަކުންގެ ވެރިންނާ ބައްދަލު ކުރައްވައިފައެވެ. އޭގެ ތެރޭގައި ވެމްކޯއާއި، އައިލޭންޑް އޭވިއޭޝަނާއި، އެމްޑަބްލިޔުއެސްސީ އާއި އެސްޓީއޯއާއި، އެމްއޭސީއެލް ފަދަ ސަރުކާރުގެ ބޮޑެތި ކުންފުނިތައް ހިމެނެއެވެ.
މި މަޝްވަރާތައް ވެސް ވަރަށް އޮމާންކަމާއެކު ކުރިއަށްދާ ކަމަށް އިދިކޮޅު ކޯލިޝަންގެ އިސްބޭފުޅުން ވެސް ވިދާޅުވިއެވެ.
