ރާއްޖޭގެ ވެރިކަމަށް ވަޑައިގަންނަވާ ބޭފުޅަކީ ހަރާމްވެރިކަމެއްގެ ބަދަލުގައި ޖާއިޒު ވެރިކަމެއް ކޮށްދެއްވަން ވަޑައިގަންނަވާ ބޭފުޅަކަށް ވާންޖެހޭނެ ކަމަށް ޕީޕީއެމްގެ ކައުންސިލް މެމްބަރު ޑރ. އަބްދުﷲ ޚަލީމް މިއަދު ވިދާޅުވެއްޖެއެވެ.
ޕީޕީއެމްއިން ބޭއްވި ނޫސްވެރިންގެ ބައްދަލުވުމެއްގައި އޭނާ ވިދާޅުވީ ރާއްޖޭގައި އެންމެ ފަހުން ބޭއްވި ރިޔާސީ އިންތިޚާބަކީ އެއްވެސް ރައްޔިތެއްގެ ހައްގަކަށް އަރައިނުގަނެ ބޭއްވި އިންތިޚާބެއްކަން އިލެކްޝަންސް ކޮމިޝަނާއި، އިދިކޮޅުފަރާތްތަކުން ރައްޔިތުންނަށް ޔަގީންކަން ދެއްވަންޖެހޭ ކަމަށެވެ.
އެހެންނަމަވެސް ރާއްޖޭގައި އިއްޔެ ބޭވީ ފްރީ އެންޑް ފެއާ އިލެކްޝަނެއް ނޫންކަން ކޮމިޝަންގެ އަމަލުތަކުން އެނގޭ ކަމަށްވެސް ޚަލީލް ވިދާޅުވިއެވެ. ކޮންޕްލެއިންސް ބިއުރޯގައި އެތައް ޝަކުވާއެއް އެބަހުރި ކަމާއި އިލެކްޝަންސުން ގެންދަނީ އެކަން ފޮރުވަން ކަމަށް ވެސް ބޭބު ވިދާޅުވިއެވެ.
"ރާއްޖޭގެ ވެރިކަމަށް ވަޑައިގަންނަވާ ބޭފުޅަކީ އެބޭފުޅަކަށް ޖާއިޒުނުވާ ހަރާމް ވެރިކަމެއް ކުރައްވާ ބޭފުޅަކަށް ވެގެންނުވާނެ. ޖާއިޒު ވެރިކަމެއް ކުރައްވާ ބޭފުޅަކަށް ވާންޖެހޭނީ. އެހެންވީމާ އޮޅުވާލައިގެން އަންނަ އިންތިޚާބެއްގެ ތެރެއިން ވަޑައިގަންނަވާ ބޭފުޅަކީ އެއްގޮތަކަށް ވެސް ޖާއިޒު ވެރިކަމަށް ކުރައްވަން ވަޑައިގަންނަވާ ބޭފުޅެއްނޫން. އަދި އެބޭފުޅެއްގެ ވެރިކަމުގެ ސައްހަކަން ނެތުމާއެކީގައި އެކުރައްވާ މަސައްކަތްޕުޅުތައް ވެސް އެންމެ ރަނގަޅަށް ދާނެ ކަމަށް ގަބޫލެއް ނުކުރެވޭ،" ޚަލީލް ވިދާޅުވިއެވެ.
ޑރ. ޚަލީލް ވިދާޅުވީ ރިޔާސީ އިންތިޚާބުގައި އޮޅުވާލުންތަކާއި ދެންވެސް ހިނގައި ދިޔަ ކަންކަން އެނގުމަކީ ދިވެހި ރައްޔިތުންނަށް ލިބިގެންވާ ހައްގެއް ކަމަށެވެ. އެ ހައްގު ހޯދައި ދިނުމަށް އީސީން ފަސްޖެހިވަޑައިގަނެގެން ނުވާނެ ކަމަށް ވެސް ވިދާޅުވިއެވެ. އީސީގެ މެމްބަރުންނަށް ކުށްތަކެއް ވެފައިވާ ނަމަ އިސްލާހުވެ މިވެނި ގޮތަކަށް ކަންތައް ހިނގާފައިވާކަމަށް ރައްޔިތުންގެ ގާތު ވިދާޅުވެ ދެއްވުމަށް ވެސް އޭނާ އެދިވަޑައިގެންނެވިއެވެ.
