އަންނަ އަހަރަށް ލަފާކުރާ ބަޖެޓް ތައްޔާރުކޮށްދެއްވައި އަވަހަށް ފޮނުވައި ދެއްވުމަށް ޕީޕީއެމްގެ ޕާލިމެންޓްރީ ގްރޫޕުގެ ލީޑަރު އަހުމަދު ނިހާން އިބްރާހީމް މުހައްމަދު ސާލިހު (ޕްރެޒިޑެންޓް އިލެކްޓް) އަރިހުން އެދިވަޑައިގެންފިއެވެ.
ޕީޕީއެމްއިން މިރޭ ބޭއްވި ޕްރެސް ކޮންފަރެންސެއްގައި ނިހާން ވިދާޅުވީ ކެމްޕޭން ދުވަސްވަރު އިބްރާހީމް މުހައްމަދު ސާލިހު ވެވަޑައިގެންފައިވާ ވައުދުތައް ފުއްދަވައި ދެއްވުމަށް އެޕާޓީން އެހީތެރިވާނެ ކަމަށެވެ. އެކަމަށް ބޭނުންވާ ބަޖެޓު ތައްޔާރު ކުރެއްވުމަށްފަހު ވީހާވެސް އަވަހަށް ފިނޭންސް މިނިސްޓްރީއަށް ހުށަހަޅުއްވައި ދެއްވުމަށް ނިހާން އެދިވަޑައިގެންނެވިއެވެ.
ފިނޭންސް މިނިސްޓަރު އަހުމަދު މުނައްވަރު ވިދާޅުވީ އަންނަ އަހަރުގެ ބަޖެޓު ތައްޔާރު ކޮށްފައި ފޮނުއްވައި ދެއްވުމަށް އެދި ރަސްމީކޮށް މިހާރުވާނީ އިބްރާހީމް މުހައްމަދު ސާލިހަށް ދަންނަވައިފައި ކަމަށެވެ. އެބޭފުޅުންގެ ވަރަށްގިނަ ވައުދުތައް ވެވަޑައިގެންފައިވާ ކަމަށާއި އޭގެ ތެރޭގައި ގިނަ ފައިސާ ބޭނުންވާ ކަންކަން ހިމޭނެ ކަމަށް ވެސް ވިދާޅުވިއެވެ. މިނިސްޓަރ ވިދާޅުވީ ބެޖެޓުގައި ޓެކްނިކަލް އެހީތެރިކަން ދެއްވަން ވެސް އިބްރާހީމް މުހައްމަދު ސާލިހަށް ދަންނަވާފައިވާނެ ކަމަށެވެ. މިމަހުގެ 31 ކުރިން ބަޖެޓު ފޮނުވަންޖެހޭ ކަމަށާއި އެއަށްވުރެ ކުރިން އޭގައި ހިމަނަން ބޭނުންވާ ކަންކަން ފޮނުއްވައި ދެއްވުމަށް ވެސް މިނިސްޓަރ ވަނީ އެދިވަޑައިގެންފައެވެ.
ނިހާން ވިދާޅުވީ މޯލްޑިވިއަންގެ ޓިކެޓް އަގުހެޔޮކުރުމަކީ ވެސް މިސަރުކާރުގެ ވަރަށް މުހިންމު ވައުދެއް ކަމަށެވެ. އެވައުދު ފުށްދުމަށްޓަކައި ތިންސަތޭކަ ފަސްދޮޅަސް ފަސް މިލިއަން ރުފިޔާ ވަރު ބޭނުންވާނެ ކަމަށް ވެސް ނިހާން ވިދާޅުވިއެވެ.
