ރާއްޖެ އާއި ސައުދީ އަރަބިއްޔާއަކީ ވަރަށް ގާތް ދެ އަޚުން ކަމަށާއި މިހާރު ދެގައުމުގެ ދެމެދުގައި އުފެދިފައިވާ ގާތް ގުޅުމުގެ ސަބަބުން ދެގައުމަށްވެސް ފައިދާ ކުރާނެ ކަމަށް ސައުދީ އަރަބިއްޔާއިން ބުނެފިއެވެ.
ސައުދީ އަރަބިއްޔާގެ 88 ވަނަ ގައުމީ ދުވަސް ފާހަގަ ކުރުމަށް ބޭއްވި ރަސްމިއްޔާތެއްގައި ވާހަކަފުޅު ދައްކަވަމުން އެގައުމުން ރާއްޖެއަށް ކަނޑައަޅުއްވާފައިވާ ޑެޕިއުޓީ އެމްބެސެޑަރު މަޓްރިކް އަލްދޮސަރީ ވިދާޅުވީ ރާއްޖެއާއި ސައުދީއާ ދެމެދު މިހާރު އުފެދިފައިވަނީ ވަރަށް ގާތް ގުޅުމެއް ކަމަށެވެ. އޭގެ ސަބަބުން ދެގައުމަށްވެސް އިތުރު ކުރިއެރުންތަކެއް އައިސް ހިތްހަމަޖެހުން ތަކެއް ލިބޭނެ ކަމަށް އުންމީދު ކުރައްވާ ކަމަށެވެ.
ސައުދީ އަރަބިއްޔާއިން މިހެން މިބުނީ މިހާރުގެ ސަރުކާރާއެކު އެންމެ ގާތްގުޅުމެއް އުފެއްދާފައިވާ ގައުމުތަކުގެ ތެރޭގައި ސައުދީ ހިމެނިފައި ވަނިކޮށެވެ. ދެސަރުކާރު ދެމެދުގައި އުފެދުނު ގާތްގުޅުމުގެ ތެރެއިން އިދިކޮޅު ފަރާތްތަކުން ސައުދީ އަރަބިއްޔާއާމެދު ކުރިން ނުތަނަވަސްކަން އުފެދިގެންވެސް ދިޔައެވެ. އެއީ ރާއްޖޭގެ އަތޮޅެއް ކަމަށްވާ ފ. އަތޮޅު ސައުދީ ޝާހީ އާއިލާއަކަށް ވިއްކާލަން އުޅޭކަމުގެ އަޑުތަކެއް ފެތުރުމުންނެވެ. ނަމަވެސް ސައުދީން އޭރު ބުނީ ރާއްޖޭގެ ސުލްޙަވެރިކަން ގެއްލޭނެ އެއްވެސް ކަމެއް އެގައުމުން ނުކުރާނެ ކަމަށެވެ.
