ނިއުޒީލެންޑްގެ ބޮޑު ވަޒީރު ޖެކިންޑާ އަރޑަރން އ.ދ. ގެ އާއްމު މަޖިލީހަށް ވަޑައިގެންނެވީ އެކަމަނާގެ 3 މަހުގެ ދަރިފުޅު ގޮވައިގެންނެވެ. މިއީ މިހައިތަނަށް ދަރިއަކު ގޮވައިގެން އ.ދ. ގެ އާއްމު މަޖިލީހުގެ ބައްދަލުވުމަކަށް ވެރިއަކު ވަޑައިގެންނެވި ފުރަތަމަ ފަހަރެވެ.
ހޯމަ ދުވަހު ހަވީރު ދަރިފުޅު ގޮވައިގެން އ.ދ. އަށް ވަޑައިގެން 'ނެލްސަން މަންޑޭލާ ޕީސް ސަމިޓް'ގައި ވާހަކަފުޅު ދެއްކެވުމުގެ ކުރީން އެކަމަނާ ވަނީ ދަރިފުޅާ އެކު ވަގުތުކޮޅެއް ހޭދަކުރައްވާފައެވެ. އަދި އެކަމަނާ ވާހަކަފުޅު ދެއްކެވި ވަގުތު ދަރިފުޅު އިނީ ފިރިކަލުން ކްލަރކް ގޭފޯރޑްގެ އުނގުގައެވެ.
އަރޑަރން ގެ ދަރިކަނބަލުން ނީވް ތެ އަރޯހާ އުފަންވެވަޑައިގައތީ ޖޫން މަހުގެ 21ވަނަ ދުވަހު އޮކްލެންޑް ހޮސްޕިޓަލުގައެވެ. 6 ހަފްތާގެ މެޓަރނިޓީ ލީވް އަކަށްފަހު އަރޑަރން އޮފީހަށް ނުކުމެވަޑައިގެންނެވީ އޯގަސްޓް މަހުގެ ކުރީ ކޮޅުއެވެ.
ދަރިކަނބަލުން ގޮވައިގެން އެކަމަނާ ރަސްމީ ދަތުރުފުޅުތަކުގަިއ ބައިވެރިވެވަޑައިގަންނަވަނީ ބްރެސްޓްފީޑް ކުރާތީއެވެ. އަދި އެކަމަނާގެ ފިރިކަލުންގެ ދަތުރު ގެ ހުރިހާ ޚަރަދެއް ކުރާނީ އެކަމނާގެ ޖީބުންކަމަށް ވިދާޅުވިއެވެ. ނަަމަވެސް މިދިޔަ ހަފްތާގައި ނިއުޒީލެންޑްގެ ބޮޑުވަޒީރާއި މިނިސްޓަރުން ގައުމުން ބޭރަށް ވަޑައިގަންނަވަ ދަތުރުފުޅުތަކުގައި ނެނީ އެއް ގެންދެވާ ގޮތަށް ގަވައިދު ވަނީ ބަދަލުކޮށްފައެވެ.
އަރޑަން އަކީ ބޮޑުވަޒީރުގެ މަގާމުގައި ހުންނަވައިގެން ދަރިއަކު ލިބިވަޑައިގެންނެވި ދެވަނަ އަންހެން ބޮޑުވަޒީރެވެ. އޮފީގައި ހުންނަވަނިކޮސް ދަރިކަނބަލަކު ލިބިވަޑައިގެންނެވި ފުރަތަމަ އަންހެން ބޮޑުވަޒީރަކީ ޕާކިސްތާނުގެ ކުރީގެ ބޮޑުވަޒީރު ބޭނަޒީރު ބުއްޓޫ އެވެ.
