މިރެއަކީ ދިވެހިންގެ ދުޢާތައް މާތްﷲ އިޖާބަކުރެއްވި ރެއެއް ކަމަށް މިއަދު ބޭއްވި ރިޔާސީ އިންތިޚާބު ކާމިޔާބު ކުރެއްވި އެމްޑީޕީގެ ރިޔާސީ ކެންޑިޑޭޓް އިބްރާހީމް މުހައްމަދު ސާލިހު މިރޭ ވިދާޅުވެއްޖެއެވެ.
އިބްރާހީމް މުހައްމަދު ސާލިހު (ރައީސް މުންތަޚަބު) މިރޭ މިހެން ވިދާޅުވީ އިންތިޚާބު ކާމިޔާބު ކުރެއްވުމަށްފަހު ބޭއްވި ދެއްވި ޕްރެސް ސްޓޭޓުމެންޓެއްގައެވެ. ރައްޔިތުންނާ މުޚާތަބު ކުރައްވައި އެމަނިކުފާނު ވިދާޅުވީ " މިރެއަކީ އުފާވެރި ރެއެއް. މިރެއަކީ ދިވެހިން ކުރެއްވި ދުއާތައް މާތް ﷲ އިޖާބަކޮށްދެއްވި ރެއެއް،" ކަމަށެވެ.
އެމަނިކުފާނު ވިދާޅުވީ މިރެއަކީ އިންސާފުގެ މަގަށް ކުރައްވަމުން ގެންދަވާ ދަތުރުގައި ފިޔަވަޅެއް ކުރިއަށް އެޅުނުރޭ ކަމަށެވެ. މިރޭގެ މިކާމިޔާބީއަކީ ގުޅިގެން ރައްޔިތުން ކުރެއްވި މަސައްކަތުގެ ނަތީޖާ ކަމަށް ވެސް ވިދާޅުވިއެވެ. އެހެން ކަމުން އެމަނިކުފާނަށާއި އެމަނިކުފާނުގެ ރަނިންމޭޓް ފައިސަލް ނަސީމަށް ވޯޓު ދެއްވި ހުރިހާ ރައްޔިތުންނަށް ވަރަށްބޮޑަށް ޝުކުރު ދަންނަވާ ކަމަށް ވެސް ވިދާޅުވިއެވެ. އިންތިޚާބު އޮމާން/އަމާން ކަމާއެކު ކުރިއަށް ގެންދިޔުމަށް އެންމެހާ ރައްޔިތުން ކުރެއްވި މަސައްކަތަށް ޝުކުރު ދަންވާ ކަމަށްވެސް އިބޫ ވިދާޅުވިއެވެ. މިއީ ގައުމުގެ އެއްބައިވަންތަ ކަމަށްޓަކައި މަސައްކަތް ފަށްޓަވަންޖެހޭ ވަގުތުކަމަށާއި، އިންސާފަށް ވާސިލްވުމަށް މަސައްކަތް ކުރައްވާނެ ކަމަށެވެ.
ޕްރެސް ނިންމާލައްވަމުން އިބޫ ވިދާޅުވީ މިރޭވެސް ރައީސް ޔާމީންގެ ފޯންކޯލެއް ލިބިވަޑައިގަންނަވާނެ ކަމަށް އިންތިޒާރު ކުރައްވާ ކަމަށެވެ.
