ފުވައްމުލަކު ސިޓީގައި ގިރަމުންދާ ސަރަހައްދު ހިމާޔަތްކޮށްދީ ފަތާ ފެންގަނޑެއް އެރަށުގައި ގާއިމް ކޮށްދެއްވާނެ ކަމަށް އިދިކޮޅު ރިޔާސީ ކެންޑިޑޭޓް އިބްރާހީމް މުހައްމަދު ސާލިހު (އިބޫ) ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ފުވައްމުލަކަށް ވަޑައިގެން އެރަށުގައި މިރޭ ބޭއްވި ޖަލްސާގައި ވާހަކަފުޅު ދައްކަވަމުންނެވެ. އެރަށުގެ ގިރާ ސަރަހައްދު ހިމާޔަތްކޮށް ފަތާ ފެންގަނޑެއް ހައްދަވައި ދެއްވުމުގެ އިތުރަށް އެރަށުގެ ބަނދަރަށް ދިމާވެފައިވާ މައްސަލަތައް ހައްލުކޮށްދެއްވާނެ ކަމަށް ވެސް އެމަނިކުފާނު ވިދާޅުވިއެވެ. އެމަނިކުފާނު ވިދާޅުވީ އިގްތިސާދީ ސިޔާސަތުގެ ތެރެއިން ފަތުރުވެރިކަމަކީ ވަރަށްބޮޑަށް އިސްކަމެއް ދެއްވާ ކަމެއް ކަމަށެވެ. އެގޮތުން ފުވައްމުލަކުގައި އެންމެ އެކަށީގެންވާ ސަރަހައްދު ތަކުގައި ޓޫރިޒަމަށް ޚާއްސަ އެއްހާސް އެނދު ތަރައްގީ ކޮށްދެއްވާނެ ކަމަށްވެސް ވިދާޅުވިއެވެ.
ފުވައްމުލަކުން ލިބޭ ސިއްހީ ޚިދުމަތުގެ ފެންވަރު ރަނގަޅުކޮށް އިތުރު ކޮށްދިނުމުގެ ގޮތުން އެރަށު ހޮސްޕިޓަލުގެ ފެންވަރު މިހާރަށްވުރެ މަތިކޮށް ޑަޔަލިސިސް ގެ ޚިދުމަތް ފޯރުކޮށްދެއްވަން ފަށްޓަވާނެ ކަމަށްވެސް އިބޫ ވިދާޅުވިއެވެ. އޭގެ އިތުރަށް ދުވުމަށް ޚާއްސަ ޓްރެކެއް ހިމެނޭގޮތަށް އެރަށުގައި ރަނގަޅު ފުޓުބޯޅަ ސްޓޭޑިއަމަކާއި، ވޮލީއާއި ބެޑުމިންޓަން ފަދަ ކުޅިވަރުތަކަށް ޚައްސަ އިންޑޯ ހޯލެއް ހައްދަވައި ދެއްވާނެ ކަމަށް ވެސް އިބޫ ވިދާޅުވިއެވެ.
މިކަންކަމުގެ އިތުރަށް އެރަށުގެ އާސާރީ ތަންތަން ހިމާޔަތް ކޮށްދެއްވާނެ ކަމަށާއި، އިންފޮމޭޝަން ޓެކްލޮނޮޖީއަށް ޚާއްސަ ފެކަލްޓީއެއް ގައުމީޔުނިވަރުސިޓީގައި އުފައްދައި އޭގެ މައިމަރުކަޒު ފުވައްމުލަކުގައި ގާއިމްކޮށްދެއްވާނެ ކަމަށް ވެސް އިބޫ ވިދާޅުވިއެވެ. އަދިވެސް އިތުރުކަންކަން އެރަށަށް ކޮށްދެއްވާނެ ކަމަށާއި އެކަންކަން ހިމެނޭ ލިސްޓް ކައުންސިލާ ހަވާލުކޮށް ކުރައްވާނެ ކަމަށް އިބޫ ވިދާޅުވިއެވެ.
