ތުރުކީގެ ރައީސު ޠައްޔިބު އެރްދޮޣާނާއެކު ބޭއްވެވި ހަތަރު ގަޑިއިރަށް ދިގުދެމިގެން ދިޔަ ވާހަކަތަކަށް ފަހު، އިދްލިބަށް ދޭން ސީރިޔާ ސަރުކާރު ސިފައިން ތައްޔާރުވަމުން ދިޔަ ހަމަލާ ހުއްޓުވުމަށް ރަޝިޔާގެ ރައީސު ވްލާޑިމީރް ޕުޓިން އެއްބަސްވެވަޑައިގެންފިއެވެ.
ރައީސު އެރްދޮޣާން ވަނީ އިދްލިބަށް ދޭން ތައްޔާރުވަމުން ދިޔަ ބޮޑު ހަމަލާ ހުއްޓުވުމަށް ގިނަ މަސައްކަތްޕުޅުތަކެއް ކުރައްވާފައެެވެ. ސީރިޔާގެ ދާޚިލީ ހަނގުރާމައިގައި އިދިކޮޅު ފަރާތްތަކަށް ތާއީދުކުރައްވާ އެރްދޮޣާން ސީރިޔާ ސަރުކާރުގެ ހިމާޔަތުގައި މަސައްކަތްކުރައްވާ ޕުޓިން އެއްބަސްކުރެއްވުމަށް މަސައްކަތްކުރެއްވުމަށް ރަޝިޔާއަށް ވަޑައިގެންނެވީ އިއްޔެވެ. އިއްޔެ އޭނާ ރައީސު ޕުޓިންއާ ބައްދަލުކުރެއްވީ ކަޅު ކަނޑުގެ އައްސޭރީގައި އޮންނަ ސޮޗީގައެވެ.
ސީރިޔާ ސަރުކާރަށް އެންެމެ ބޮޑު އެހީތެރިކަމެއް ދޭ ރަޝިޔާއާއި އީރާނުން މީގެ ކުރިން ވަނީ އިދްލިބަށް ދޭން ރާވަމުން ދިޔަ ހަމަލާ ހުއްޓުވުމަށް ދެކޮޅު ހަދާފައެވެ. މިމަހުގެ ކުރީކޮޅުގައި ތެހެރާނުގައި އެ ދެގައުމާއި ތުރުކީގެ ރައީސުން ބޭއްެވި ބައްދަލުވުމުގައި ވެސް ތުރުކީގެ ބާރުއެޅުމާއެކުވެސް އެ ދެގައުމުން އެކަމަށް އެއްބަސްވެފައި ނުވެއެވެ.
ދެ ރައީސުން ވަނީ 3 މިލިއަން މީހުންގެ އަބާދީއެެއް އޮތް އިދްލިބު ޕްރޮވިންސުގެ ވަށައިގެން 15-20 ކިލޯމީޓަރު ފުޅާ ހަތިޔާރު ގެންގުޅުން މަނާ ބަފާޒޯނެއް ގާއިމުކުރުމަށް އެއްބަސްވެވަޑައިގެންފައެވެ. އަންނަ އޮކްޓޯބަރުގެ 15 އާއި ހަަމައަށް މި ޒޯން ގާއިމުކޮށް ނިންމުމުގެ ކުރިން، އިދްލިިބުގައި މިހާރު ތިބި 'ހަރުކަށި، ހައްދު ފަހަނައަޅާފައިވާ' ހަނގުރާމަވެރިން އެ ޕްރޮވިންސުން ފައިބަން ޖެހެއެވެ.
ރައީސު ޕުޓިންއާއީ ރައީސު އެރްދޮޣާން ބޭއެްވެވި ވާހަކަތައް ނިމުމަށް ފަހު، ރަޝިޔާގެ ދިފާއީ ވަޒީރު ސަރްގޭ ޝޮއިގޫ ވިދާޅުވީ ދެން އިދްލިބަށް ދޭން ތައްޔާރުވަމުން އައި ހަމަލާ ހުއްޓާލާނެ ކަމުގައެވެ.
ހުރިހާ ހަނގުރާމަވެރި ފަރާތަކުން ގެންގުޅޭ ޓޭންކާއި، ރޮކެޓް ލޯންޗަރު ފަދަ ބަރު ހަތިޔާރު އެ ސަރަހައްދުން ބޭރުުކުރުމަށްވެސް ދެ ރައީސުން ވަނީ އެއްބަސްވެވަޑައިގެންފައެވެ. ހަތިޔާރު ގެންގުޅުން މަނާ ސަރަަހައްދު ބަލަަހައްޓާނީ ތުރުކީ ސިފައިންގެ މޯބައިލް ޕެޓްރޯލް ގުރޫޕުތަކާއި، ރަޝިޔާގެ އަސްކަރީ ފުލުުހުން ގުޅިގެންނެެވެ.
މި އެެއްބަސްވުމުގައި ވާގޮތުން ސީރިޔާގެ މައި އެއް ބަނދަރު ކަމުގައިވާ ލާޒިޤިއްޔާ (ލަޓާކިޔާ) އާއި ހަލަބު (އެލެއްޕޯ) އަދި ލާޒިޤިއްޔާ އާއި ހަމާއައި ދެމެދު ދަތުރުކުރާ މަގުތައް އަހަރު ނިމުމުގެ ކުރިން ހުޅުވާލަން ޖެެހެއެވެ.
ސީރިޔާގެ ދާޚިލީ ހަނގުރާމަ ފެށުނީ 2011 ވަނަ އަހަރު ސީރިޔާ ސަރުކާރާ ދެކޮޅަށް ކުރަންފެށި އިހުތިޖާޖުތައް ގަދަ ބާރުން އަނިޔާވެރިކަމާއެކު ހުއްޓުވަން މަަސައްކަތްކުރި ހިސާބުންނެވެ. އެ އިހުތިޖާޖުތައް ހަތިޔާރު ބޭނުންކޮށްގެން ބަދަލުކުރެވޭ ހަމަލާތަކަކަށް ބަދަލުވެ، އެންމެ ފަހުން ދާޚިލީ ހަނގުރާމައަަކަށް ބަދަލުވީއެވެ. މި ހަނގުރާމައިގައި މިހާތަނަށް ގާތްގަނޑަކަށް 3 ލައްކަ 60 ހާސް މީހުން މަރުވެ، އެތައް މިލިއަން ބައެއް ގެދޮރު ނެތިފައި އެބަތިއްބެވެ.
