ރާއްޖޭގައި މިހާރު ވަޒީފާ ލިބިފައިވާ މީހުންނަށް ބަލާކަމަށްވާނަމަ ރާއްޖޭގައި މަސައްކަތްކުރާނެ މީހުން ނެތްވަރަށް 2023 ވަނަ އަހަރު ރާއްޖޭގައި ވަޒީފާ އުފައްދަވާނެ ކަމަށް ޕީޕީއެމްގެ ރިޔާސީ ކެންޑިޑޭޓް ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެއެވެ.
އެމްއެންޔޫގެ ރިޔާސީ ބަހުސް 2018 ޕްރޮގްރާމުގައި މޮޑަރޭޓަރު ކުރެއްވި ސުވާލަކަށް ޖަވާބު ދެއްވަމުން އެމަނިކުފާނު ވިދާޅުވީ "އަޅުގަނޑު އިރާދަކުރެއްވިއްޔާ އަޅުގަނޑުގެ ޓްރާންސްފޯމޭޝަން ޕެކޭޖު މިދާ ސްޕީޑުގައި ދާކަމަށްވަންޏާ 2023 ވަނަ އަހަރު ހަލައްކަ ފަސްދޮޅަސް ތިންހާސް ވަޒީފާ އުފައްދާނަން،" ކަމަށެވެ. ތުއްތު ކުދިން ވެސް ހިމެނޭގޮތުން ރާއްޖޭގެ މިހާރުގެ އާބާދީއަކީ ހަތަރުލައްކަ ކޮންމެވެސް ވަރެއް ކަމަށް ވެސް ރައީސް ޔާމީން ވިދާޅުވިއެވެ. އެހެންވީމާ ޖެހެނީ އެމަނިކުފާނު އުފައްދަވައި ދެއްވާ ފުރުސަތުތަކުގެ ފަހަތުން އަންނަން ކަމަށް ވެސް ވިދާޅުވިއެވެ.
އެމަނިކުފާނު ވިދާޅުވީ ރައްޔިތުން މިހާތަނަށް ކުރަމުންއައި އުންމީދުތަކަށްވުރެ ދުރު އުންމީދުތަކެއް އެމަނިކުފާނު ވަނީ ހާސިލް ކޮށްދެއްވައިފައި ކަމަށެވެ. އެމަނިކުފާނު ވިދާޅުވީ ރާއްޖޭގެ ވެރިކަމާ ހަވާލުވެ ވަޑައިގެންނެވިއިރު ހަވާލުވެ ވަޑައިގެންނެވީ ބޮޑު ދަރަންޏަކާއެކު ކަމަށެވެ. އެހެންނަމަވެސް އެމަނިކުފާނުވަނީ އެދަރަނި "މެނޭޖު" ކުރައްވައިފައި ކަމަށް ވެސް ވިދާޅުވިއެވެ. "ބައިނަލް އަގުވާމީ މާލީ އިދާރާތަކުން އަޅުގަނޑަށް އެއަށް ތާއީދުކުރޭ. ކޮލިފައިކޮށްފައި އަންނަ އޮޑިޓް ރިޕޯޓެއް އަޅުގަނޑަށް ނާދޭ އެއިން އެއްވެސް އިދާރާއަކުން. އަދި ބޭރުން އަޅުގަނޑު ބޮރޯ ކުރާކަށް އެއްވެސް ދައްޗެއްނެތް،" ރައީސް ވިދާޅުވިއެވެ.
ރައީސް ވިދާޅުވީ ދިވެހި ތާރީޚުގައިވެސް ސްވްރިން ބޮންޑެއް ދޫކޮށްގެން ބޭރުން ލާރި "ބޮރޯ" ކޮށްފައިވާ ކަމަށެވެ. އެ ދައްކައިދެނީ އިގްތިސާދުގެ ވަރުގަދަކަންހުރި މިންވަރާއި ތާއީދުއޮތް މިންވަރު ކަމަށް ވެސް ރައީސް ވިދާޅުވިއެވެ.
"އެއް ބިލިއަން ޑޮލަރުގެ ބޭރުގެ އިންވެސްޓްމެންޓެއް އެންމެޕާޓީއަކުން އައިސް ރާއްޖޭގައި ކުރީމައި އެދައްކައިދެނީ ރާއްޖޭގެ އިންވެސްޓްމެންޓާ ދޭތެރޭގައި މީހުންގެ އިތުބާރުއޮތް މިންވަރު. މި ކޮމްޕްލިމެންޓްކުރަން ރަނގަޅުވާންޖެހޭ ކަމަކީ އަދުލުގެ ނިޒާމް ރަނގަޅުވުމާއި އަދުލުގެ ނިޒާމް އަވަސްވުމާއި މިކަހަލަ ކަންތައްތަކެއް. އެކަމަކު އެކަން ނުވުމަކުންނެއް ބޭރު އިންވެސްޓަރުންނެއް ރާއްޖެނައިހެއް ނުތިބޭ،" ރައީސް ވިދާޅުވިއެވެ.
ރައީސް ވިދާޅުވީ ރައްޔިތުންނަށް ދިމާވެފައިވާ އެންމެބޮޑު އެއް މައްސަލައަކީ ބޯހިޔަވާހިކަން ކަމަށެވެ. އެހެންނަމަވެސް މީގެ ކުރިން ބޯހިޔާވަހިކަން ރައްޔިތުންނަށް ކަށަވަރުނުވާ ވަރަށް އެމަނިކުފާނު ވާނީ ކަށަވަރު ކޮށެއްވައިފައި ކަމަށްވެސް ވިދާޅުވިއެވެ. "އަޅުގަނޑު މިހާރު ހުޅުމާލޭގައި ކުރިއަށް ގެންދާ ހިޔާ މަޝްރޫއުގެ ގިނަ ފަންގިފިލާތައް އެހެރީ 17 ފަންގިފިލާއަށްވުރެ މައްޗަށް އަރާފައި. އެއިން ކަށަވަރު ކޮށްދޭނެ ސަތާރަހާސް ހައުސިން ޔުނިޓް. ހިޔާ މަޝްރޫއު ނިމިގެންދާނީ ވިލިމާލެ މަޝްރޫއު ދޭއް ނިމިގެން. އެ ފޭސް ނިމިގެންދާއިރު ހުޅުމާލެއިން މާލެ އަންނަ މީހަކު އަންނަގޮތަށް އެތަނުގައި ވެސް އެޕާޓްމެންޓެއް ހިފައިގެން އުޅޭމީހަކު ހަމަ މާލެއަށް އަންނާނެ،" ރައީސް ވިދާޅުވިއެވެ.
ގައުމީ އުފެއްދުންތެރިކަމާ ބެހޭ ގޮތުން ރައީސް ވިދާޅުވީ އެމަނިކުފާނު ވެރިކަމާ ހަވާލުވެ ވަޑައިގެންނެވިއިރު އުފެއްދުންތެރިކަންހުރީ ހަތަރެއް ނުވަތަ ފަސްހާސް ޑޮލަރުގައި ކަމަށެވެ. އެހެންނަމަވެސް އެ އަދަދު މިހާރުވަނީ ދިހާހާސް އެމެރިކާ ޑޮލަރަށް އަރައިފައި ކަމަށް ވިދާޅުވިއެވެ. އެމަނިކުފާނު އުންމީދު ކުރައްވަނީ މިމަޝްރޫޢުތައް ނިމޭއިރު އެއަދަދު ވިހިހާސް އެމެރިކާ ޑޮލަރަށް އިތުރު ކުރުން ކަމަށްވެސް ވިދާޅުވިއެވެ.
އެމަނިކުފާނު އުންމީދު ކުރައްވަނީ މިސަރަހައްދުން ލިބޭނެ އެންމެ ރަނގަޅު ބޭސްފަރުވާގެ ޚިދުމަތް ދަރުމަވަންތަ ހޮސްޕިޓަލުން ލިބުން ކަމަށްވެސް ވިދާޅުވިއެވެ. އަދި އެމަނިކުފާނު އުންމީދު ކުރައްވާނީ ރާއްޖޭގެ އާބާދީ ބޮޑެތި ސަރަހައްދުތަކުގައި ހުރި ހުރިހާ ސިއްހީމަރުކަޒުތަކުގައި މާލެއާ އެއްފެންވަރުގައި "ޑައިގްނޯސް ފެސިލިޓީސް" އެއިން ކޮންމެ ތަނެއްގައި ހުރުން ކަމަށް ވެސް ވިދާޅުވިއެވެ. އަދި އެމަނިކުފާނު އުންމީދު ކުރައްވަނީ ދިވެހި ހުރިހާ ޒުވާނުންނަށް ވަޒީފާ ދެއްވަން ކަމަށް ވެސް ރައީސް ވިދާޅުވިއެވެ.
އެމަނިކުފާނު ރައްޔިތުންނަށް ކޮށްދެއްވަން ވިދާޅުވި ކަންކަން ވިދާޅުވި މިންވަރަށްވުރެވެސް އިތުރަށް ކޮށްދެވިއްޖެކަމަށް ވެސް ވިދާޅުވިއެވެ. "މިއިން ކަމެއް ނުފުދޭކަމަށް ރައްޔިތަކު ވިދާޅުވާ ކަމަށްވަންޏާ އަޅުގަނޑުމެން މިކޮށްދިން ޚިދުމަތާދޭތެރޭ ސުވާލު އުފެއްދެވިދާނެ. އެހެންނޫން ކަމަށްވާނަމަ ސުވާލު އުފެއްދެވޭނެ ގޮތެއް ނޯންނާނެ،" ރައީސް ވިދާޅުވިއެވެ.
