ރިޔާސީ އިންތިޚާބުގައި ވާދަކުރައްވާ އިދިކޮޅު ފަރާތްތަކަށް ނޫނެކޭ ބުނަންޖެހެނީ ސަރުކާރުގެ ތަރައްގީގެ ބަޖެޓަށް އެބޭފުޅުން ވޯޓު ނުދެއްވާތީ ކަމަށް ތިމާވެއްޓާ ބެހޭ މިނިސްޓަރު ތާރިގު އިބްރާހީމް ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ އައްޑޫސިޓީ ހުޅުމީދޫގައި ސަރުކާރުން ހިންގެވި ތަރައްގީގެ މަޝްރޫއުތަކެއްގެ ނިމުން ފާހަގަ ކުރެއްވުމަށް އެރަށުގައި މިހާރު ބާއްވަމުންދާ ރަސްމިއްޔާތުގައި ވާހަކަފުޅު ދައްކަވަމުންނެވެ. އެމަނިކުފާނު ވިދާޅުވީ ހުޅުދޫ ގިރާ ސަރަހައްދު ހިމާޔަތް ކުރުމަށް އެއްވެސް ސަރުކާރަކަށް ކަމެއް ކޮށްދެވިފައި ނުވާކަމަށެވެ.
އެހެންނަމަވެސް ރައީސް ޔާމީން ވެރިކަމަށް ވަޑައިގެން މިހާރު މިވަނީ ހުޅުދޫ ރައްޔިތުންނަށް އެކަންކޮށްދެއްވާފައި ކަމަށް އެމަނިކުފާނު ވިދާޅުވިއެވެ. ހުޅުދޫ ގިރާ ސަރަހައްދު ހިމާޔަތް ކުރުމަށް 1300 މީޓަރުގެ ތޮއްޓެއް ލައިފައިވަނީ ސަރުކާރުން 25 މިލިއަން ރުފިޔާ ޚަރަދު ކޮށްގެން ކަމަށް އެމަނިކުފާނު ވިދާޅުވިއެވެ. އެހެންނަމަވެސް އެ މަސައްކަތަށް އެފައިސާ ބަޖެޓުގައި ހިމަނައިގެން ވޯޓަށް އެހުމުން އިދިކޮޅުން އެއަށް ވޯޓު ނުދެއްވާތީ އެމީހުންނަށް ރިޔާސީ އިންތިޚާބުގައި ނޫނެކޭ ބުނަންޖެހޭ ކަމަށް ތާރިގު ވިދާޅުވިއެވެ.
