ލަންކާގައި މާސްޓަރ އަށް ކިޔަވަމުންދާ ރާއްޖޭގެ 15 ޕްރިންސިޕަލުން ދަތުރުކުރި ވެހިކަލް އެކްސިޑެންޓުވި އިރު އެ ދުއްވަންއިން މީހާއަށް އެ ޕްރިންސިޕަލުން އިއްޔެ ޒިޔާރަތް ކޮށްފިއެވެ.
މިއަހަރު އެޕްރީލްމަހު ހިނގި އެކްސިޑެންޓުގައި އެންމެ ބޮޑަށް އަނިޔަވީ އެ ޑްރައިވަރަށެވެ. އޭނާގެ ފައިގެ ދެތިންތަނަކުންވަނީ ބިނދިފައެވެ. އަދިވެސް އޭނާ އުޅެން ޖެހިފައިވަނީ އަސައެއްގެ އެހީގައެވެ.
އޭނާއުޅޭ ގެއަށް ޕްރިންސިޕަލުން ޒިޔާރަތްކޮށްފައިވަނީ އިއްޔެގެ ވަގުތެއްގައެވެ. އެ ޒިޔާރަތުގައި އެބޭފުޅުންވަނީ އެމީހާއަށް ހިތްވަރު ދެއްވައި ރަމްޒީ ހަދިޔާ ވެސް ދެއްވައިފައެވެ. މިއީ ދިވެހި ޕްރިންސިޕަލުންތަކެއްގެ ފަރާތުން ބޭރު ގައުމެއްގައި ދެއްކެވި ވަރަށް ރީތި ނަމޫނާއެކެވެ.
އެ ހާދިސާގައި ދިވެހިންގެ ތެރެއިން ބޮޑަށް އަނިޔާވެފައިވަނީ ދ. އަތޮޅު ސްކޫލްގެ ޕްރިންސިޕަލް ޚާލިދު ޢަބްދުﷲ އާއި ސީއެޗްއެސްއީގެ ލީޑިން ޓީޗަރު އައިމިނަތު ޒާހިރާއަށެވެ. އެމީހުން މިހާރުވަނީ ލިބުނު އަނިޔާއިން އެއްކޮށް ރަނގަޅުވެފައެވެ. އެމީހުންގެ އިތުރަށް އެހެން މީހުންނަށް ވެސް އެކިވަރުގެ ކުދިކުދި އަނިޔާ ލިބުނެވެ. މިހާދިސާގައި ޖުމްލަ 10 މީހަކަށް އަނިޔާވިއެވެ. އެއީ 7 ދިވެއްސަކާއި ލަންކާ ތިން މީހުންނެވެ. އެފަހަރު އެކްސިޑެންޓުގައި އަނިޔާވި ޕްރިންސިޕަލުން މިފަހަރު ވެސް ލަންކާއަށް ދިޔައީ ކިޔެވުމުގެ ޚާއްސަ ހަރަކާތެއްގައެވެ.
އެ އެކްސިޑެންޓް ހިނގައިފައިވަނީ ސްރީލަންކާގެ ނުވަރަލިޔާ އިން ވެރިރަށް ކޮޅުނބަށް އައި މަގުމަތީގައެވެ.
