އައްޑޫސިޓީ ފޭދޫގެ ފެންހިންދުމުގެ ނިޒާމު ގާއިމުކުރުމުގެ މަސައްކަތް މިއަދު ބަޔަކާ ހަވާލު ކުރައްވައިފިއެވެ.
އެ މަސައްކަތް ހަވާލު ކުރުމުގެ ރަސްމިއްޔާތު ބާއްވާފައިވަނީ ތިމާވެއްޓާ ބެހޭ ވުޒާރާގައި މިއަދު ހެނދުނުއެވެ. ސަރުކާރުން އެމަސައްކަތް ހަވާލުކުރައްވައިފައިވަނީ ސެނޮކް ޓްރޭޑް ކޮމްބައިން ޕްރައިވެޓް ލިމިޓެޑާއެވެ.
މި މަސައްކަތުގެ އެއްބަސްވުމުގައި ސަރުކާރުގެ ފަރާތުން ތިމާވެއްޓާ ބެހޭ ވުޒާރާގެ ވަޒީރު ތާރިގު އިބްރާހީމެވެ. ސެނޮކް ޓްރޭޑް ކޮންބައިން ޕްރައިވެޓް ލިމިޓެޑްގެ ފަރާތުން ކޮންޓްރެކްޓްގައި ސޮއިކުރެއްވީ އެ ކުންފުނީގެ އެކައުންޓަންޓް ޕްރަބާތޫ ރުވަންޕުރައެވެ.
މިޝްރޫއުގެ ދަށުން ފޭދޫގައި ސްޓޯމް ވޯޓަރ މެނޭޖްމަންޓް ނެޓްވޯކެއް ޤާއިމުކުރެވިގެންދާނެއެވެ. މިއީ 18,595,276.34 ދިވެހި ރުފިޔާ ޚަރަދުކޮށްގެން ކުރިއަށް ގެންދާ މަޝްރޫއެކެވެ. މިއީ ސަރުކާރުގެ ޚަރަދުގައި މިއަހަރު ފޭދޫގައި ކުރިއަށްގެންދިއުމަށް ހަމަޖެހިފައިވާ ފެންހިންދުމުގެ ނިޒާމު ގާއިމުކުރުމުގެ މަޝްރޫޢުތަކުގެ ތެރޭގައި ހިމެނޭ މަޝްރޫއެއް ކަމަށް ތިމާވެއްޓާބެހޭ ވުޒާރާއިން ވިދާޅުވިއެވެ.
މިމަސައްކަތް ހަވާލުކުރުމުގެ ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރ ތާރިގު އިބްރާހީމް ވިދާޅުވީ ފޭދޫގައި ފެންހިންދުމުގެ ނިޒާމު ގާއިމުކުރުމަކީ އެރަށުގެ ރައްޔިތުން ނުހަނު ބޭނުންވެފައިވާ ކަމެއްކަމަށާއި އެއީ ވަރަށް މުހިއްމު މަސައްކަތެއް ކަމަށެވެ. މި ރަސްމިއްޔާތުގައި ސ. ފޭދޫ ދާއިރާގެ މެމްބަރު އިބްރާހީމް ދީދީ ބައިވެރިވެވަޑައިގެންނެވިއެވެ.
