އެމެރިކާގެ ރައީސު ޑޮނާލްްޑް ޓްރަމްޕާއި އުތުރު ކޮރެޔާގެ ޒައީމު ކިމް ޖޮންގ އުން ސިންގަޕޫރުގައި މިއަދު ހެނދުނު ބައްދަލުކުރައްްވައިފިއެވެ. ދެ ބޭފުން އެކަނި ބައިވެރިވެވަޑައިގަތް ބައްދަލުވުމަށް ފަހު ނުކުމެވަޑައިގަތް އިރު ދެބޭފުޅުންގެ މޫނުފުޅަށްވެސް ހިނިތުން ވެރިވެފައިވާ ކަމަށް ޚަބަރުތައް ބުނެއެވެ. މިއީ އެބޭފުޅުންގެ ފުރަތަަމަ ބައްދަލުކުރެއްވުން އީޖާބީ ގޮތެއްގައި ކުރިއަށް ދިޔަ ކަމުގެ ހެއްކެކެވެ.
ސެންތޯސާ އައިލޭންޑްގައި ހުންނަ ކަޕެއްލާ ސިންގަޕޫރު ހޮޓަލުގެ ލައިބްރަރީގައި 45 ވަރަކަށް މިނެޓަށް ބައްދަލުކުރެއްވުމަށް ފަހު ދެބޭފުޅުން އެކުގައި ނުކުމެވަޑައިގެން ބަލަން ތިބި މީހުންނަށް އަތްޕުޅުން އިޝާރާތްުރެއްވީ ހިނިވަރުނަކުރެއްވުމާއެކުގައެވެ.
ބައްދަލުވުން ކުރިއަށް ދިޔައީ ކިހިނެއްތޯ ރައީސު ޓްރަޕްގެ އަރިހުގައި ސުވާލުދެންނެވުމުން އޭނާ ވިދާޅުވީ "ވަރަށް ވަރަށް ރަނގަޅަށް" ކަމަށެވެ. އަދި ދެބޭފުޅުންގެ މެދުގައި "ވަރަށް ރަނގަޅު ގުޅުމެއް" އުފެދޭނެކަން އޭނާ ފާހަގަކުރެއްވިއެވެ.
ބައްދަލުވުމަށް ވެދެވަޑައިގަތުމުގެ ކުރިން އެމެރިކާގެ ރައީސު ވިދާޅުވީ އުތުރު ކޮރެޔާގެ ސްޓޭޓް އެފެއާޒް ކޮމިޝަންގެ ޗެއާމަން ކިމްއާ އެކު އޭނާގެ ބައްދަލުވުން ކުރިއަށް ދާނެގޮތް ބައްދަލުވުން ފެށޭތާ އެއް މިނެޓު ތެރޭގައި އޭނާއަށް އެނގިވަޑައިގަންނަވާނެ ކަމުގައެވެ.
އަނެއްކޮޅުން ކިމް ޖޮންގ އުން ވިދާޅުވީ "ގޮންޖެހުން ބޮޑު" ކަމަކަށް ވިޔަސް އޭނާގެ އުއްމީދަކީ ޓްރަމްޕާއެކު ގާތުން މަސައްކަތްކުރެއްވުމެވެ.
މިއަދު ހެނދުނު ބައްދަލުވުން ފެށުނީ ދެބޭފުޅުން އަތްޕުޅު ޖޯޑުކުރައްވައި ސަލާންކުރެއްވުމުންނެވެ. ސިންގަޕޫރު ގަޑިން ހެނދުނު 9:03 ގައި (މާލޭ ގަޑިން ހެނދުނު 6:03) ދެ ބޭފުޅުން ހޮޓަލުގެ ކުރިމަތީ ބަގީޗާ ތެރެއަށް ދަފަރާތުން ވެދެވަޑައިގަނެ ފުރަތަމަ ފަހަރަށް އެއް ބޭފުޅަކު އަނެއް ބޭފުޅަކާ ކުރިމަތިލައްވައި، 12 ސިކުންތަށް އަތްޕުޅު ޖޯޑުކުރައްވައި ސަލާންކުރެއްވިއެވެ. ދެން ދުރަށް ޖެހިވަޑައިގެން ކުޑަ ހިނދުކޮޅަކަށް ވާހަކަފުޅުދެއްކެވުމަށް ފަހު ހޮޓަލުގެ ލައިބްރަރީއަށް ވެދެވަޑައިގަތީއެެވެ.
"އަހަރެންނަށް ކުރެވެނީ މަތިވެެރި އިހުސާސުތަކެއް. އަަަހަރުމެން މިދަނީ ވަރަށް މުހިއްމު ވާހަކަތަކެއް ދައްކަން. އެވާހަކަތައް ކާމިޔާބުވާނެ. އެއީ އަހަރެންނަށް ލިބޭ ޝަރަފެއް. އަހަރުމެންގެ މެދުގައި ވަރުގަދަ ގުޅުމެއް އުފެދިގެންދާނެ. އެކަމާމެދު ޝައްކެއް ނެތް." ބައްދަލުވުމަށް ވެދެވަަޑައިގަތުމުގެ ކުރިން ރައީސު ޓްރަމްޕް ރިޕޯޓަރުންނަށް ވިދާޅުވިއެވެ.
ދެން ތަރުޖަމާކުރާ މީހަކު މެދުވެރިކުރައްވައި ކިމް ޖޮންގ އުުން ވިދާޅުވިއެވެ. "މިހާ ހިސާބަށް އަންނަން ކަޑައްތުކުރަން ޖެހުނު މަގު ފަސޭހައެއް ނޫން. ކުރިން ހުރި ޝައްކުތަކާއި، ކުރިން ކަން ކުރެވިފައި ހުރި ގޮތްތައް އަހަރުމެން ކުރިއަށް ދިއުމަށް އެޅުނު ހުރަސްތަކެއް ކަމުގައި ވި. އެހެންނަމަވެސް އެހުރިހާ ހުރަސްތަކެއް ގިރާކޮށްފައި އަހަރުމެން މިއަދު މިތިބީ މިތާ"
ދެގައުމުގެ ވަފުދުތައް ބައިވެރިވެގެން ރަސްމީ ވާހަކަަތައް މިހާރު ކުރިއަށް ދަނީއެވެ.
"ހިނިވަރުނަކުރެއްވުމާއެކުގައެވެ." ލާޙައުލަ ވަލާ ޤުއްވަތަ..!! މިއީ ދިވެހި ބަހުގައި ރަސޫލު ބޭކަލުންނާއި ނަބީ ބޭކަލުންނަށް އެކަނި ބޭނުންކުރެވޭ ދަރަޖައެއް. މިވަރުން ދަންޏާ އަދި ޓްރަމްޕު ޙާދީޘް ކުރެއްވީއޭ ވެސް ލިޔަން ފަށާނެ. ނަޢޫޒު ބިﷲ..!