'ސިޔާސީ އިސްލާމް' ގެ ހަރަކާތްތަކާއި، ބޭރުގެ ފަރާތްތަކުން އިސްލާމީ ދީނީ ހަރަކާތްތަަކަށް ޚަރަދުކުރުން ހުއްޓުވަން އަޅާ ފިޔަވަޅުތަކެއް ކަމުގައި ބުނެ ހަތް މިސްކިތެއް ބަންދުކޮށް އެތައް އިމާމުންނެއް އެ ގައުމުން ބޭރުކޮށްލުމަށް އިއްޔެ އޮސްޓްރިޔާއިން ނިންމައިފިއެވެ.
އޮސްޓްރިޔާގެ ޗާންސެލާ ޒިބަސްޓިއަން ކުއަޓްޒް ވިދާޅުވިގޮތުގައި، ވިއެނާގައި ހުންނަ 'ތުރުކީ ޤައުމީ ހަރުކަށި އުސޫަލު' ގެ މީހުންގެ މިސްކިތެއް ބަންދުކޮށް، އެހެން ހަ މިސްކިތެއް ބަލަހައްޓާ އަރަބް ރެލިޖަސް ކޮމިއުނިޓީ ކިޔާ ޖަމާއަތެއް އުވާލައި އެ ޖަމާއަތުން ހިންގާ ހަ މިސްކިތެއް ބަންދުކުރުމަށް އޭނާގެ ސަރުކާރުން ވަނީ ނިންމައިފައެވެ.
އޮސްޓްރިޔާ ސަރުކާރުން ބުނަނީ މިފިޔަވަޅު އަޅަނީ 2015 ވަނަ އަހަރު ފާސްކޮށްފައިވާ، ދީނީ ޖަމާއަތްތަކަށް ބޭރުން ފައިސާ ހޯދުން މަނާކުރާ ޤާނޫނެއްގެ ދަށުން ކަމަށެވެ. ދާޚިލީ ވަޒީރު ހާބަޓް ކިކްލް ވިދާޅުވީ، އޮސްޓްރިޔާގައި ދިރިއުޅޭ ތުރުކީ ދަރިކޮޅުގެ މުސްލިމުންގެ ޖަމާއަތެއް ކަމުގައިވާ ޔުނިއަން އޮފް ޓަރކިޝް-އިސްލާމިކް ކަލްޗަރަލް އެސޯސިއޭޝަންސް (އޭޓީއަބީ) އިން ވަޒީފާ ދީފައިވާ 40 އިމާމުންގެ ރެސިޑެންސް ޕާމިޓްތައް އަލުން މުރާޖައާ ކުރަމުންދާ ކަމުގައެވެ.
ކިކްލް ވިދާޅުވީ މިހާރުވެސް ދެ އިމާމެއްގެ ހުއްދަ ބާޠިލުކޮށްފައިވާ ކަމަށާއި، އަލަށް އައި ފަސް އިމާމަކު ނުވައްދައި ފޮނުވާލާފައި ވާކަމަށެވެ.
މިހާރުގެ ކޮންޒާވެޓިވް ޗާންސެލާ ކުއަޓްޒް ފާއިތުވި ޑިސެންބަރު މަހު ވެރިކަމަށް ވަޑައިގެންނެވީ، އޮސްޓްރިއާށް ހިޖުރަކުރުމާ ދެކޮޅު ޕާޓީ ފްރީޑަމް ޕާޓީއާ ކޯލިޝަން ހައްދަވައިގެންނެވެ.
ހިޖުރަކުރުމާ ބެހޭ ގަވާއިދުތައް ހަރުކަށިކުރުމަށާ، ގަވާއިދާ ޚިލާފަށް ވަންނަ މީހުންނަށް ފުރުސަތު ނުދީ ވަގުތުން ފޮނުވާލުމަށާ، 'ހަރުކަށި' އިސްލާމާ ދެކޮޅަށް ފިޔަވަޅު އެޅުމަށް ފާއިތުވި އަހަރު އިންތިޚާބަށް ހިންގި ކެމްޕޭނުގައި ދެ ޕާޓީންވެސް ވަނީ ގޮވާލާފައެވެ.
"ދެ މުޖުތަމައެއް އޮތުމާއި، 'ސިޔާސީ އިސްލާމާ'އި، ހަރުކަށި ވިސްނުމަށް އަހަރުމެންގެ ގައުމުގަ ޖާގައެެއް ނެތް" ނޫސްވެރިންނާ ވާހަކަފުޅު ދައްކަވަމުން ޗާންސެލާ ކުއަޓްޒް ވިދާޅުވިއެވެ.
ހުކުރު ދުވަހު އެޅި ފިޔަވަޅުތަކަކީ "ކޮންމެހެން އަޅަން ޖެހިފައިވާ ފާހަގަކޮށްލެވޭ ފުރަތަމަ ފިޔަވަޅެއް" ކަމުގައި ވައިސް ޗާންސެލާ އަދި ފްރީޑަމް ޕާޓީގެ ވެރިޔާ ހެއިންޒް-ކްރިސްޓިއަން ސްޓްރާޚޭ ވިދާޅުވިއެވެ. އޭނާ އިތުރަށް ވިދާޅުވީ "އެ ފިޔަވަޅުތައް ނެފުދޭނަމަ އަހަރުމެން ގާނޫނީ ހާލަތު މުރާޖައާކުރާނެ' ކަމުގައެވެ.
ތުރުކީން ވަނީ އޮސްްޓްރިޔާއިން އެޅި ފިޔަވަޅަކީ "އިސްލާމްދީނާ ދުޝްމަން، ނަސްލީ ތަފާތުކުރުމެއް" ކަމުގައި ސިފަކޮށްފައެވެ.
"އޮސްޓްރިޔާއިން ހަތް މިސްކިތެއް ބަންދުކޮށް އިމާމުންތަކެއް ބޭރުކޮށްލުމަކީ އެ ގައުމުގައި ހިނގާ އިސްލާމްދީނާ ދުޝްމަން، ނަސްލީ ތަފާތުކުރުމުގެ އޮއިވަރުގެ ނަތީޖާއެކެވެ." ތުރުކީގެ ރައީސު ރަޖަބު ޠައްޔިބުގެ އެރްދޮޣާންގެ ތަރުޖަމާނު އިބްރީހީމް ކާލިން ޓްވިޓާގައި ވިދާޅުވެފައި ވެއެވެ.
