ސަންޖޭދަތުގެ ހަޔާތުގެ މައްޗަށް ކުޅުނު ފިލްމު "ސަންޖޫ" ގެ ޕްރޮމޯޝަނަލް ލަވައެއް ސަންޖޭދަތު އާއި ރަންބީރް ކަޕޫރް ޝޫޓް ކުރަމުންދާ ކަމަށް އިންޑީއާގެ މީޑީއާ އިން ރިޕޯޓް ކޮށްފިއެވެ. "ސަންޖޫ" ގައި ސަންޖޭދަތުގެ ރޯލު ކުޅެފައިވަނީ ރަންބީރް ކަޕޫރް އެވެ.
"ސަންޖޫ" ގެ އޮފިޝަލް ޓްރެއިލަރ ރިލީޒް ކުރުމާ އެކު ރަންބީރް އަށް ގިނަ ބައެއްގެ ތައުރީފް ދަނީ އޮހެމުންނެވެ. އޭގެ ތެރެއިންވެސް އެންމެ ފާހަގަ ކުރެވެނީ ސަންޖޭދަތުގެ ބައްޕަ ރިޝީ ކަޕޫރްގެ ކޮމެންޓެވެ. ޓްރެއިލަރ ބެލުމަށް ފަހު ރިޝީ ބުނެފައިވަނީ 'ސަންޖޭތަދު' ޖަލުން ނިކުމެގެން އަންނަ މަންޒަރު ފެނުމުން އޭނާއަށް އެއީ އޭނާގެ ދަރިފުޅު ރަންބީރް ކަމެއް ނޭނގުނު ކަމަށެވެ. ސަންޖޭދަތުގެ ރޯލު ވަރަށް މޮޅަށް ކުޅެފައިވާ ކަމަށް ރިޝީ ކަޕޫރްވަނީ ބުނެފައެވެ. ރިޝީގެ ކޮމެންޓާ ގުޅިގެން މީޑިއާ އިން ކުރި ސުވާލަކަށް ޖަވާބު ދެމުން ރަންބީރު ބުނެފައިވަނީ ބައްޕަގެ ފަރާތުން އެހާ ފަސޭހައިން ތައުރީފު ނުލިބޭނެ ކަމަށެވެ.
"ސަންޖޫ" ގައި ސަންޖޭދަތުގެ ދިރިއުޅުމާއި އޭނާގެ ހަޔާތުގައި ދިމާވެފައިވާ ގިނަކަންތައްތަކެއް ގެނެސްދީފައިވެއެވެ. އޭނާގެ ޒާތީ ދިރިއުޅުމާއި، ޓެރަރިސްޓް ހަމަލާ އަކާއި އޮތް ގުޅުމާއި، ބައްޕަ އާއި ދެމެދު އޮތް ގުޅުމުގެ ވާހަކަވެސް ފިލްމުގައި ގެނެސްދީފައިވެއެވެ. ފިލްމުގައި ސަންޖޭދަތުގެ ބައްޕަގެ ރޯލު ކުޅެނީ ޕަރޭޝް ރަވާލް އެވެ. އޭނާގެ މަންމަގެ ރޯލު ކުޅެފައިވަނީ މަނީޝާ ކޮއިރާލާ އެވެ. އަދި އަނުޝްކާ ޝަރްމާ އާއީ ސޯނަމް ކަޕޫރް އާއި ދިޔާ މިރްޒާ އާއި ވިކީ ކޯޝަލް އާއި ބޯމަން އިރާނީ އާއި ތާބޫ އަދި ކަރިޝްމާ ތައްނާ ވެސް މުހިއްމު ރޯލުތަކަކުން ފެނިގެންދާނެއެވެ.
"ސަންޖޫ" ރިލީޒް ކުރާނީ މި މަހުގެ 29ވަނަ ދުވަހު އެވެ. ސަންޖޭދަތު އާއި ރަންބީރް މި ހަފްތާ ބަންދުގައި ޝޫޓް ކުރާ ލަވަ ފިލްމުގައި ނުހިމެނޭނެއެވެ. މިއީ ހަމައެކަނި ޕްރޮމޯޝަނަލް ލަވައެކެވެ.
