ބޯހިޔާވަހިކަމުގެ މައްސަލަ ހައްލު ކުރެއްވުމަށް ސަރުކާރުގެ ފުރިހަމަ ޕްލޭނެއް އެބައޮތް ކަމަށް ހައުސިންގ މިނިސްޓަރ މުހައްމަދު އަސްލަމް ވިދާޅުވެއްޖެއެވެ.
މިނިސްޓަރ މިހެން ވިދާޅުވީ ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން ކުރިއަށްގެންދަވާ ބިންވެރިޔާ ޕްރޮގްރާމްގެ ދަށުން ގޯތި ލިބޭ މީހުންގެ ލިސްޓު އިއުލާންކުރެއްވުމުގެ ގޮތުން ބޭއްވި ނޫސްވެރިންގެ ބައްދަލުވުުމުގައި ވާހަކަ ދައްކަވަމުންނެވެ.
މިނިސްޓަރ ވިދާޅުވީ ބިންވެރިޔާ ޕްރޮގްރާމްގެ ދަށުން ގޯއްޗަށް އެދުމުގެ ފުރުސަތުގައި ފޯމް ހުށަހަޅާފައިވާ ފަރާތްތަކުގެ ތެެރެއިން ޝަރުތު ހަމަވާ ހުރިހާ ފަރާތްތަކަށް ގޯތި ދެއްވުމަށް ސަރުކާރުން ނިންމަވާފައިވާކަމަށާއި އެގޮތަށް ނިންމަވާފައިވަނީ މިދިޔަ ބުރާސްފަތި ދުވަހު ކެބިނެޓްގެ ބައްދަލުވުމެއް ބޭއްވުމަށްފަހު ކަމަށެވެ.
މާލޭގެ ރައްޔިތުންނަށް އެތައް ޒަމާނަކަށްފަހު ގޯތި ލިބޭކަން ކަށަވަރުގެންދާއިރު، މިއީ މާލޭގެ ގިިނަ ރައްޔިތުންތަކަކަށް އުފާވެރިކަމެއްގެ ފެށުމަށްވާނޭކަމަށް ވެސް މިނިސްޓަރ ވިދާޅުވިއެވެ. އަދި މާލޭގެ ރައްޔިތުންނަށް ބޯހިޔާވަހިކަން ހޯދައިދެއްވުމަށް މަސައްކަތްކުރަމުންދާއިރު، މި މައްސަލައަށް ޖުމްލަ ހައްލެއް އަންނަނީ ރާއްޖެއެކުގައި ތަރައްޤީކުރެއްވުމަށް ސަރުކާރުން ކުރައްވާ މަސައްކަތްތަކާއެކުކަމަށް ވެސް ވިދާޅުވިއެވެ.
އަސްލަމް ވިދާޅުވީ ސަރުކާރުން އުއްމީދުކުރަނީ ކަނޑައަޅާފައިވާ ސިޔާސަތުތައް ކުރިއަށްގެންދިއުމަށް މަގުފަހިވެފައި އޮންނާނެ ގޮތަށް ރައްޔިތުން ވެސް މަސައްކަތްކުރައްވާނެކަމަށެވެ. އޭރުން ކުރިއަށް އޮތް 5 އަހަރަކީ މިއަދަށްވުރެ މާފާގަތި ދުވަސްތަކެއް ރާއްޖޭގެ ހުރިހާ ރައްޔިތުންނަށް ވެސް ލިބިގެންދާނޭ ދުވަސްތަކަކަށް ވެގެންދާނޭކަމަށް ވެސް ވިދާޅުވިއެވެ.