ބައިނަލްއަގްވާމީ މައިދާނުގައި ފައިހަމަކުރަމުން އަންނަ ރާއްޖޭގެ ފަހުރުވެރި، ކީނޯޓު ސްޕީކަރު އަފީފް ހުސެއިންގެ ހާއްސަ އިވެންޓެއް އަންނަ ޖުލައި 15 ވަނަ ދުވަހު ބާއްވަން ރެޒޫމޯ މޯލްޑިވްސް އިން އިއުލާނުކޮށްފި އެވެ.
އެމްއެންޔޫގެ ބިޒްނަސް ސްކޫލުގެ އޮޑިޓޯރިއަމްގައި އެ ދުވަހު ހެނދުނު 9 އިން ހަވީރު 5 އަށް ބާއްވާ މި އިވެންޓުގައި އަފީފް ނަގައިދޭނީ، ދުނިޔޭގެ ފެންވަރުގެ ހިދުމަތާއި ވިސްނުން ތަރައްގީކުރާނެ ގޮތާއި އެފަދަ ސަގާފަތެއް ދިރުވައި، ކުރިއެރުވުމާ ބެހޭ ސެޝަނެކެވެ.
ހުރިހާ ފަންތިއެއްގެ މުވައްޒަފުންނާއި މެނޭޖަރުންނަށް އަމާޒުކޮށްގެން ކުރިއަށް ގެންދާ، މި ޕްރޮގްރާމް ފަރުމާކޮށްފައިވަނީ، އުފާވެރި، މަޖާ އަދި އިންޓަރެކްޓިވް މާހައުލެއްގައި، އިލްމީ ހޯދުންތަކާއި ދާއިރާގެ ތަޖުރިބާތައް ހިއްސާކޮށް، އެ މީހެއްގެ ކިބައިގައި ހުރި ހިދުމަތުގެ ގާބިލްކަން އާ އުސްމިންތަކަކަށް އުފުލާލުމަށެވެ.
ސަރުކާރުގެ އޮފީހެއް ވިޔަސް، ވިޔަފާރި ކުންފުންޏެއް ވިޔަސް، އެތަނެއްގެ މައިގަނޑު މަސައްކަތް ބިނާވަނީ ދޭ ހިދުމަތަކަށްވާތީ، މި ޕްރޮގްރާމަކީ ވަޒީފާއަދާކުރާ ކޮންމެ މީހަކަށް ވެސް ބައިވެރިވެގެން އޭގެ ފައިދާކުރާނެ ޕްރޮގްރާމެކެވެ. އަދި މިއީ ވަޒީފާގެ މާހައުލަށް ނުކުންނަން ތައްޔާރުވާ ދަރިވަރުންނަށް ވެސް މުހިއްމު ފުރުސަތަކަށް ވާނެ އެވެ. މީގެ އިތުރުން ރާއްޖޭގެ އިގުތިސާދު ބަރޯސާވަނީ ހިދުމަތުގެ ސިނާއަތެއް ކަމަށްވާ ޓޫރިޒަމަށް ކަމަށްވާތީ މިއީ އެ ދާއިރާގެ މުވައްޒަފުންނަށް ރަނުގެ ފުރުސަތަކަށް ވާނެ އެވެ.
މިއީ ރެޒޫމޯ އިން މި އަހަރު ބާއްވާ މިފަދަ ދެ ވަނަ ޕްރޮގްރާމެވެ. އެ ކުންފުނިން ވަނީ ފެބްރުއަރީ މަހު، އަމިއްލަ ނަފްސުގެ ގާބިލްކަން އިތުރުކޮށް، ކާމިޔާބު މީހަކަށް ވުމަށްޓަކައި ގެންގުޅެން ޖެހޭ ވިސްނުން ތަރައްގީކުރާނެ ގޮތްތަކާ ބެހޭގޮތުން، އަފީފްގެ އިވެންޓެއް ބާއްވައިފަ އެވެ. މި އިވެންޓުގެ އެކި ދާއިރާތަކުން 200 އެއްހާ މީހުން ބައިވެރިވި އެވެ.
އަފީފަކީ އޭޝިއާ އާއި މެދުއިރުމަތި އަދި އެފްރިކާ ބައްރުގައި އެތައް ރިޒޯޓްތަކާއި ހޮޓާތަކެއް އޮޕަރޭޓްކުރާ ލަކްސްގެ ހޮޓެލްސް އެންޑް ރިޒޯޓްސްގެ ރާއްޖޭގެ ޓެލެންޓް އެންޑް ކަލްޗާ ސީނިއާ ޑިރެކްޓަރެވެ. އަދި ރާއްޖޭގެ ހިއުމަންސް ރިސޯސަސް ދާއިރާގެ މީހުންގެ ޖަމިއްޔާ ކަމަށްވާ މާޕްގެ ނައިބް ރައީސަކީ ވެސް އޭނާ އެވެ.
އަފީފް ވަނީ ބައިނަލްއަގްވާމީ އެތައް ކޮންފަރެންސްތަކާއި އިވެންޓްތަކުގައި ކީނޯޓް ތަގުރީރު ދެއްވައި ސެޝަންތައް ނަގައިދެއްވައިފަ އެވެ. އެޗްއާރް ސްޓްރެޓެޖީ އާއި ކަސްޓަމާ އެކްސްޕީރިއަންސް އާއި ލާނިން އެންޑް ޑިވެލޮޕްމަންޓް ދާއިރާގެ ތަޖުރިބާކާރެއް ކަމަށްވާ އަފީފަކީ ރާއްޖޭގެ އެންމެ ކުޅަދާނަ އެއް ޕަބްލިކް ސްޕީކަރެވެ. އަދި އޭނާ އަކީ ލީޑާޝިޕާއި ޕާސަނަލް ޑިވެލޮޕްމަންޓުގެ ދާއިރާގެ އެގްޒެކެޓިވް ކޯޗެއްގެ ގޮތުގައި ފާހަގަކޮށްލެވޭ ބޭފުޅެކެވެ.
މި އިވެންޓް އިންތިޒާމު ކުރާ ރެޒޫމޯ މޯލްޑިވްސް އަކީ މީޑިއާ، ޕަބްލިކް ރިލޭޝަންސް، ކޮމިއުނިކޭޝަންސް އަދި ޕަބްލިޝިން އަށް ހާއްސަކޮށް ކޮންސަލްޓަންސީ އާއި ޓްރެއިނިން ދޭ ކުންފުންޏެކެވެ. މި ކުންފުނީގައި އިސްކޮށް ތިއްބަވަނީ ރާއްޖޭގެ އެ ދާއިރާގެ ތަޖުރިބާކާރު ބޭފުޅުންތަކެކެވެ.
ފީ އެއް ދައްކައިގެން ބައިވެރިވެވޭ މި އިވެންޓުގައި ރަޖިސްޓަރީވުމުގެ ފުރުސަތު މިހާރު ވަނީ އާއްމުކޮށް ހުޅުވާލައިފަ އެވެ. އެގޮތުން https://shorturl.at/xFS15 މި ލިންކުގައިވާ ފޯމު ފުރުމުން ބައިވެރިވެވޭނެ އެވެ. މި އިވެންޓުގައި މުވައްޒަފުން ބައިވެރިކުރަން ބޭނުންވާ އޮފީސްތަކާއި ކުންފުނިތަކަށް ހާއްސަ އަގެއް ވަނީ ކަނޑައަޅައިފަ އެވެ.