ކުރީގެ ރައީސް އަދި ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު ސްރީލަންކާއަށް ވަޑައިގަންނަވާގޮތަށް ހަމަޖެހިއްޖެއެވެ.
ރައްޔިތުންގެ މަޖިލީހުން ކޮށްފައިވާ ޓްވީޓެއްގައި ވަނީ ރައީސް ނަޝީދުގެ މި ދަތުރުފުޅަކީ ސްރީލަންކާގެ ބޮޑުވަޒީރު ރަނިލް ވިކްރަމަސިންހަގެ ދައުވަތަކަށް ކުރައްވާ ދަތުރުފުޅެއް ކަމަށެވެ.
އެހެންނަމަވެސް އިތުރު ތަފްސީލެއް ހާމަކޮށްފައެއް ނުވެއެވެ.
Hon. President @MohamedNasheed, MP, Speaker of the People’s Majlis is visiting Sri Lanka at the invitation of Sri Lanka’s Prime Minister @RW_UNP pic.twitter.com/A7zLDwEhBF
— People's Majlis (@mvpeoplesmajlis) June 18, 2022
އިގްތިސާދީ ކާރިސާއެއްގެ ތެރެއަށް ލަންކާ ވެއްޓިފައިވާ މި ދަނޑިވަޅުގައި ލަންކާއަށް ބޭރުގެ އެހީތެރިކަން ހޯދައިދެއްވުމަށް އެހީތެރިވެވަޑައިގަންނަވާނެ ކަމަށް ރައީސް ނަޝީދު ވިދާޅުވުމުން، އެ މަސައްކަތް ލަންކާގެ ބޮޑުވަޒީރު ރަނިލް ވަނީ ލަންކާއަށް އެހީ ހޯދުމުގެ މަސައްކަތް ރައީސް ނަޝީދުއާ ހަވާލު ކުރައްވާފައެވެ.
އެ ގައުމަށް ކުރިމަތިވެފައިވާ އިގްތިސާދީ ދަތިކަމާއި ގުޅިގެން އެގައުމުގެ ހާލަތު ވަރަށްބޮޑަށް ގޯސްވެފައިވާއިރު، ލަންކާއަށް މިވަގުތު ކާބޯތަކެތީގެ ދަތިކަން ވެސް ވަނީ ކުރިމަތިވެފައެވެ.
ކުރިއަށް އޮތް އޮގަސްޓް މަހުގެ ތެރޭގައި އެގައުމު މިހާރުއޮތް ހާލަތުން ސަލާމަތް ނުވެއްޖެނަމަ، ކާބޯތަކެތީގެ ބޮޑު ކާރިސާއެއް ކުރިމަތިވެ، ރައްޔިތުން ބަނޑަށް ޖެހިދާނެކަމުގެ އިންޒާރު އެގައުމުގެ އާ ބޮޑު ވަޒީރު ރަނިލް ވިކްރަމަސިންހަ ވަނީ ދެއްވާފައެވެ.