ދުނިޔޭގެ ނިއުކުލިޔާ ހަކަތައާ ބެހޭ ޖަމްއިއްޔާ، އިންޓަނޭޝަނަލް އެެޓޮމިކް އެނާޖީ އެޖެންސީ (އައިއޭއީއޭ) އާ އީރާނާ ދެމެދު މައުލޫމާތު ބަދަލުކުރުމާ ބެހޭ އާ އެއްބަސްވުމެއް އެކުލަވާލައިފިއެވެ. މައުލޫމާތު ބަަދަކުރުމުގެ އިތުރަށް، ދެ ފަަރާތުގެ ދެމެދުގައި ހުރި ހައްލުކުރަން ޖެހިފައިވާ މައްސަލަތައް ހައްލުކުރުމަށް މަގުޗާޓެއް އެކުލަވާލުމަށް އިއްޔެ އެބަސްވެފައިވާ ކަމަށް އީރާނުގެ އޮފިޝަލަކު މައުލޫމާތު ދެއްވާފައި ވެެއެވެ. އައިއޭއީއޭއާ އީރާނުން މިފަދަ އެއްބަސްވުމެއް އެކުލަވާލާފައި މިވަނީ އީރާނުގެ ނިއުކުލިޔާ އެއްބަސްވުން އަލުން 'ދިރުވުމުާ' ގުޅޭގޮތުން ދުނިޔޭގެ ބޮޑެތި ބާރުތަކާ އީރާނާ ދެމެދު ކުރެވެމުންދާ މަޝްވަރާތަކުން ނަތީޖާއެއް ލިބިދާނެ ކަމުގެ ވާހަކަ ދެކެވެމުންދާ ދަނޑިވަޅެއްގައެވެ.
އީރާނުގެ ވެރިރަށް ތެހެރާނަށް އިއްޔެގެ ވަގުތެއްގައި ވަަޑައިގަތުމަށް ފަހު އައިއޭއީއޭގެ ޑިރެކްޓަަރ ޖެނެރަލް ރަފާއެލް މާރިއާނޯ ގްރޮސީ ވިދާޅުވީ އޭނާގެ ދަތުރުފުޅުގެ ބޭނުމަކީ "ގޮތެއް ނުނިމި ހުރި ސުވާލުތަކާ" ގުޅޭ ގޮތުން މަޝްވަރާކުރެއްވުމެވެ.
"މިއީ ވަރަށް މުހިއްމު ވަގުތެއް. އެހެނަސް، އެންމެންނަށް އީޖާބީ ނަތީޖާއެއް ލިބުމަކީ އެކަށީގެންވާ ކަމެއް." ވިއެނާގައި ކުރިއަށްދާ މަޝްވަރާތަކަށް އިޝާރާތްކުރައްވަމުން ގްރޮސީ ކުރެއްވި ޓުވީޓެއްގައި ވިދާޅުވެފައި ވެއެެވެ.
އީރާނާ އައިއޭއީއޭއާ ދެމެދު އެކުލަވާލި އެއްބަސްވުމާ ބެހޭގޮތުން އެޓޮމިކް އެނާޖީ އޮގަނައިޒޭޝަން އޮފް އީރާން (އޭއީއޯއައި) ގެ ރައީސު މުޙައްމަދު އިސްލާމީވެސް ވަނީ ވާހަކަފުޅުދައްކަވާފައެވެ.
"ތެހެރާނާ އިންޓަނޭޝަނަލް އެޓޮމިކް އެނާޖީ އެޖެންސީ (އަައިއޭއީއޭ) އާ ދެމެދު ހައްލުނުވެ ހުރި މައްސަލަތާ ގުޅޭ ލިޔެކިޔުންތައް 21 ޖޫން އަންނަންވާއިރަށް އެ އެޖެންސީއާ ހަވާލުކުރުމަށް އަހަރުމެން ވަނީ އެއްބަސްވެފައި." އިސްލާމީ ވިދާޅުވިއެވެ.
އައިއޭއީއޭގެ ރައީސު ގްރޮސީއާއެކު ތެހެރާންގައި ބޭއްވި ނޫސްވެރިންގެ ބައްދަލުވުމެއްގައި ވާހަަކަފުޅުދައްކަވަމުން އިސްލާމީ ފާހަގަކުރެއްވި ގޮތުގައި ނިއުކުލިޔާ އެއްބަސްވުމަށް އަލުން އަމަލުކުރަން ފެށުމުގެ ކުރިން އައިއޭއީއޭއާ އީރާނާ ދެމެދު ހައްލުނުވެ ހުރި މައްސަލަތައް ހައްލުކުރުމަކީ ކުރަންޖެހޭ ކަމެކެވެ.
"އެކުގައި މަސައްކަތް ކުރުމުގެ، އަދި ވަރަށް ގަދަޔަށް މަސައްކަތްކުރުމަށް އަހަރުމެންނަށް އެއްބަސްވެވުނު ކަން އެއީ އެންެމެ މުހިއްމު ކަމަކީ." މި ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުން އޭއައިއީއޭގެ ޑިރެކްޓަރ ޖެނެރަލް ވިދާޅުވިއެވެެ.
އީރާނުގެ އެޓޮމިކް އެނާޖީ އޮގަނައިޒޭޝަންގެ ވެރިިޔާ އިސްލާމީއާ ބައްދަލުކުރެއްވުމުގެ އިތުރަށް، ޚާރިޖީ ވަޒީރު ޙުސައިން އަމީރުޢަބްދުއްލަހިޔާންއާ ގްރޮސީއާ ބައްދަލުކުރެއްވުމަށް ވަނީ ހަމަޖެހިފައެވެ.
މިހާރު އީރާނުން %60 ގެ މިންވަރަށް ޔުރޭނިއަމް ފައްކާކުރެއެވެ. އެއީ ހަތިޔާރު އުފައްދަން ފައްކާކުރާ %90 އާ ގާތް މިންވަރެކެވެ. އަދި އީރާނަށް ހުއްދަދީފައިވާ %3.67 އަށްވުރެ އެތައް ތަން މަތީ މިންވަރެކެވެ.