ކުރިއަށް އޮތް ލޯކަލް ކައުންސިލް އިންތިޚާބުގައި ވާދަކުރާ ޕާޓީތަކާއި ކެންޑިޑޭޓުންގެ ކެމްޕެއިން ލަވަތަކުގެ ތެރެއިން މާލެ ސިޓީގެ މޭޔަރުކަމަށް ވާދަކުރައްވާ ޑރ.މުޙައްމަދު މުޢިއްޒުގެ ރަސްމީ ކެމްޕެއިން ލަވަ ވަރަށް ތަފާތެވެ. މިއުޒިކާއި ވަޒަނާއި ލަވައިގެ ޅެންވެސް އަދި ކިޔާފައިވާގޮތްވެސް ތަފާތެވެ. މަޝްހޫރު ލަވަކިއުންތެރިޔާ އިބްރާހީމް އަލީ (ކުޑައިއްބެ) ކިޔާފައިވާ މިލަވައިން މާލޭގެ މިހާރުގެ ދިރިއުޅުމުގެ ޙާލަތާއި ރައްޔިތުންގެ ޙާލަތު ކިޔައިދެއެވެ. އަދި މިޙާލަތު ބަދަލުވާން ޖެހޭކަމާއި އެކަމަށްޓަކައި ޑރ.މުޢިއްޒު އިންތިޚާބުކުރަން ޖެހޭކަމަށް ބުނެއެވެ. އަދި އެއީ ކީއްވެގެންކަންވެސް ކިޔައިދެއެވެ.
ކޮންމެއަކަސް މި ހިތްގައިމު ލަވައިގެ ރާގާއި މިއުޒިކަކީ ކޮޕީއެކެވެ. މީގެ އަސްލު ލަވައަކީ އިސްލާމީ ދުނިޔޭގައި މިވަގުތު ހުންނެވި އެންމެ ވަރުގަދަ އެއް ލީޑަރުކަމަށްވާ ތުރިކީގެ ރައީސް ތަޖަބް ޠައްޔިބު އުރުދުޣާނަށް ޚާއްސަކޮށްގެން ކިޔާފައިވާ ތުރުކީބަހުގެ ލަވައެކެވެ. ލަވައިގެ ނަމަކީ، "ހަސަތް ވަކްތީ"އެވެ. މާނައަކީ "ގޮވާން ކަނޑާ ވަޤުތު"އެވެ.
މިލަވައިގައި ވަނީ ތުރުކީގެ މިނިވަންކަމާއި އިސްތިޤުލާލަށްޓަކައި ތަރައްޤީއާއި ކުރިއެރުމަށްޓަކައި އެއްބައިވަންތަކަމާއެކު ތިބުމުގެ ޝުޢޫރުތަކެކެވެ. އުރުދުޣާންގެ ޒަޢާމަތުގެ ދަށުން މިއަދު ތުރިކީ ހޯދަމުންދާ ކާމިޔާބާއި ތަރައްޤީއަކީ އިހުގެ އަބްޠާލުން ހޯދިފަދަ ކުރިއެރުންތަކެއްގެގޮތުގައި މިލަވައިގައި ފާހަގަކޮށްފައިވެއެވެ. އަދި މިއަދަކީ ތުރުކީއަށް ލިބިފައިވާ ކާމިޔާބީގެ ގޮވާން ކަނޑަންވީ ވަގުތުކަމަށާ، އެއީ އެކަތިކަނޑެއްގެގޮތުގައި ޤައުމީ މަސްލަޙަތު އިސްކޮށްގެން ކުރިއަށް ދިއުންކަމަށް ބުނެފައިވެއެވެ. އަދި ބައިބައި ވުމާއި ވަކިވެގަތުމަތީ ޤައުމީ ތަރައްޤީއަށް އޮތް ނިކަމެތިކަމެއްކަމަށް ބުނެފައިވެއެވެ. ކޮންމެއަކަސް މިއީ ޖޯޝާއި ހިތްވަރާއި ޢުޒުމު އާވާފަދަ ވަރުގަދަ ލަވައެކެވެ. ލަވަ ކިޔާފައިވަނީ ސުވީޑްންގެ ލުބުނާން ދަރިކޮޅުގެ މަޝްހޫރު ލަވަކިއުންތެރިޔާ މެހެރް ޒައިންއެވެ.
މިލަވަ އަސްލަކަށް ބަލައިގެން ޑރ.މުޢިއްޒު ހެއްދެވި ކެމްޕެއިން ލަވައާމެދު ތިބޭފުޅުން އިންސާފުކުރައްވާށެވެ. ލަވައިގެ މޮޅުދެރަ މިނަކަށް ނޫނެވެ. ލަވައިގެ މަޤުސަދަށެވެ.